PASEFIKA

LE AUAI ‘AU LAKAPI SAMOA I TA’ALOGA IA NOVEMA ONA O TULAGA FAALETONU I TALA O LE TUPE

O le masina ua mavae, na auina atu ai e le faalapotopotoga a le Lakapi Samoa i le komiti o lakapi faavaomalo o le lalolagi, ia se tusi, e fa’alauiloa atu ai le le auai o le ‘au lakapi a le Malo Tuto’atasi, le Manu Samoa,  i ta’amilosaga lakapi a le lalolagi lea ua faakalenaina mo le faaiuga o le tausaga.

Sa ta’ua e le Taitaifono a le Lakapi Samoa, le afioga Tuila’epa Sa’ilele Malielegaoi, ua mafua ona fa’ama’amuu le ‘au a le atunu’u mai i ta’amilosaga ia Novema, ona ua tulaga fa’aletonu le tala o le tupe, talu ai le tau leai o ni ‘sponsors’, e fesoasaoni i le faatupuina ma le faamautuina o lenei fa’agatama.

I sana tu’ualalo i le Taitaifono o Lakapi o le Lalolagi, o Sir Bill Beaumont, sa fautuaina ai e Tuila’epa nisi o auala e mafai ai ona fesoasoani mai le komiti o Lakapi o le Lalolagi ia Samoa, e aofia ai ma se fa’aopoopoga i tupe fesoasoani.  

Ae peitai, sa tali mai le so’oupu o le komiti o Lakapi o le Lalolagi, ua mafua na tula’i mai fa’afitauli tau tupe ona o fa’ai’uga faia a le iuni.

Na fa’aalia e le so’oupu le tele o tupe ua matu’u atu mo le Lakapi Samoa mai i le komiti a le Lakapi o le Lalolagi, i tausaga ta’itasi.

FILIFILI FALANI PO O AI E MAFAI ONA ULUFALE ATU I NIU KALETONIA

O lo’o Iloilo nei e Falani pe mafai ona o’o atu se asiasiga i Niu Kaletonia, ae e le’i faia, po o le taimi e mae’a ai le fonotele a taitai o le Pasefika (Pacific Island Forum PIF), i Tonga, i le faaiuga o le masina.

Sa fa’ao’oina atu e ta’ita’i o le PIF i le peresetene o le malo o Falani, o Emmanuel Macron, ia se talosaga mo se asiasiga e malaga atu i Noumea, aua le faia o se ripoti mai i itu uma o lo’o a’afia i le fa’afitauli o tupu mai nei i Papua Niu Kini.

O le aso Gafua na se’i mavae atu nei, sa faamaonia mai ai e le taitaifono fou a le PIF, le Palemia o Tonga, ia Hu’akavameiliku Siaosi Sovaleni, lona nofo faatalitali pea, mo se tali mai i Falani. Ae sa ia fa’aalia foi le taua tele o le asiasi atu o taitai o le PIF i Niu Kaletonia ae e le’i fa’ataunu’uina le fonotaga a le PIF.

Ae peitai, ua fa’alauiloa mai e le Amepasa a Falani i le Pasefika, o Veronique Roger-Lacan, o le faaiuga o lenei mataupu, e i luga lava o le malo o Falani, ona o Niu Kaletonia, o se teritori o lo’o i lalo o le va’ava’aiga a Falani.

Ua toeititi nei atoa le tolu masina talu ona tutupu mai taua ma misa i Noumea, ina ua iai se suiga faaopoopo i le Faavae a Falani, e ono a’afia ai palotaga i Niu Kaletonia, ma iai se talitonuga, e ono a’afia ai tagatanu’u o Kanak.

E to’asefulu (10) i latou ua maliliu mai i nei faalavelave ma ua ripotia mai ai foi le tu’ua e nisi o tagata le atunu’u.