Ads by Google Ads by Google

Tala I Vaifanua


[ata: foa'i]

"FIJI"- KONESETI AFIAFI ASO TO'ONA'I MALAE O SUIGAULA

 

Ua toe o'o mai Fiji i le teritori, ona o le vala'aulia aloa'ia a le Bluesky Amerika Samoa e fa'amanatu le 20 tausaga talu ona fa'atuina le kamupani i le teritori.

 

O fa’afiafiaga a Fiji e faia i le malae o le Su’igaula i Utulei i le aso Toanai nei, Iulai 20. E muamua mai i le taeao o le a amatalia ai le Aso mo Aiga fa'atasi ma le Aiga Bluesky Amerika Samoa.

 

I lena fa'atasiga e matua matagofie mea uma o le a fa'atataia ai mo Aiga atoa, ma o lo'o naunau mai fo'i le Bluesky Amerika Samoa. E le na'o lea, ae ua saunia lelei le tele o nofoaga fa'apitoa e mafai ona e afea, talatala ma i latou, po'o a fo'i a latou tautua o le a ofoina atu mo le mamalu lautele.

 

O le to'atele e fa'atau atu latou mea'ai ua gaosia, ae o nisi fo'i e faia latou lulu  ma latou ta'aloga eseese e fa'afiafiaina atili ai le fanau, ina ia sailia sou laki.

 

E leai se totogi o lou ulufale i le Koneseti e maimoaina, ae mafai ona sefe lau seleni e fa'atau ai sina mea'ai e fa'afiafiaina ai lou aiga atoa mo se tou aiga afiafi.

 

Ua le gata i lea, afai o e manatu ina ia fa'atau se telefoni fou i le taimi nei, e sili pe a tu'u mo lea afiafi, o le a i ai tau maulalo e ofoina atu e le Bluesky Amerika Samoa mo a latou oloa eseese o fa'atau atu i le mamalu lautele, e aofia ai telefoni ma isi mea uma lava e so'otaga i telefoni mo oe.

 

O latou tauvaga fo'i o le a fa'aauau lava mo le masina atoa o Iulai 2019, ma e le muta ai nei avanoa se'iloga e mae'a Iulai, le latou masina o le aso na ulua'i fa'atuina ai le Bluesky i le tatou teritori.

 

Ua toe tima'i mai lava le pulega ma le aufaigaluega uma lava a le Bluesky Amerika Samoa, "A e fia fa'afiafiaina lou aiga, o le api lava i Utulei i le taeao se'ia o'o ina mae'a le Koneseti a Fiji i le afiafi fa'ato'a o i aiga."

 

6 TOA SAMOA FA'AU'U BCT KOLENIGA A LE US ARMY FORT JACKSON

 

E to’aono fanau talavou a le atunu’u ua ofoina atu le malosi ina ia tautua ai i le US Army ma ua mae'a nei le latou koleniga fa'apitoa BCT i Fort Jackson, South Carolina.

 

O i latou na fa'au'u mai ia Iulai 18, 2019 ma ua fa'ao'o mai le latou ata, ua fiafia fa'atasi ma nai sui o aiga o lo'o ua malaga mamao atu mo lea fa'amoemoe. O i latou nei e to'a ono ua aofia  ai Velma Mati Salanoa, Catriona Mose-Malo, Betty Autele. Alexandria Fulisia Letuli, Iopu Kaleopa ma Jacob Malauulu.

 

Ua fa'ailoa mai fo'i e le tama'ita'i o Catriona Mose-Malo, ua saunia fo'i o ia e malaga e fa'aauau lana AIT i Fort Lee, Virginia, peita'i ua le mautinoa e ia po'o fea e malaga i ai le isi to'alima o fanau talavou ua latou fa'au'u fa'atasi e fa'aauau ai latou AIT. O i latou uma nei o lo ua aofia i le Bravo Company 3-39.

 

AMATALIA SU’ESUE’GA FA’AINUINA FUALA'AU O LE FILARIASIS

 

O le aso 13 o Iulai sa fa’ataunu’uina ia e le Matagaluega o le Soifua Maloloina se iloiloga po’o se su’esuega mo le fa’ainuga fuala’au o le mumu tutupa sa faia i se taimi ua mavae.  O lenei iloiloga o le a mafai ona iloaina ai po’o tumau pea le pepesi o le fa’ama’i o le Mumu Tutupa i Amerika Samoa.

