Ads by Google Ads by Google

Tala I Vaifanua


[ata: foa'i]

FIAFIA AUMUA AMATA FA'AMAONIA TOFIGA ANDREW WHEELER MO LE USEPA

 

Ua fa'aalia le agaga fiafia o le Faipule o Amerika Samoa i le Konekeresi, Aumua Amata, ina ua mae'a fa'amaonia le tofiga o Andrew Wheeler e avea ma ta'tai'i o le USEPA.

 

O Wheeler sa ia ta'ita'ia le tumau mai le USEPA talu mai ma le masina o Iulai 2018, ma o le tofiga lea a Peresetene Trump, ua fa'amaonia nei e le Senate.

 

Peita'i o le tala mai a Aumua, e tusa o lea tofiga sa ia fa'ailoa mai ai, "I le tausaga 2018, na fa'amatu'u ma pasia lelei mai ai e le USEPA le vaega tupe mo poloketi tetele ma le aoga mo Amerika Samoa. O le tau aofai o nei poloketi e lua e $11miliona. O le tasi fo'i o nei poloketi o le toe fa'aleleia lea o le Suavai Taumafa lea e fa'atautaia e le ASPA, ae o se tasi o le poloketi mo A'oga, Soifua Maloloina ma le Siosiomaga."

 

Sa ia fa'ailoa fo'i le taua o le galuega e fa'atino pea e le USEPA lea e fa'aauala mai ai tupe e fa'atino ai galuega uma a le ASEPA ina ia fa'amatagofie ma fa'aleleia le talafatai o le atunu'u, ae maise lava o apitagalu, matafaga, o alavai i taimi o tafeaga ma A'au o le gataifale.

 

Ua avea Wheeler ma ta'ita'i o le USEPA lona 15 ai lenei, ma o le a nafa fo'i o ia ma le fa'amaoniga o le tele o galuega tetele e ao ina fa'asao lelei ai le Si'omaga i Hawaii, Kalefonia ma teritori o Amerika i le Pasefika e aofia ai Amerika Samoa.

 

"O se tasi ua loa lana tautua i lea matagaluega, ma ua mautinoa lava ua masani fo'i ma taualumaga o le latou sao i setete ma teritori o lo'o latou tautuaina mo le Malo tele. O lana auaunaga sa i ai muamua o le Sui Aministrator, ona soso'o lea ma le avea ma Taitai le tumau o le USEPA talu mai Iulai 2018. Lea la e le toe tau fa'amasania o ia i galuega uma o lo'o soso'o i ai se va'ava'aigamalu a le USEPA fa'atasi ai ma ituaiga o fa'afitauli fo'i o lo'o feagai ma tatou malo fa'aatumotu o le pasefika,” o se tala lea a Aumua.

 

"O le tausaga o lumana'i nei, 2020, e fa'ailoga ai e le USEPA le atoaga o le 50 tausaga talu mai ona fa'atula'ia i le tausaga 1970 i le nofoa'iga a le afioga Peresetene Nixon ina ia latou va'ava'aia toto'a le suavai ma le ea i le Iunaite Setete o Amerika atoa, e ao fo'i ona latou puipuimalu le atunu'u ma lona talafatai ma ia fa'amalosia tulafono ma aiaiga uma e fa'asinolima i le saogalemu ma o le siomaga atoa fa'atasi ai ma le fa'atautaia ma taulamua i galuega fa'amama uma mo le siomaga i lona aotelega,” o se toe fa'atepa lea a Aumua e tusa o le amataga o le tautua a le USEPA mai lona amataga.

 

KOMITI GALULUE MATAITUINA LE PULE I LE OLA I VETERENI

 

O le Faipule o Amerika Samoa i le Konekeresi, Aumua Amata, na ia fa'ailoa lona fiafia tele i le fa'aaliga taua na fa'ailoa mai e Peresetene Trump, ona o le a ia fa'atula'ia se Komiti Fa'apitoa e latou te mataituina le tulaga o le "pule o le ola" i Vetereni po'o fitafita tuai uma o le Vaega Au a le Malo tele.

 

Ua mae'a tofia ai fo'i ma le Failautusi o le Asosi a Vetereni uma le susuga Robert Wilkie, o lea e na te ta'ita'ia lea Komiti Fa'afoe, ma fa'aaoioia uma le vasega o tautua mo Vetereni ina ia taofiofia mai le pule i le Ola.

 

Ua mae'a fa'atula'ia nei e Peresetene Trump lea faiga fou e fa'aopoopo atu i isi tautua uma ua mae'a fa'atulaga mo sui Vetereni uma a America atoa. O le Komiti Fa'afoe fo'i lenei e latou te faia fa'ai'uga, fa'atulaga gaoioiga uma e ao ina faia mo lea itu o le auaunaga mo le fa'atinoga o nei mana'oga uma mo fitafita ina ia le toe timata le upega ma ia le gaua'i e pule i o latou ola.

 

O le igoa o lea polokalama ua fa'aigoaina o le “Ala e Tima'ia ai Vetereni uma - Taofia le Pule i le Ola."

 

Ua fa'ailoa mai fo'i e le asosi o Vetereni a Amerika Samoa, ua o'o mai le fa'atulagaga lea i le tatou nei malo, aua sa auai fo'i sui uma o le VFW i le fonotaga fa'apitoa na faia i le Laumua.

 

O le laina e mafai ona e malamalama ai i lea fo'i polokalama fou ua fa'atula'ia mai ina ia fa'ataunu'u e maua lea i le https://www.veteranscrisisline.net/get-help/chat