DENISE ATUALEVAO TA’ALO AU VOLLEYBALL ARMED FORCES

O le tama’ita’i mai le Alataua ua iloga nei lona taumafai i le fa’agatama o le Volleyball ma ua Asia nei e ia se tulaga e tarallo ai mo le a’u Volleyball a le Vaega Au i le tatou ta’aloga faitaulua lea e fa’atasia i Wuhan, China ia Oketopa 18-27, 2019.

Ua atoa le fitu o tausaga o Ta’aloga Fa’avaomalo a Vaega Au uma o le Lalolagi ma e silia ma le 100 atunu’u o lo’o aofia ai i nei ta’aloga fa’avaomalo, ma e aofia ai le tusa ma le 9,500 o tagata ta’a’alo i so’o se ituaiga o ta’aloga, ua tali tutusa lava ma Ta’aloga a le Olimipeka.

O au ta’a’alo o lo’o masi’i nei a le Militeri a Amerika ua fa’atulaga e 21 a latou ‘au i so’o se ta’aloga lava ua fa’atautaia i totonu o le soifua auauna ai i le Vaega Au, ma ua silia ma le 300 ai fitafita a le vaega au ua auai ai.

O Siaitolo Denise Atualevao o le tama’ita’i Samoa na soifua a’e i Honolulu, a’o alaala ai nai ona matua o Tafale ma Ululima Atualevao mai Nua ma Se’etaga, Ta’u Manu’a, Petesa ma Lotofaga Samoa.

Peita’i e i ai se taimi o talavou o ia sa toe o’o mai ai nai ona matua ma nonofo iinei a’o le’i toe malaga atu e nonofo mai nei i San Diego lea na fa’au’u mai ai loa le tama’ita’i mai lana a’oga maualuga i le tausaga 2010, ma ulufale atu ai i le Graceland University lea na maua ai lona fa’ailoga BA i le Human Resources.

O le mae’a ai o lana a’oga i le Iunivesite lea, soso’o loa lava ma le ulufale i le USNavy lea ua ta’alo ai nei o ia i le ta’aloga sa fiafia tele i ai, Volleyball.

FOLASAGA FA’APITOA DOH - TAU LE GASEGASE O LE MISELA

O le aso Faraile ua te’a na vala’auina ai le vasega o e fa’asalalau e le Matagaluega o le Soifua Maloloina se’ia fa’ailoa tulaga ua i ai nei le fa’ainumaga o fuala’au e fa’alalo ma tineia ai le Mumu Tutupa, fa’atasi ai ma le Mai Misela lea ua fa’ailoa mai ua amata pepesi i Samoa.

Mai Samoa ua fa’ailoa mai ua fa’amaonia e to’afitu i latou ua maua i le Misela, e to’alima tamaiti ae to’a lua tagata matutua. Ua fa’ailoa mai fo’i afuaga o le maua ai o tagata i lea fa’ama’i ma e pipisi lava le fa’ama’i lea. Ua fa’ailoa mai o le verusi e maua i totonu o taliga po’o le fa’ai o le tagata ma e masani la ona tale tele ma fiva le tamaititi e amata maua i le Misela. Ona pata lea o le tino ona ua malosi fo’i le fiva.

Peita’i, o le tala lava, a pesia loa le to’atasi o le aiga, e le alu ese lava le Misela se’iloga ua pesia uma tagata o lea aiga e tatau ona maua ai. I tausaga ua te’a, sa mafai lava ona togafitiga e nai tina le Misela ma le Tanesusu i tua i agia, peita’i o lenei vaitau, ua fesoasoani tele le tui fa’apitoa mo le Misela ua ofoina mai e le Matagaluega o le Soifua Maloloina, e puipuia ai le fanau mai pesia i le Misela.

Ua fa’amaumauina uma lava le to’atele o fanau a’oga ua o’o atu sui o le Matagaluega ma ua latou va’aia ai, ua mae’a faia tui puipuia o le Misela. Peita’i o le tui puipuia muamua o le tamaititi e faia lea i le va o le 12 masina ma le 15 masina le matua o le tamaititi. O lona tui lona lua lea e faia i le va o le 4-6tausaga le matutua o fanau i Amerika Samoa nei.

