SO'OFA'ATASI KOLUSE MUMU, MAU E FA'AMALOSI AIGA & ISI - TINEIA PULE ILE OLA

I vaiaso atoa na te'a nei sa fa'atautaia ai le semina sa auai uma i ai le Mau e Fa'amalosia Aiga, le DHSS, le Koluse Mumu i Amerika Samoa, le Catholic Social Services ma le Foma'i o le Mafaufau a le Veterans Affairs ma isi fo'i o sui e faufautua i e sulufa'i pe lagona le mafatia ona o ni fa'afitauli tuga i le olaga.

O le semina lenei na talanoaina atili ai ala e afua ai ona fa'aosofia le tagata i lagona e fia pule i lona ola. E le gata i lea ae ua talanoaina ai fo'i ma ituaiga va'aia o lea tulaga ina ia nofouta le mamalu lautele, ia iloa le mea e fai ina ia mafai ona a'apa atu ma fa'asaoina le ola mai le maumau.

O le isi vala atoa lava o le talanoaga, ia e iloa lelei, fa'afo'ia lea fa'afitauli pe afai o oe le sui mulimuli lava o le a feso'ota'i ma lea tagata ua manatu ina ia pule i lona ola.

"O le tele o taimi, a talanoaina nei fa'afitauli tuga i le loto mafatia o se tasi, ua le fia talanoa le to'atele, aua e le mailoa tonu lava le afuaga o fa'afitauli fa'apenei, ma ua le manatu fo'i i latou o lo'o o'o i ai nei lagona e fa'aalia mai i e pele ia i latou, so latou lagona o i ai,” o se tasi lea o fa’amatalaga i le semina.

"O nisi ua le manatu ina ia fa'ailoa mai ona uiga mafatia ma lagona mamafatu o i ai i ana uo pele ma lona aiga. O lona uiga e matele ina faia e i tatou se sailiga loloto, i ona uiga fa'aalia, pe tau matau atu ai se suiga ogaoga o feagai ma lea sui."

"O nisi o uiga loloto o le fa'alogo lea i ana tala e fai. Ua te'i lava ua amata ona talanoa, pe afai ou te oti, ia e manatua mea nei! O le isi ua le talanoa, ae ua va'aia le tutu to'atasi ma va'ava'ai mamao i mea sa le masani ona ia faia so'o i lona soifuaga, a'o lelei mea uma. O nisi ua matauina ua alu so'o i le falema'i, ae a fesiligia i se va'aiga a foma'i, ae fai mai e lelei a mea uma. Peita'i va'ai loloto atu nai lo lana tali. O nisi e ogaoga ia i latou le maua fa'afuase'i o se tala, o ia i ma'i faigata, e pei o le Kanesa."

"O nisi ua manatu, ia aua lava ne'i masalosalo se isi o ana pelega o i ai se suiga i lona mafaufau ma ua manatu ina ia pule i le soifua, ma ua le iloa lava e se tasi nei suiga ia te ia, o le ituaiga fa'aletonu lena, e o'o lava i le taimi e tupu mai ai lea mea tiga, ae misia uma e i latou se isi ua ia pule i le soifua ae le'i o'o atu se isi fesoasoani i lona mafatia."

Ua fa'ailoa nisi o vaifofo. "Ia mautinoa o i ai se isi e fa'alogo i fa'asea, po'o lagona o'otia o lea sui, aua ne'i taumafai oe e avatu ia te ia nisi o ou manatu, ae ia fa'alogo i ona lagona fa'aalia, ma taumafai e fa'aumiumi lava ona lua talanoa. Afai e i ai se isi e te iloa e agava'a ina ia talatalanoa ma ia, o i ai fa'atasi ma le sui mafatia. Aua lava ne'i tu'ua na'o ia e alu, ae ia e tutu ai i ona autafa, ia lua momoe fo'i ma ia, aua ne'i tu'ua ia te ia se avanoa e tu'uto'atasi ai."

