Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

BRANDON PETERSON

 

O le ali’i lea na malaga mai i le Hawaiian Airline i le masina o Me o le tausaga nei, ma aumai se fagu o loo i ai le vailaau e maua i le fualaau fa’asaina o le mariuana, ua molia nei o ia e le malo i le moliaga mamafa o le umia fa’asolitulafono o vaega o le laau fa’asaina o le mariuana.

 

O le vaiaso nei lea na fa’atoa faila ai e le malo le latou tagi fa’asaga ia Brandon Peterson, ma tula’i ai loa o ia i luma o le fa’amasinoga fa’aitumalo i le taeao o le aso Lua na te’a nei. O le tama’ita’i loia fautua lagolago ia Anna Wells na tula’i mo Peterson ae o le tama’ita’i loia sili lagolago ia Christy Dunn na tula’i mo le itu a le malo.

 

E $2,000 le tinoitupe lea ua fa’atulaga e le afioga i le ali’i Fa’amasino ia Fiti Sunia e tatala ai i tua Peterson. Afai ae mafai ona tatala o ia i tua, ua fa’asa ona ia taumafai e fa’afesoota’i molimau a le malo, fa’asa fo’i ona ia toe solia se tulafono, a ia avea o ia ma tagatanu’u lelei e tausisi i tulafono a le malo i taimi uma, ma ia auai i soo se taimi e valaau ai lana mataupu.

 

O le malaga a le Hawaiian Airline i Amerika Samoa i le aso 22 o Me o le tausaga nei, na alia’e mai ai loa le fa’alavelave e pei ona molia ai Peterson. Na fesoota’i e le sui o le Ofisa o Tiute ia David McMoore le Ofisa o Leoleo e fa’ailoa i ai se mataupu tau i fualaau fa’asaina na alia’e mai i le malaeva’alele.

 

Na taua e McMoore e fa’apea, a o fa’agasolo le la siaki masani ma le ta’ifau o Benny mai le vaega a le K-9, na fa’afuase’i ona fa’ailoa atu e Benny ia te ia se fa’ailoilo e iloa ai ua ia maua se fualaau fa’asaina. O Peterson na fa’ailoa atu i ai e Benny le fa’ailoilo.

 

Sa i totonu o le ato a Peterson se fagu o loo i ai se suavai i totonu (liquid), o lea suavai o loo i ai le vailaau o loo maua i le fualaau fa’asaina o le mariuana. Na fa’ailoa e Peterson e Leoleo e fa’apea, ua 15 tausaga o a’afia o i ai tiga o le tino, o le mafua’aga lena na te fa’aaogaina ai le vailaau lea. Sa i ai fo’i lona manatu e le fa’asaina i Amerika Samoa lea tulaga.

 

O le vaiaso fou lea ua fa’atulaga e toe valaau ai le mataupu a Peterson i luma o le fa’amasinoga.

 

TISE SAU

 

O le ali’i lea na ta’usala e le fa’amasinoga fa’aitumalo i le moliaga mama o le tete’e atu i Leoleo a o taumafai e pu’e fa’apagota o ia, ua faanofovaavaaia o ia mo le 12 masina i lalo o tuutuuga e ao ona ia usita’i i ai. O ni isi o ia tuutuuga e aofia ai lona totogiina o le salatupe e $100, aua ne’i ona toe solia se tulafono pe na te toe tagofia fo’i le ‘ava malosi poo fualaau fa’asaina.

 

O se vevesi na tula’i mai i le aso 9 Mat, 2018 i le va o Tise Sau ma ni isi o tupulaga o le nu’u, na mafua ai loa ona aga’i atu Leoleo e fa’ato’afilemu le vevesi. Na taumafai se tasi o Leoleo e pu’e faapagota Sau peita’i sa faia e ia ni gaioiga e tete’e atu ai i le Leoleo.

 

Na fa’ailoa e le afioga i le ali’i Fa’amasino ia Fiti Sunia i le ali’i ua molia e fa’apea, e laki e le i a’afia pe manu’a se Leoleo i lana gaioiga sa faia, aua o le iuga e oo ia te ia, o le molia lea i se moliaga mamafa, ma ono umi ai se taimi e fa’asala ai o ia i le toese.

 

JOHN MATAGILELE

 

Ua fautuaina e le ali’i Fa’amasino ia Fiti Sunia se ali’i talavou e 20 tausaga le matua, ina ia suia lona olaga ma usita’i i tuutuuga o lana nofovaavaaia. Ae afai na te soliina se tuutuuga o lana nofovaavaaia, o le a le toe i ai loa se isi avanoa mo ia.

 

Na tali ioe John Matagilele i le moliaga o le inupia ae lei atoa le 21 tausaga, ae solofua e le fa’amasinoga moliaga o le faaoolima i le tulaga tolu ma le fa’atupu vevesi i nofoaga faitele sa tu’uaia ai o ia. Na solofua fo’i e le fa’amasinoga le isi tagi e 2 i ai tagi a le malo sa faia fa’asaga ia Matagilele.

 

E molia Matagilele i lenei solitulafono i le masina o Mati o le tausaga nei, ae le i fa’auu mai o ia i le Vasega 12 a le Aoga Maualuga a Tafuna.

 

Na fa’ailoa e Sunia i le ua molia e fa’apea, “Ia avea lenei mataupu e fai ma aoaiga ia te oe, aua afai e le suia lou olaga ae fa’aauau pea ona e tago i le ‘ava malosi, o le a i ai se isi fa’alavelave matuia e te a’afia ai i le lumana’i.”