"IA SUSULU ATU" - ASO FA'AILO GALUEGA PETER COLEMAN ELEMENTARY

Na amatalia le fa'amoemoe o le Aoga Tulaga Muamua a Peter Coleman i Pago Pago i le talotaloga ma le sauniga e tima'i ai le alofa o le Atua i lea fo'i taumafaiga ina ia fa'amalamalama atili le fanau talavou, i galuega ma faiva o lo'o feagai ai ma nisi o matagaluega o le Malo, ina ia mautu lo latou saogalemu a'o soifua a'e i lo latou malo.

O le fa'alauiloaga o faiva eseese sa nafa ma vaega e tolu o le malo e aofia ai le Marine Patrol a le Matagaluega o le Puipuiga o le Saogalemu Lautele; Ofisa o Tiute a le Matagaluega o le Tupe ma le Vaega o le Drug Enforcement a le Ofisa o Tiute.

O le Ofisa o Tiute e galulue i le uafu i Fagatogo ma le malae va’alele i Tafuna, ae o le Vaega o le Drug Enforcement e galulue ina ia maua nisi o fuala'au fa'asaina ma Vaila'au O'ona e taofia le ofi mai i le atunu’u.

Na mata'ina maimoaga a le fanau i le galuega a Ta'ifau Sosogi K-9, lea e fa'aaogaina e le Ofisa o Tiute, ina ia latou sogitia le tele o fuala'au fa'asaina ma vaila'au o'ona o lo'o mana'omia ona maua e i latou ma ave'esea a'o le'i ulufale mai i totonu o le atunu'u.

O le taimi lava e va'aia ai e le fanau le fealua'i solo o le ta'ifau e su'e le polo sa fa'asogisogi muamua i ai e ali'i leoleo le ta'ifau, ae ua natia, sa matua fe'ei. Peita'i o le taimi lava e maua ai e lea ta'ifau le polo o lo'o ia sailia, e matua alalaga fiafia i latou aua e le o mafai e mea e tele sa pa pupuni ai le sailiga a le ta'ifau lea, ona natia lea polo mai ia te ia.

Na fa'amatala e ali'i tofia sa faia folasaga le aoga o nei ta'ifau o lo’o fa’aaogaina i le uafu ma le malaeva’alele.

Sa faia fa'atinoga a le Ofisa o Tiute ina ia iloa patino a latou galuega e sailia ai pusa oloa tetele ua fa'aulu mai ma oloa eseese o lo'o i ai i totonu. O latou faiva uma nei, "E ao ina faia ma le fa'amaoni, aua a le fa'amaoni tagata faigaluega i o latou tiute e fa'ataunu'u, ua le mafai ona saogalemu lo outou soifua, ma o le a le fa'asusuluina fo'i la o outou sulu, e iloa atu ai e outou le malamalama."

I le Marine Patrol sa fa'ailoa ituaiga o Ofu Fa'aola e ao ina la'eia e so'o se tasi e folau i le va'a. Ua fa'ailoa ia i latou, afai e pa'u lou tino i le sami po'o le vaitafe ae ua mae'a ona e la'eia lea ofu fa'aola, e mafai ona malu puipuia lou ola e fa'atali ai le o'o ane a se va'a fa'aola, ina ua latou mua'i maua se fa'ailo, ua goto le va'a o e malaga ai.

Ua ia fa'ailoa atu, "O le ala lea o lo'o fa'amalosia ai e le US Coast Guard i so'o se va'a folau, e ao ina tutusa le aofai o tagata o lo'o folau ai ma le faitau aofai o ofu fa'aola o lo'o i ai i luga, pe o va'a fa'aola fo'i ua mae'a fa'atulaga mo le aotelega o le pasese i luga o va'a folau."

"Ia malamalama outou, i galuega o lo'o matou faia, ina ia mautinoa lo outou saogalemu a'o tou tuputupu a'e ma soifua i le tatou nei malo, aua ne'i tou fa'apea e le o tapena e lo outou malo lo outou saogalemu." O se upu lea mai le sui sa faia le folasaga mo le Marine Patrol.

Sa mua'i vaetoluina le aotelega o le fanau a'oga e fa'atautaia ai le latou mataupu fa'apitoa, "Ia Fai Oe ma Sulu."

