Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

LIREN ZHANG

 

O le vaiaso na te’a nei na fa’agasolo ai i luma o le fa’amasinoga maualuga le tolaulauina o se maliliega ua mae’a ona sainia i le va o le malo ma se tasi o ali’i o lo o tu’uaia i le mataupu fa’asaga i le fa’aaoga fa’agaoi o Pepa Taumafa mai le Polokalame o le Food Stamp.

 

E le i mafai e le Samoa News ona maua se atoaga o lenei mataupu, ona o le iloiloga na fa’atinoina lea i totonu o le potu fa’amasino e aunoa ma le fa’afofoga i ai o tagata lautele.

 

O le aso Faraile o le vaiaso na te’a nei na tula’i ai Liren Zhang, poo Kevin fo’i e pei ona iloa ai e le to’atele mo le fofogaina lea o le latou maliliega ma le malo.

 

Sa tula’i mo Zhang le ali’i loia tua ia William Olson mai le Ofisa Loia a le RDA, ae o le ali’i loia sili lagolago ia Jason Mitchell na tula’i mo le malo.

 

Ina ua valaau le mataupu a Zhang, na tuuina mai ai loa e le afioga i le Fa’amasino Sili ia Michael Kruse sana poloaiga, e fa’atula’i ese ai tagata o lo o i totonu o le potu fa’amasino, se’i vagana ai tagata e aiga ia Zhang atoa ai ma tagata faigaluega mo itu e lua e fa’ataga ona i totonu o le potu fa’amasino.

 

Saunoa Kruse e fa’apea, o le mafua’aga e mana’omia ai le iloiloga faapitoa mo lenei mataupu, ina ia mautinoa e maua e le ua molia le avanoa mo sana fa’amasinoga iloilo talafeagai.

 

E le i mafai e le Samoa News ona maua se kopi o le maliliega ua sainia i le va o le malo ma Zhang mai le fa’amasinoga. E leai fo’i se loia na manatu e talanoa mai e uiga i lenei mataupu, pe ua talia e le fa’amasinoga le maliliega a le ua molia pe leai fo’i.

 

O Zhang, lea o lo o taofia pea i le toese i Tafuna talu mai le aso na taofia ai o ia, ina ua le mafai ona ia totogi le $450,000 na fa’atulaga e tatala ai o ia i tua, o loo molia i moliaga mamafa e 17.

 

O moliaga fa’asaga ia Zhang na alia’e mai ina ua molimauina e le polokalame a le Food Stamp se tulaga fa’aletonu i le polokalame mo le Kuata muamua o le tausaga tupe 2018. O se tasi o fa’afitauli e aofia ai le vave lea ona mae’a ona pepa taumafa sa fa’atulaga mo le polokalame.

 

Na taua i le tagi a le malo e fa’apea, tusa ma le $667,555 le aofa’i o le tupe na totogi atu e le Faletupe o le ANZ mo pepa taumafa o le kuata muamua, ma o se tulaga ua matua si’ita’i ma maualuga tele.

 

Ina ua fa’agasolo su’esu’ega a le Matagaluega o Auaunaga ma Tautua Lautele (DHSS), na manino ai loa, e tolu faleoloa ua latou maua se aofaiga tupe tele mai le Polokalame. O ia faleoloa e 3 e aofia ai faleoloa e 2 e pulea e Zhang, le faleoloa o le JFL Malae Store ma le Fast by Food Mart, ma le faleoloa lona tolu o le Harbor View Mart, e pulea e se isi tagata faipisinisi.

 

O i latou na molia e le malo i lenei mataupu e aofia ai Zhang, Vincent Toeava, faapea ai ma le tama’ita’i o Jane Vasa.

 

O loo taofia pea i le toese ia Toeava, ina ua le mafai ona ia totogi le $450,000 na fa’atulaga e tatala ai o ia i tua. O Vasa lea ua faanofovaavaaia mo le 12 masina, ina ua fa’amaonia e le fa’amasinoga fa’aitumalo le solitulafono mama o le gaoi na ia tali ioe ai.

 

SUI FAUSAIGA

 

O le aso 21 o Novema, 2018 lea ua fa’atulaga e lau ai le fa’asalaga a le ali’i o Sui Fausaiga, ina ua mae’a ona ta’usala o ia e le fa’amasinoga maualuga i le moliaga mamafa o le umia fa’asolitulafono lea o vaega o le pauta fa’asaina o le aisa.

 

O Fausaiga, lea fo’i e iloa i lona igoa o Sui Palauni, o lo o ia umia le fusi o le siamupini i fusufaga faapolofesa i Amerika Samoa. Na ulua’i tu’uaia o i ai le moliaga mamafa o le umia fa’asolitulafono o vaega o le pauta o le aisa, atoa ai ma moliaga mama e 2 o le faaoolima i le tulaga tolu, atoa ai ma le fa’atupu vevesi i nofoaga faitele.

 

Ae i lalo o se maliliega na latou sainia ma le malo ma ua talia fo’i e le faamasinoga maualuga, ua tali ioe ai le ua molia i le moliaga o le umia fa’asolitulafono o vaega o le pauta fa’asaina o le aisa.

 

I le tali ioe ai o Fausaiga i le moliaga e pei ona ta’usala ai o ia, na ia ta’utino ai e fa’apea, i se taimi o le aso 20 o Aokuso, 2017 i Amerika Samoa, sa ia umia fa’asolitulafono ai se paipa tioata sa i ai vaega o le pauta o le aisa i totonu.

 

O lo o fa’atofia pea le ua molia i le toese e fa’atali ai le aso lea ua fa’atulaga e lau ai lana fa’asalaga.