 

“O lou malie ete auai i lenei su’esuga po’o lenei iloiloga o le a fesoasoani lea i le Matagaluega o le Soifua Maloloina ina ia mafai ona ausia le fa’amoemoe ina ia tafiesea lenei fa’ama’i o le Mumu Tutupa mai Amerika Samoa,” o se tala lea a le Soifua Maloloina.

 

O lenei suesuega o lo’o fai paaga ai le Sofua Maloloina, ma le Pacific Islands Health Officers Association ma le Centers for Disease Control & Prevention [CDC].

 

Ua mautinoa o loo manatua pea e le atunu'u le tatou taumafaiga tele i le tausaga ua tuana'i ina ia matua'i fa'atama'ia ma soloia ese lenei gasegase mataga mai le tatou atunu'u. Na mafuli ai le malo ma ona matagaluega uma e sapaia lea misiona ina ia ausia le fa'amoemoe patino na lu'ia fa'atasi ai le atunu'u ma lana matagaluega o le Soifua Maloloina.

 

Na toe fa'atulaga se suesuega patino i le aotelega na mafai ona o'o i ai le inumaga o fuala'au Filariasis, na atoa lelei le 73% o le atunu'u, ua mae'a inua fuala'au mumu mai lea taumafaiga tele.

 

Lea ua toe oo mai le CDC ina ia toe siakia fo'i ni fa'aiuga lelei o lea taumafaiga, ma o le a faia lea mo le 8 vaiaso ona muta lea. O lea ua sailia mai, po'o le a se a'afiaga lelei ua maua mai le inumia o fuala'au nei o le mumu, ma lona fa'atama'ia aloaia ai o le Filariasis mai Amerika Samoa.

 

O le a savalia e le Soifua Maloloina nu’u ma alalafaga uma o Tutuila e aofia ai ma Aunu’u mo lenei fa’amoemoe.

 

Fa’ailoa e le Soifua Maloloina e fa’apea, “I totonu o nu’u ta’itasi o le a piki’ina (random select) ma ia aiga ese’ese e auai. E le o aiga uma o le nu’u o le a filifilia ina ia auai I lenei iloiloga po’o lenei su’esu’ega. I nisi aiga o le a filifiliaina, o le a fa’apea ona fesiligigiaina na’o fanau laiti mai le va o le 5 tausaga seia o’o atu o le 9 tausaga. Ae o nisi aiga o le a fa’apea ona auai ma fesiligia ina tagata uma o lo’o nonofo ai i totonu o lea aiga e amata mai i le tamaitiiti 5 tausaga sei’a o’o atu lava i le tagata matua o lo’o nofo ai.

 

TOE MAUA TU'UGAMAU ELIGA LAINA O LE SUA I AUA, MALAE PAEPAEULUPO'O

 

Ua fa'amaonia mai e nisi o le aufaigaluega a le ASPA o lo'o nafa ma le eliga o Laina o le Sua i Aua, ua toe maua fo'i e i latou nisi o toega o i latou na tanumia i le eleele ua fa'atulaga e uia atu ai laina fa'ataoto a le Sewer Line.

 

O le tausaga fo'i na te'a sa maua ai nisi o ponaivi mai laina sa elia e tulata lava i le malae i lea afio'aga. Na aoina lelei uma poaivi nei ma teu fa'alelei, ma ua taofia ai le toe suaina o lena tiu o le malae ae suia le itu e sua.

 

Peita'i o lea fo'i ua fa'ailoa mai le toe maua o isi tu'ugamau e lua, ma ua le mautinoa poo le a se faiga e faia mo lea tulaga, ae ua fa'ailoa mai e le aufaigaluega, "E tatalia lelei lava se fa'aiuga a le afio'aga i lenei mataupu. E tatau lava ona 'seu le manu ae taga'i i le galu' i soo se mea e tau atu ai le galuega. E tima'ia le saofaiga a le afio'aga i se latou fa'ai'uga ona fa'ato'a fa'aauau lea o galuega nei."

 

O le a taofia fo'i ata o nei toega ina ia mua'i fa'ailoa le finagalo o le afio'aga, fa'ato'a fa'alauiloa fa'alaua'itele.