FILIFILIA GENEVIEVE GRAIG PERESETENE O LE VASA

Ole fonotaga fa'apitoa a le Visit American Samoa Association (VASA) ua latou filifilia ai lo latou ulua'i peresetene, Genevieve Graig fa'atasi ai fo'i ma sui tofia mo le Komiti Fa'afoe, ina ia fa'ataunu'uina le latou fa'amoemoe, ia si'itia atili le laasaga e latou te fa'alauiloa atu ai Amerika Samoa i atunu'u i fafo.

O Graig e le fou ia te ia le a'ano moni o le latou taumafaiga nei, aua ua loa tausaga o lo'o tauavea mai e ia le pisinisi sa soifua a'e o fa'atautaia e lona tina, Betty Cavannah Graig - le Pago Pago Tradewinds Tours.

O le sui peresitene o le VASA ua ua filifilia ai Fuimaono Tone Sione, o le Pule o le Talofa Airways i Amerika Samoa nei. O isi totino o le Komiti Fa'afoe e aofia ai Lenita Young, Isabel Rose Hudson ma Rory West. O le teutupe o Tom Drabble ma le Failautusi o Tiara Drabble lea e le mafai ona palota i so'o se mataupu e talanoaina e lea fo'i Komiti Fa'afoe.

O mataupu fa'apitoa ua faliu nei le Komiti Fa'afoe e talanoaina ma soalaupule ai mo le isi a latou fonotaga e soso'o mai o le tulaga o tulafono tau i turisi a le Immigration po'o le Ofisa o Femalaga'iga i le ulufale mai o nisi, ma le tulaga o sailiiliga a le Matagaluega o Uafu ma Malaeva'alele pe a o'o ina ulufale mai turisi e asiasi ma maimoa i le atunu'u.

O le komiti laititi e nafa ma tulaga o tulafono uma e ao ina mataituina e turisi e fia asia Amerika Samoa ua latou galulue fa'atasi nei ma Ofisa o Femalagaiga ina ia fa'aitiitia teisi tulafono e fa'aulufale ai tagata maimoa i le atunu'u, ina ia le fa'afaigata ia i latou. Ua galulue fa'atasi i latou ma le Ofisa o le Loia sili, i se maliliega tamau mo lea tulaga, a'o fa'atalosagaina lava le fa'aitiitia o tamau o tulafono mo e asiasi mai i le atunu'u.

O le komiti laititi fo'i mo le tulaga o Malae Vaalele ma le uafu, ua latou feso'ota'i ma le pulega a le Port ina ia fa'ateleina nisi siva ma pesega fa'apea ma fa'aaliga taua i luga o le uafu i Fagatogo i le taimi e taula ai va'a laupasese tetele ma le taimi o le a tu'ua ai e i latou le tatou atunu'u.

Ua talanoaina fo'i e i latou ma le Pulega o le Port ina ia fa'aitiitia teisi a latou fa'amamafa i tulafono tau le fa'aulufale mai o tagata maimoa i le atunu’u.

O le totogi o le avea ai ma totino o le VASA ae maise o le fa'atulagaga o galuega a le VASA e ao ina mataituina ma fa'ataunu'u o le a tu'u lea i le filifiliga ma le galueaina e le latou komiti fa'afoe.

MALIU LE TURISI A'O 'AU'AU I $2 BEACH ALEGA

Ua fa'ailoa mai ma ua fa'amaonia fo'i na maliu se tasi o tama, o se turisi sa malaga mai i le meli lea fo'i fa'ato'a afea Amerika Samoa, "Celebrity Soltice" i le aso To'ona'i na te'a nei.

Ua fa'ailoa mai sa malaga fa'atasi mai lea ali'i, e 78 tausaga, ma lona to'alua.

Ua fa'ailoa mai fo'i, o le afuaga o le maliu o lenei tama matua, ona o ona gasegase tumau o maua ai. O lo'o fa'atalia nei le fanau mai Niu Sila e malaga mai e fa'agaoioia feuiuia'iga uma lava e avatu ai le tino maliu o si o latou tama i lo latou malo.

Fa'amaise le Atua i le aiga o lenei tama.