PASEFIKA

TAUMAFAI FITI E SAILI LE MAFUAAGA O LE GASEGASE O NI TURISI

O lo’o fa’aauau pea su’esu’ega a le malo o Fiti, i le mafua’aga na mama’i ai ni turisi sa taofia i se falemai i Coral Coast, ia Tesema.

E to’afitu turisi na a’afia i ni gasegase tuga ina ua mae’a se latou inuga i se faletalimalo ta’uta’ua a le atunu’u.

E tusa ai ma se ripoti a le vaega fa’asalalau o le ABC, sa ta’ua ai le fa’ataunu’uina o ni su’esu’ega i totonu o le falema’i i Fiti ma sa faapea foi ona fesoasoani mai ai se ofisa su’esu’e i Niu Sila (NZ Institute of Environmental Science and Research), ma ua mafai ona fa’amaonia le le a’afia o fualaau faasaina.

Na ta’ua e le Palemia o Fiti, ia Sitiveni Rabuka, lona talosagaina o le Minisita o le Soifua Maloloina faapea ma le Minisita o Turisi ina ia sailia le mafua’aga tonu o lenei fa’alavelave.

TELE GASEGASE SAMOA AVEINA ATU I INITIA

Ua mae’a nei ona sainia e le Palemia o Samoa, le afioga Fiame Naomi mata’afa ma le susuga ia Deepak Singh, le sui Faatonusili o le Medican, ia se maliliega le tumau, i le va o ni falemai se lua - Artemis Medicare Service ma le falemai a le Fortis.

E tusa ai ma ripoti a vaega faasalalau lotoifale, ua avea lenei maliliega ma tulaga ua toe fa’aopoopo mai ai nisi falemai o lo’o fesoasoani malosi i le polokalama a Samoa mo le aveina atu o a latou gasegase i atunu’u i fafo.

Na saunoa le Minisita o le Soifua Maloloina, ia Valasi Tafito Selesele, o le a avea lenei maliliega ma tulaga o le a taugofie ai talavai a tagata Samoa i Initia, pe a fa’atusatusa atu i le tau o talavai  Niu Sila.

TAUMAFAI LOIA HAWAI E SAILI MAFUA’AGA O LE MALIU O SE TEINEITITI 10 TAUSAGA

Ua taoto nei i se Faamasinoga i Hawaii ia se tagi e faasaga i se tagata faigaluega i le ofisa e mataituina le tausiga o fanau (social worker), lea ua tu’ua’ia i lona le ano i ni ripoti i le sauaina o se teineititi e 10 tausaga, lea na maliu i le tausaga ua mavae.

E maua atu lenei teineititi o lo’o saiasai ona mata ma lona ulu i se ‘duct tape’, ae ua maliu ona o le mole ma le le tausia lelei.

Sa le mafai ona tu’uina mai e le Ofisa o le ‘Human Services’ ia se latou faamatalaga e tusa ai ma lenei fa’alavelave, ina ua fesiligia lo latou ofisa e le vaega fa’asalalau a le Hawaii News Now, ona o lo’o fa’aauau pea su’esu’ega i lea mataupu.

FA’AFEILOAI ATU MICRONESIA I LE LATOU AMEPASA MAI ISARAELU

O le amataga o lenei masina sa faapea ona fa’afeiloai aloaia ai e le Peresetene o Motu o Micronesia, o Wesley Simina ia le latou amepasa mai Isaraelu, o Roi rosenblit.

Sa ta’ua e Simina le tele o ni vaega e mafai ona galulue fa’atasi ai malo e lua, e aofia ai faigafaiva, fa’asaoina o le siosiomaga, atina’eina o autalavou, fetufaa’iga tau taaloga, sikolasipi faapea le pulea o vai.