Pago Pago - AMERIKA SAMOA

FA’AAUAU ONA TUFATUFAINA LAFOGA TOE MAUA

I se fa’aaliga mai i le Tausitupe a le malo, le susuga ia Donald Kruse, ua fa’alauiloa mai ai le fa’aauauina o le tufatufaina o lafoga toe maua, i le aso nei, e amata mai i le 8:00 i le taeao, mo i latou uma sa faila a latou lafoga i le va o Ianuari 29 ma Ianuari 31, o le tausaga nei.

Ua ta’ua i le fa’aaliga e faapea, “Mo i latou sa filifilia le teugatupe tu'usa'o ma le pusa meli o le a fa'apena na fai e pei ona fa'atalosagaina.”

E fa’aauau pea ona leai se faamatalaga e tusa ai ma lafoga na failaina i le tausaga ua tuna imo le tausaga faigaluega 2023.

TOLU TAUSAGA SOSO’O O MANUMALO IA SE TAMAITAI A’OGA MAI IAKINA I TAUVAGA SOLO FAITAUINA

E sefulu a’oga maualuluga, na aofia ai ma a’oga tuto’atasi, sa faapea ona auai i se tauvaga solo faitauina, i le aso Faraile o le vaiaso ua mavae, i le Kolisi Tu’ufa’atasi a Amerika Samoa (ASCC).

O le lona lima ai lea o tausaga o lenei tauvaga fa’aletausaga, i totonu o le teritori.  O lenei tauvaga e aofia ai le faitauina ma le fa’atinoina o solo a sui tauva.

O le tamaitai o Hazel Leo mai i le aoga maualuga a Iakina sa ia fa’aleoina ma fa’atinoina ni solo se tolu.  Ma sa faapea ona tulaga maualuga lona sao, ma ua ia toe mauaina ai le avanoa e faimalaga ai i le Laumua i Uasigitone mo se tauvaga solo fa’avaomalo, ina ua manumalo lana fa’atinoga o solo e tolu.

O Johnson Ailima mai i le aoga maualuga a Fa’asao Marist sa mauaina le tulaga lua, ae o le tulaga tolu, sa maua e Lama Jake Petelo mai i le aoga maualuga a Manu’a.

O isi solo sa maua ni fa’ailoga, na aofia ai Ulutaumamao Fuimaono mai le aoga maualuga a Samoana, Alexandra Isaako mai i le a’oga a Tafuna, Pamata Mapu mai i le aoga maualuga a Kanana Fou, Fuarosa Molesi mai, Chloey Sylveerine B. Sandi mai le aoga maualuga a le South Pacific Academy, Peau Tu’u Sila mai Fagaitua ma Ersi Tang mai le aoga maualuga a le  Pacific Horizons.

Sa amata mai i le tausaga e 2022 ona auai Hazel i lenei tauvaga i lona vasega 9 ma ia mauaina ai le tulaga tolu.  I le tausaga na soso’o ai, sa ia ausia ai le tulaga maualuga pe na manumalo ai.  Sa faapea ona ia toe umia le ipu o lenei tauvaga i le tausaga ua tuanai ma o lenei tausaga, ua fa’atolu ai nei ona ia manumalo i lenei tauvaga, i lona tausaga fa’au’u.

O le tamaitai o Hazel e malaga mai i le afioaga o Masefau ma o le lona lua o ni alo tamaitai se to’atolu a le susuga ia Alofau Leo ma le faletua ia Tala Ropeti-Leo.  Atonu o le taleni a lenei tamaitai e sau mai i lona tina ia Tala, lea sa masani ona galue o se tusitala i le Samoa News i tausaga a’oga ai o ia.

Na ta’ua e Hazel ia lona fiafia e faitau tusi a’o laititi o ia ma o le vasega muamua (first grade) sa ia a’oa’oina ai e uiga i solo ma o iina sa amata ona ola ai se fatu ua totoina i totonu o ia.  Sa le gata i lona tusia ma tu’ufa’atasia o ni solo, ae sa faapea foi ona faatinoina nei solo.

Sa tomanatunatu lenei tamaitai talavou i ana malaga e lua ua mavae atu, i le Laumua i Uasigitone D.C. ma ia ta’ua ai e faapea, o ni malaga e le gata ina avea ma lu’itau mo ia ae sa fa’atupu manatu ai foi.  Sa mafai ona ia va’ai i le ituaiga olaga o iai le setete i Uasigitone, pe a faatusatusa i le olaga to’afilemu o si ona nu’u i Masefau.

Ae e pei ona sa ia fa’asoa mai foi, le tele o ni a’oa’oga taua ua ia aoaoina mai i ana faigamalaga ma lona auai atu i le tauvaga faavaomalo, i na foi atunu’u.

FEILOAIGA A LE KOVANA MA LE LUTENA KOVANA MA LE OFISA O TUPE

O le aso Faraile, Mati 7, 2025, sa faia ai se fa’atasiga a le Ofisa o Tupe ma le afioga i le Kovana ia Pulaali’i Nikolao Pula faapea le afioga i le Lutena Kovana ia Pupulatala Ae Ae Jr., i le Fale Laumei i Utulei.

O lea fa’atasiga sa mafai ona fa’afofoga ai le pulega ma le aufaigaluega a le Ofisa o Tupe i fuafuaga ma sini faatuina a le kovana ma le lutena kovana, mo le faigamalo mo le lumanai.

I lana saunoaga faapitoa sa fa’aleoina ai e le afioga Pulaalii le agaga fa’afetai i lenei ofisa mo le valaaulia faapitoa, ona e pei ona sa ta’ua e le afioga i le kovana, o se tasi nei o ofisa taua i totonu o le malo, ona o le ofisa lenei e maua atu ai alagamanuia mo le malo atoa.  

Sa fa’aleoina foi e le afioga i le kovana le agaga fa’afetai i le Tausitupe a le malo, ona o lana taitaiga maumaututu i lenei vaitaimi faigata o feagai ma le malo, ma lana tu’uto i lana auaunaga o tagata o le atunu’u, e ala i le faatuatua ma le fa’amaoni.

Na fa’amamafaina e le kovana se tasi o lu’itau o feagai nei ma le faigamalo faapea le Ofisa o Tupe, o le fa’amautuina lea o le iai o le iai o se tupe mo totogi mo tagata faigaluega uma a le malo, lea e ta’i lua vaiaso ma faia.

Ma na ia faaleoina lona agaga fa’afetai i le faatonusili faapea le aufaigaluega mo le fa’aauauina pea ona taunu’u le totogia o tagata faigaluega a le malo, aua le tasiga o a latou aiga

Sa fa’amautuina e le kovana i lana saunoaga se tasi o poutu a le faigamalo, o le fa’amaoni.  Ma e pei ona sa ia ta’ua, o lo’o iai sona talitonuga maumututu, e tatau i tagata faigaluega uma a le malo ona fa’amaoni.

Na ia saunoa foi i fa’afitauli po o lu’itau o lo’o feagai nei ma le ofisa o tupe, le alii faatonusili, taitai galuega ma le aufaigaluega atoa, mai i isi ofisa a le malo.  Ae i sona talitonuga maumautu, afai e tumau i le lotomaualalo, lototele ma le faamaoni, aemaise ai le faatuatua i le Atua, o le a faapea ona fa’amanuiaina ia la latou auaunaga i tagata o Amerika Samoa.