I le vasega o e faufautua mo i latou uma e aga'i atu ona o le fia maua o se fesoasoani, e ao ia i latou ona mautinoa lelei lava, e so'o se tala e pa'u atu i lou fofoga i nei sui ua mafatia, e ao ina fa'aosofia ai lona naunau e ola, nai lona manatu ina ia fa'ataunu'u le mea ua manatu ai, o le pule i le ola lea.

O i latou uma nei fo'i e faufautua e ao ina a'oa'oina lelei, ia iloa lelei foliga mai  po'o le ataata mai o faafitauli o lo'o ulufale atu ma so'o se tasi o lo'o mana'omia lau faufautua lelei. Ia toe faasao mai lava se tasi ua tauau ina ia faia lea sese matuia.

Sa i ai se manatu fa'aalia o se tasi o sui o lea Semina, na ia fa'aalia ai, "E ao ina manino i le tagata ua tau pule i lona ola, e matua leai sona avanoa i le Ola e fa'avavau lea e saili e tagata Kerisiano uma lava, pe afai e te pule i lou ola. O a lava au amiolelei sa faia i lou olaga atoa. ua uliuli fa'asoloatoa ona o lea solitulafono i luma o le Atua, o le a e faia."

TALOSAGA KOVANA LIPOTI PAGOTA SOSOLA I TUA MAI LE TOESE

O le vaiaso ua te’a na tuuina atu ai se tusi mai le afioga i le Kovana Sili, Lolo Matalasi Moliga i le Komesina o Leoleo, Le’i Sonny Thompson mo se lipoti tusitusia i le mataupu o le sosola o pagota mai tua o le toese Tafuna, ae maise o le falepuipui mo fanau laiti - Juvenile Detention Center.

O lea talosaga a le kovana sa mafua mai ona o le fesiligia e le KHJ News o le kovana, i le tulaga o pagota sosola i tua ae le’i tali atu lava Le’i i fesili a lea vaega fa’asalalau.

"E matua leai se aoga e fa'ato'a iloa mai ai e a'u mea ona ua ta mai i tala fa'asalalau mea ua tutupu, ae le o iloa e a'u lea e se'ei nei i le tatou malo e tau fa'afoe atu. E ao ina fa'ailoa nei mea i le atunu'u ia nofouta i latou i ai ma ia latou va'aia tele mai pagota sosola,” o se vaega lea o le tusi a Lolo ia Le’i.

O se tasi o fa’asea ua tuuina atu i le kovana, o le tuai lea ona maua se fa’aaliga mai i le ofisa o leoleo, ina ia fa’ailoa i le atunu’u ua i ai ni pagota ua sosola i tua.

70 TAMAITI MILILANI HIGH - MALAGA MAI I LE JPS

Ua i ai nei le au malaga mai Mililani High School lea ua talimalo ai le JPS Amerika Samoa ma ua nonofo nei i le DYWA i Pago Pago. O le aumalaga e silia i le to'a 70 o i latou, ma ua fa'ailoa mai, "O se tasi o mea taua lava ua latou fia iloa ma va'ai patino i ai i latou, o ala o fe'au fa'asamoa, le gaosiga o mea taumafa a Samoa atoa ai ma nisi fo'i o fa'atinoga o tu ma aga a Samoa ua latou molimauina i le tele o taimi, i fa'atasiga o aiga ma so'o i le va o afio'aga, a'oga ma isi fa'alapotopotoga."

Na to'ai taunu'u mai le aumalaga lea ia Iulai 22, 2019 mo ta’alaga football i Amerika Samoa. Sa toe taliu le aumalaga i Hawaii i le po anapo.

O le to'atele o le aumalaga fo'i lenei, o nisi o fanau e tupuga ane i Matua o Samoa. Ua mae'a faia a latou folauga i le Manu'atele, ona o le o atu i fafo atu o le Taulaga ma toe fo'i mai, ua mae'a gaosia e i latou a latou tausami Samoa ma ua fa'avelaina fo'i latou mea'ai e ala i le umu po'o le suavai fa'asamoa.