Peita’i ua matauina i a’oga tulaga muamua, ua silia ma le 30% o i latou e leai ni tui puipuia nei ua faia. Peita’i o i latou ua faia na’o le tasi le tui puipuia, ua i le va o le 77% - 85% i latou ua mae’a faia le tui e tasi i a’oga uma a le Malo na asia.

O lea ua logo atu ai i matua, ina ia alofagia, avane lou alo i se falemai o tulata ia te oe, se’i siaki o latou pepa tui pe ua faia o latou tui puipuia nei o le Misela. Afai e leai e faia loa lava, ae afai o lo ua mae’a faia, e le toe faia lava se tui.

FAAPINE SSGT PAVILION S. TOEAFOA I KUWAIT

Ua a’ailoa mai le matagofie o le lagona fa’agae’etia ma le fa’afetai o le ali’i Fitafita Samoa o Pavilion Sesepasara Toleafoa ina ua fa’ae’e fo’i ia te ia se isi fa’aeaga i le galuega fa’afitafita o lo’o tautua ai nei i Kuwait.

O lona tulaga so’oupu o i ai nei i le va o lana 1st Infantry Division [RSSB] ua ia mauaina ai nei lea fa’aeaga o lana tautua i le pine ua taua’aoina e le ali’i Brig, Gen. Howard Geck.

“Ua iloga le sao o SSgt Pavilion Sesepasara Toleafoa I le taimi tonu lava o le Operations Resolute Support ma le Freedom’s Sentinel. O lana vaega, le 1st RSSB na vala’auina e tautua I le tafa o taua i Kuwait talu mai Fepuari 2019 ma ua foufou nei e toe taliu mai i fanua i le faai’uga o Oketopa 2019,” o tusitusia ia mo lenei ali’i.

FA’AILO O LE TETELE O LE PALOLO UA TATOU I AI NEI

Ua papa faititili, fe’emo fo’i uila fa’ate’ite’i, o le tau fo’i ua fai si louloua, ua iloga fa’ailo o le vaitau o le tataga muamua o le palolo i le atu Samoa.

Mai le matagaluega o le Puipuiga o le Vaomatua ma Faigafaiva, ua latou fa’ailoa mai le lona fitu o po talu mai ona atoa le masina, le taimi tonu e tetele ai le palolo e a’e, lea la ua manatu e tatau ona asia lea i le po o le aso Toonai, lea ua atoa i ai le fitu o po talu ona atoa le masina.

Ae matua leai lava se mea e leaga ai le asia fo’i i le po o le aso Faraile a malama le aso To’ona’i. Ua iloga fo’i ua pa’u le aso e ta ai le palolo i vaitau fa’ai’u o le masina, lea e matele ina fa’apea ai tama ma tina matutua, “E tetele ai le tataga!”

Peita’i i le tausaga talu ai, na iloga na pa’ua i le amataga o le masina o Oketopa, ae na matua tele le palolo i Upolu i Samoa ma le Manu’atele, ae sa le tele na’ua i Tutuila nei. O le isi lea galuega patino a le Matagaluega o le Puipuiga o le Vaomatua ma le Gataifale, ina ia fa’amauina foi le tataga o le Palolo pe tetele pe itiiti i lea tausaga ma lea tausaga, ma po’o fea fo’i afio’aga ma motu o le atu Samoa o lo’o tetele i ai a’o ai fo’i o vaivai.

“Manatua sau fa’asolo e fa’aoso mai ai le i’a, aua o le manogi feso’ota’i fa’anatura o mea uma na faia e le Silisili ese, e afua ai ona oso tetele le i’a i lea tausaga ma lea tausaga,” o se tala ata lea a le isi toeaina i le Fagaloa, e le misia lava ona va’a ma le taumasuasua i lea fa’amanuiaga i tausaga ta’itasi.