Ads by Google Ads by Google

Tala I Vaifanua

TOSO ESE ATU LE VA’A KOREA I MATU - ‘MV WISE HONEST’

O le va’a Korea i Matu lea sa toso mai fo’i ma taula i le tatou Uafu ua silia nei ma le tolu masina, ua toe toso ese atu e le va’a na tosoina mai, i lalo o le fa’atonuga ma’oti a le Matagaluega o Fa’amasinoga a le malo tele.

 

Ua fa’ailoa mai e le susuga Lt Ryan Junod, US Coast Guard Marine Safety Detachment Unit, “O le fuafuaga lava lea ua mae’a faia, ina ia ave’esea atu lea va’a mai le tatou Uafu tele pe afai e tumau le lelei o le tau.

 

Ua fa’ailoa mai fo’i, “O le va’a lenei ua mae’a fa’atauina e le Kamupani Amerika ina ia avatu e toe fa’aliliu ma fa’aaoga, aua o le Kamupani lea e fa’aaogaina so’o se ituaiga elemeni e mafai ona fa’aliliu ma toe fa’aaoga mai mo le fausaga o nisi oloa u’amea i le lumana’i.”

 

Peita’i ina ua fesiligia le faigamalaga lea e tosoa le va’a po’o fea le isi atunu’u o le a fa’atutu i ai, ae le mafai ona fa’aalia e le susuga Junod lena tulaga, ona e le o fa’ailoa mai ia i latou.

 

O lenei va’a na toso mai i totonu o le tatou teritori i le amataga o Me, 2019, peita’i e le mautinoa po’o fea la e toe toso aga’i i ai, pe a o’o ina mae’a fa’atauina. Ona ua avea fa’amalosi mai e le Matagaluega o Fa’amasinoga a le Malo Tele lenei va’a mai Initonesia lea sa taofia ai ona o lo’o tu’uaia sa la’u ai oloa tau Koale, ma ua le toe manana’o fo’i le Malo o Initonesia e taofia umi le MV Wise Honest i lo latou uafu.

 

Ona o le latalata o i tatou i le malo o Indonesia, lea na faia ai le fa’aiuga ale Malo Tele e toso mai ma taula i le tatou uafu tele i Fagatogo, ae se’i faia suesuega auiliili a le Matagaluega o Fa’amasinoga i le va’a ma le afuaga o lona saisaitia i Indonesia.

 

Ua mae’a faia suesuega uma na manatu ina ia fa’amautu ai moliga ua fa’asaga i le Malo o Korea i Matu e tusa o le fela’ua’iga o Koale i lenei va’a. Peita’i ae maoga ae  luga o le afuaga o le toso fa’amalosia mai e Amerika o le va’a, ona o lo’o i ai se fa’aiuga o le fa’amasioga a le malo tele i le malo o Korea ma o le ala la o le taofia o le va’a ina ia fa’amalosia ai se fa’aiuga e ao ina faia mo Korea i Matu ina ia totogia le sala ua malo ai se aiga o se tasi o fitafita o le malo tele sa fa’apagotaina i Korea i Matu, ma ua mae’a toe fa’afo’i mai lea fitafita peita’i e na’o le ono aso ae maliu, ae ua matua vaivai lava lona tino, ona o sauaga sa faia ia te ia.

 

Ona ua le gaua’i mai le Malo o Korea i Matu latou te totogia le sala tupe ua malo ai le aiga o lea fitafita Amerika i le fa’amasinoga i Niu Ioka, o lea ua faliu ai le vaega o fa’amasinoga e fa’aaoga le va’a lenei e fa’atau ese atu, ae totogia ai se vaega o lea sala tupe ua atofa e le fa’amasinoga e $500.miliona mo le ola o lea fitafita.

 

O le pule a le fa’amasinoga a le Malo tele i Niu Ioka na taua’aoina mai ia Iulai, e fa’atau ai lea va’a i so’o se kamupani po’o se malo, ae totogia ai se vaega o le sala mo le aiga o le fitafita o mafatia ona e maliu le ali’i fitafita ua le toe aoga lona mafaufau ma lona tino i se mea lava e tasi. Ua pei o se tasi na soifua a’e e vaivai le mafaufau ma e le atoatoa fo’i lona tino.

 

E tele na’ua tala sa faia e tusa o lenei va’a ina ua taula i lo tatou gataifale, aua e popole fo’i le to’atele aua e le o manofonofo fo’i le Malo o Korea i Matu i a latou tu’ua’iga o Amerika i lo latou tosoa fa’amalosi mai o le latou va’a oloa i lo tatou nei uafu.

 

O le tali a Amerika e le’i fa’asalalauina fa’alaua’itele, peita’i, ua mautinoa na nofo sauni lava Amerika i so’o se mea e ono alia’i mai i lana avea fa’amalosi mai o le va’a lea. E silia ma le 4,000 o fitafita uma o le vaega au na fa’apotopoto i Melepone, Ausetalia. Na fa’atonutonu mai fo’i le Nofoaga a le Vaega Au o lo’o i Iapani, le isi Filipaina, ma le isi fo’i i Guam ina ne’i ono sofa’i mai Korea i Matu i se taimi ona o lenei fa’aiuga ua faia e le Malo tele.

 

I le fa’ai’uga lava fo’i o Setema, na tulaueleele ai va’alele tetele a le US Marines i le taimi e tasi i le tatou Malae Va’alele i Tafuna. O le fa’amatalaga, o le latou malaga taliu mai e Ausetalia, uia mai Fiti ma fa’asolo mai ai i Amerika Samoa e momoe ai fa’ato’a usu ai i le taeao e soso’o ai. O le vaega lea sa latou laua maia nisi o ta’avale ma uta mo le nofoaga o le vaega au i Melepone lea e mata’ia so’o se mea e ono tupu mai i le va o Korea i Matu ma i tatou i Amerika Samoa nei, Hawaii ma Guam ae maise foi o Korea i Saute ma Iapani.