PASEFIKA

GUAM MA FUALAAU FAASAINA

Ua fa’asalalauina nei i totonu o Guam se malelega a le afioga i le Kovana o le malo, ia Lou Leon Guerrero, e faasaga i se tasi o fualaau faasaina lea e ta’ua o le Fentanyl.

Sa ta’ua e le tamaitai Kovana, e le o se mea fou i totonu o Guam ia le faasagatau i fualaau faasaina.  Ma o le fualaau lenei o le ‘fentanyl’ o se tasi o vaega o fualaau faasaina sili ona mata’utia ma e le pei o isi fualaau, aua o lea fualaau, e tasi lava le inumaga, ae maliu ai se tagata.

I le amataga o le masina o Iulai, sa ripotia mai ai e le taitai o le Ofisa o Leoleo ia Stephen Ignacio le maliliu o ni tagata se to’atolu i totonu o Guam, ona o lenei fualaau.

KAMUPANI GAOSI OKESENE I KIRIBATI

Ua fa’alauiloa mai e le Faalapotopotoga o le Soifua Maloloina a le Lalolagi (WHO) le iai o se fale gaosi okesene i le motu o Kiritimati i Kiribati, e mafai ona fa’atumuina tane okesene 24, i le 24 itula – o lona uiga, e mafai ona fesoasoani i gasegase se to’afa, e a’afia i le Koviti19.

I vaitaimi ua tuanai, sa fa’alagolago ai le falemai a Kirimati i tane okesene mai i atunu’u i fafo, e pei o le falemai i Tarawa i Saute, e pe a ma le 3000 kilomita le mamao.

Sa galulue faatasi ia le falemai ia le WHO, le Iuni a Europa, le Minisita o le Soifua Maloloina faapea falemai i Kiribati ina ia mafai ona fa’atuina lenei fale gaosi okesene i Kiritimati.

FITI MA FEMALAGAIGA

Sa fa’aalia e le sui Minisita o Fiti ia Biman Prasad le tele o auala o le a fesoasoani malosi ai faigamalaga fou lea ua fa’atulagaina nei, i le va o Nadi ma le a’ai o Dallas, i le setete o Texas i Amerika, i le malo o Fiti.

O Prasad o lo o avea foi ma fa’auluuluga o le Minisita o Tupe ma le Atina’e a le malo o Fiti, ma sa ia ta’ua le tatalaina o faitoto’a i le tele o isi tagata femalagai mai i Amerika i matu, e ala i nei femalagaiga fou.

Sa ia ta’ua foi e faapea, i le 2023, sa fesoasoani malosi vaega tau turisi i le tuputupu o le tamaoaiga o Fiti ma e 36 pasene o tagata faigaluega a le atunu’u, o lo’o galulue i galuega fa’aturisi.

NIU SILA MA GALUEGA

I le fa’aalia ai o fa’amaumauga e tusa ai ma le fuainumera o tagata e leai ni galuega i totonu o Niu Sila, i le vaiaso ua mavae, sa fa’aalia ai e le itu o Leipa a Niu Sila faapea le so’oupu a tagata o le Pasefika, e faapea, ua fa’amaonia mai i nei faamaumauga, le silia ma le 11,100 tagata Maori nai lo tagata Pasifika, e leai ni galuega, pe a faatusatusa atu i lenei vaitaimi i le tausaga ua tuanai.

O lo’o fa’aalia i nei fa’amaumauga, le aofiaga o tagata Pasifika e leai ni galuega, e 8.3 pasene.