Pago Pago - AMERIKA SAMOA

FILIFILIA ‘FAIAOGA O LE TAUSAGA’ A AMERIKA SAMOA I SUI TAUVA FAIAOGA FAAVAOMALO

E to’afa ni faiaoga ua filifilia mai i faiaoga uma o setete o le Iunaite settee, faapea ana teritori, o le a faia ai se fa’ai’uga a le CCSSO (Council of Chief State School Officers), e filifilia mai ai se tasi o le a avea ma Faiaoga o le Tausaga.

Mai i lea to’afa, o se tasi o i latou, o se faiaoga mai Amerika Samoa, o Mikaela Saelua, lea o lo’o a’oa’oina mataupu o le Gagana Peretania ma le Tusitala, i le aoga maualuga a Leone.

O Saelua, o lo’o ona umia se fa’ailoga o le ‘Bachelor of Arts’ mai i le Iunivesite o Kalefonia, ma le ‘Master’ i A’oa’oga mai i le Iunivesite o Hawaii, Manoa.  Ma sa avea o ia ma totino o le ‘Executive Leadership Development Program’ faapea ma le ‘National Pacific American Leadership Institute’.

Sa fa’aalia e le afioga i le sui Faipule a Amerika Samoa i totonu o le Konekeresi i Uasigitone, ia Uifaatali Amata, le agaga fa’amalo ia Saelua e tusa ai ma lenei tulaga ua ia ausia.  E le gata i lea, sa fa’aleoina e Uifaatali le agaga fa’afetai ia Saelua faapea faiaoga uma o lo’o galulue punoua’i i totonu o le Ofisa o Aoga, mo le a’oa’oina o alo ma fanau a le atunu’u.

O lo’o avea nei Saelua ma taitai o faiaoga uma o lo’o a’oa’oina ia le Gagana Peretania i Leone faapea ai ma le avea o ia ma taitaifono o le vaega ‘self-stufdy’  a le WASC (Western Association of Schools and Colleges’.

FAATONU TAGATA FAIGALUEGA FA’AMALOLO A LE MALO IA SAILI FESOASOANI MAI I LE OFISA O TAGATA FAIGALUEGA A LE MALO

I se fa’aaliga mai i le COS (Chief of Staff) a le Ofisa o le Kovana, ia Taito Ali’itasi Afuola-Mauga, ua faapea ona faatonuina ai tagata faigaluega uma a le malo ua fa’ate’a mai a latou galuega, ina ia fa’afeso’ota’i le Ofisa o Tagata Faigaluega a le malo (HR).

Sa faapea ona fa’atonuina ai foi i latou ina ia faapea ona toe fa’afo’i atu uma meatotino a le malo sa o latou fa’aaogaina mo le faatinoga o a latou galuega.

O lenei la’asaga, o se tasi lea o gaioiga a le Faigamalo fou mo le toe fa’atulagaina o le malo, e aofia ai ma le fa’aulufaleina o suafa o i latou ua filifilia e avea ma Faatonusili fou, i le Fono Faitulafono ma a latou iloiloga.

O i latou e to’atolu ua mae’a ona fa’aulufaleina o latou suafa, ua aofia ai le Komesina o le Ofisa a Leoleo, o le Faatonusili o Tina/Tamaitai ma Autalavou faapea ma le Faatonusili o le Matagaluega o Galuega Lautele.

TAUNU’U I HONIARA IA SUI TAUVA O LE PASEFIKA 2025

O le fa’ai’uga o le vaiaso na se’i mavae atu nei, na taunu’u ai i le atu Solomona ia tausala e to’avalu mai motu o le Pasefika, aua tapenapenaga mo le Tauvaga Tausala o le Pasefika 2025.

O tausala o le a faapea ona tausinio i lenei tausaga, e aofia ai Elsie Polosovai mai i le atu Solomona, o Litara Ieremia-Allan mai Samoa, Racheal Guttenbell mai Tonga, o Kimberly Tokanang mai Kiribati, o le tamaitai o May Hasola mai Papua Niu Kini, o Charlei Deiye mai Nauru, o le tamaitai o Ngatepaeru Maoate mai le atu Kuki, faapea ai ma le tausala a Amerika Samoa, o Pauliana Felise-Vitale.

Ua faapea foi ona taunu’u ma le Tausala o le Pasefika 2024-2025, mai Samoa, le tamaitai o Moemoana Safa’ato’a Schwenke.