Pago Pago - AMERIKA SAMOA

FA’AAOGA FANAU AOGA I FITI E FEAVEA’I FUALAAU FAASAINA

Sa ta’ua e le puleaoga a le aoga mo ali’i i Dilkusha, i Fiti, le tele o gaioiga e a’afia ai fualaau faasaina i totonu o le aoga.

Lipotia mai e le vaega fa’asalalau a le Fiji Times, le ta’ua e Paiata Faga Savukiono le faia o ni a latou su’esu’ega fa’afuasei, na maua ai le tele o fanau aoga, o iai ni vaega o fualaau faasainga, ma o le mafuaaga lea ua galulue so’otau’au ai le aoga ma le ofisa a leoleo.

Sa fa’ailoa mai foi e le sui minisita o a’oga, ia Iliesa Vanawalu, o le lua pasene o lipoti e 3,500 e a’afia ai fualaau faasaina i totonu o le atunu’u, e a’afia ai fanau aoga.

Ma ua amata ona si’isi’i lea fuainumera i le tolu tausaga na sei mavae atu.

FOLAFOLA MAAGIAGI I LE PUIPUIGA O TOGAVAO FAASAO MA LE FALE-O-LE-FE’E

E tusa ai ma se lipoti a le Samoa Observer, ua fa’alauiloa mai ai le folafola o le afioaga o Maagiagi, lea e tulata i le taulaga i Apia, e puipuia ia se togavao faasaoina e 114 eka faapea ma le Fale-o-le-fe’e, o se tasi o maimoaga taua o le atunu’u.

O le faaiuga o le vaiaso ua mavae, sa tatalaina ai e Maagiagi se tasi o eria faasao fou i totonu o Samoa.

Sa saunoa a le susuga ia Sootagamaalii Auelua, se tasi o matai a le afioaga, i le a’afiaga taua o lenei poloketi, e le gata i totonu o le afioaga ae faapea le siosiomaga.

O Setema 2022, sa auai ai Maagiagi i se polokalama e puipuia ai le manu, o le Manumea.

FA’ATAUTOINA ULUAI FAAMASINO TAMAITAI MAI I LE ATU MARIANA

O le vaiaso ua mavae, na faatautoina ai i le atu Mariana ia le uluai faamasino sili tamaitai mai i totonu lava o le atu Maliana, mo leisi 10 tausaga.

Na filifilia e le peresetene o Amerika ia Joe Biden, ia le tamaitai o Ramona V. Manglona, e avea ma uluai faamasino sili tamaitai mo leisi 10 tausaga o i luma, mo le Faamasinoga Faaitumalo a le NMI, i le aso 18 o Aperila.

O le tausaga e 2011 na avea ai Manglona ma faamasino feterale, ina ua filifilia ai o ia e le peresetene o Amerika i lena tausaga, ia Barak Obama.

O Manglona o le uluai tagatanu’u o le atu Mariana ua avea ma faamasino feterale.

I le 2002 sa avea ai o ia ma loia sili a lona atunu’u.

TELE FANAU ITI A’AFIA I FA’ALAVELAVE TAU TAAVALE I FITI

Lipotia mai i Fiti le a’afia o ni fanau iti e to’aiva (9) i fa’alavelave tau taavale i lenei masina, ma o se tulaga faapopoleina lea i le saogalemu o fanau iti.

I se faamatalaga a le Taitai Leoleo, o Mitieli Divuana, i le fijivillage.com, sa ia ta’ua ai le manaomia ona siitia le tulaga o le nofouta o tagata i luga o le alatele, ona  e le iloa lava tulaga o amioga a fanau i luga po o autafa foi o le auala.

Sa faamamafaina e Divuana i ave ta’avale le mata’ala i tafatafa o aoga ona o le tele o faalavelave o lo’o tutupu mai, o lo o tutupu i luga o alatele i tafatafa o aoga.

Mai i fanau e toaiva ua maliliu, e to’afa fanau na maliliu a’o savavali i luga o le altele, ae to’alima, i totonu o ta’avale.

IAI SE TALITONUGA O LE A SIITIA FUAINUMERA O GASEGASE I LE ‘DENGUE’ I SAMOA, ONA O LE SUIGA I LE TAU

Ua fa’ailoa mai e se fomai faufautua mai i Niu Sila, mai i le faalapotopotoga a le ‘Immunization Advisory Center’, le iai o se talitonuga o le a siitia le fuainumera o tagata mama’i i le faamai o le ‘dengue fever’ ona o suiga i le tau.

I sana ripoti i le va o Aperila 1-14, o lo’o ta’ua ai e le Minisita o le Soifua Maloloina a Samoa, le to’a 82 o tagata o le atunu’u, ua a’afia i lenei faamai, i le amataga o Aperila.

Ae e le o lipotia mai e le Ofisa o le Soifua Maloloina a Amerika Samoa se si’itia o le ‘dengue’ i totonu o le teritori, i le taimi nei.

FAUTUAGA SOIFUA MALOLOINA

I se fautuaga mai i le vaega a le ‘Centers for Disease Control and Prevention”, ia fa’aaoga ia faga iniseti, o la’ei lima u’umi ma ofuvae u’umi, e tineia ai namu i totonu ma fafo o maota ma laoa.

O auga masani o lenei faamai, e aofia ai le fiva, ulu tiga, tiga o tua o fofoga, maso, so’oga o le tino faapea ma ponaivi, mageso, fa’afaufau ma le pua’i.

O isi auga tuga e ao ona nofo uta ai, ina ia vave agai atu i le falemai pe a a’afia ai, e aofia ai le manava tiga, faasuati faatolu i le 24 itula, toto mai le isu po o totonu o le gutu, pua’i toto po o feau mamao (se’i tulou) ma le tino gagase.

O lo’o fautuaina mai foi le kava lelei o faamalama ma faitotoa i ‘screens’, lipea so’o se masae i ‘screens’.  Faamama so’o se mea i autafa o maota ma laoa e to’a ai le vai, e pei o pa’u taavale, pakete, mea ta’alo a fanau, o so’o se koneteina.