Ads by Google Ads by Google

Tala otooto o Fa’amasinoga

ausage@samoanews.com

SAMASONI LEAMA

 

O le ali’i e 48 tausaga le matua lea na tu’uaia e le malo i lona tagofia lea o itutinosa o se isi fafine, ua ia ta’utino i le fa’amasinoga maualuga e fa’amaonia tu’uaiga fa’asaga ia te ia.

 

Na ulua’i tu’uaia e le malo ia Samasoni Leama i moliaga mamafa e lua o lona taumafai lea e faiaiga i se isi tagata e le fa’aipoipo i ai, atoa ai ma lona tagofia o itutinosa o se tama’ita’i e le fa’aipoipo i ai i le tulaga muamua.

 

Ae i lalo o se maliliega na latou sainia ma le malo ma ua talia fo’i e le fa’amasinoga, na malie ai le ua molia e tali ioe i le moliaga mama o lona tagofia lea o itutinosa o se tama’ita’i i le tulaga lua.

 

O lea moliaga, e mafai ona fa’asala ai o ia i le toese mo le umi e le silia i le tausaga, pe fa’asala fo’i i se salatupe e le silia i le $1,000, poo le fa’asala fo’i i fa’asalaga uma ia e lua.

 

I le tali ioe ai o Lemana i lea moliaga, sa ia tautino ai e fa’apea, i se taimi o le aso 27 Oketopa, 2017, sa ia tagofia ai susu o se fafine i se auala e fa’amalie ai lagona tu’inanau sa ia te ia. Sa ia taua atili e fa’apea, sa ia tagofia susu o le tama’ita’i na a’afia e aunoa ma sona malie atoatoa i ai.

 

Talu ai ua lata i le tausaga talu ona taofia Leama i le toese i Tafuna, ua finagalo ai loa le fa’amasinoga ina ia vave tuuina atu sana faaiuga e tusa ai o lenei mataupu.

 

O le vaiaso nei lea ua fa’amoemoe le fa’amasinoga e tuuina atu ai sana faaiuga fa’asaga ia Leama.

 

MOLIA SE ALI’I I LONA FA’AOOLIMA I SE AVE PASI

 

E 41 tausaga o se ali’i mai Tafuna ua molia e le malo i moliaga mama e lua, e aofia ai le faaoolima i le tulaga tolu, atoa ai ma le moliaga o le fa’aleagaina meatotino i le tulaga tolu, e mafua mai i le fa’alavelave lea na ia fa’aoolima ai i se ali’i ave pasi, atoa ai ma lona fa’aleagaina o le telefoni a lea ali’i ave pasi.

 

Na teena e le ali’i o Vincent Valaau moliaga fa’asaga ia te ia, ina ua tula’i i luma o le fa’amasinoga fa’aitumalo i le amataga o le vaiaso nei. I lona teena ai o tu’uaiga fa’asaga ia te ia, ua fa’atulaga ai loa e le fa’amasinoga lana ulua’i iloiloga e faia lea i le fa’aiuga o le masina lenei o Aokuso.

 

Ua toe tatala nei i tua ia Valaau e aunoa ma se tupe na te totogiina, i lalo o tuutuuga e ao ona ia usita’i i ai. O ni isi o ia tuutuuga e aofia ai le fa’asa lea ona ia toe taumafai e fa’afesootai le ali’i na a’afia i soo se auala, fa’asa fo’i ona ia toe soli se tulafono a le malo, a ia avea o ia ma tagatanu’u e tausisi i tulafono i taimi uma.

 

O le po o le aso Toonai, Aokuso 4, 2018, na talosagaina ai e se ali’i se fesoasoani a le Ofisa o Leoleo i Tafuna, ona o se tagata na fa’aoolima ia te ia ao i totonu o se faleoloa.

 

Na taunu’u Leoleo i luma o le faleoloa na tula’i mai ai le fa’alavelave ma latou vaaia ai le ali’i na a’afia o loo tu i tafatafa o lana pasi, ma ona foliga o loo mu uma. Na faailoa e le ali’i na a’afia i Leoleo e fa’apea, o ia o se ave pasi, na alu atu e fa’atau se mea’ai a lana fanau, ae fa’ateia ai o ia i le tu’i o ia e se tagata e le masani ai, atoa ai ma le tago o lea tagata i lana telefoni na pau ese ma togi i luga o le auala ma malepe ai.

 

O ni tagata sa i ai i le taimi o le fa’alavelave latou te masani i le ali’i o Valaau, na latou fa’asino i Leoleo le fale a le ua molia, ma aga’i atu ai loa Leoleo ma saili o ia, ma maua atu ai i le isi pitonu’u o Tafuna.

 

Na taua e Valaau i Leoleo e fa’apea, na mafua ona ia tu’iina foliga o le ave pasi, ona o le ali’i lea o loo ia fa’alogo e masani ona telefoni atu i le uso o lona to’alua. O le mafua’aga fo’i lena sa ia fa’aleagaina ai le telefoni a le ave pasi, ina ia aua ai ne’i toe vili atu o ia i le uso o lona to’alua.