Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

TOTOGI E LE LEOLEO LE SALA A LE AVE TA’AVALE

 

Na avea le fa’atamala o le tama’ita’i Leoleo sinia ia Margie Alofaituli e tuuina atu i le fa’amasinoga le kopi o le pepa sala sa ia tuuina atu i se ave ta’avale, ma itu na fa’atonu ai loa e le afioga i le alii Fa’amasino ia Fiti Sunia o ia na te totogi le sala e $75 sa tatau ona totogi e le ave ta’avale.

 

O le vaiaso na te’a nei na valaau ai le mataupu a Avatonu Tia i luma o le fa’amasinoga, ona o tu’uaiga i lona le usitaia lea o tulafono tau ta’avale afi. Ina ua valaau le mataupu a Tia, sa auai o ia mo lea iloiloga, peita’i o le fa’afitauli sa tula’i mai, e leai ni fa’amaumauga a le fa’amasinoga e fa’atatau i le solitulafono i luga o le alatele fa’asaga ia te ia, ona e lei tuuina atu e le Leoleo sa sainia le pepa sala le kopi o le pepa sala i luma o le fa’amasinoga.

 

Ona o lea tulaga, na fa’atonu ai loa e le fa’amasinoga le tama’ita’i Leoleo ia Alofaituli ina ia oo atu i luma o le fa’amasinoga e fa’ailoa atu le mafua’aga na ala ai ona ia le tuuina atu le kopi o le pepa sala.

 

O le aso Faraile na te’a nei na tula’i ai Alofaituli i luma o le fa’amasinoga. Ina ua fesiligia o ia e Sunia, sa ia fa’ailoa ai e fa’apea, ua galo ia te ia ona tuuina atu le kopi o le pepa sala i luma o le fa’amasinoga.

 

Ona o lea tulaga, na fa’atonuina ai loa e Sunia o ia na te totogi le $75 lea sa tatau ona totogi e Tia e tusa ai o lona le usitaia o tulafono i luga o le alatele.

 

RON ALBERT MAUGA

 

O le aso 5 o Setema lea ua fa’atulaga e lau ai le fa’asalaga a le ali’i o Ron Albert Mauga i luma o le fa’amasinoga maualuga, i le mae’a ai lea ona ta’usala o ia i le solitulafono o lona taumafai lea e talepe se fale i le tulaga lua.

 

I le tali ioe ai o Mauga i le moliaga e pei ona ta’usala ai o ia e le fa’amasinoga, sa ia tautino ai fa’apea, i se taimi o le aso 5 Oketopa, 2017, sa ia taumafai ai ma lona fa’amoemoe e talepe se fale o se aiga ina ia fa’atino ai se solitulafono i totonu. Peita’i o le mea sa tupu, e ese le fale o le aiga na ia aga’i i ai ma se agaese.

 

O le talia ai e le fa’amasinoga o le tali ioe a le ua molia, na solofua ai loa le moliaga mamafa o le tete’e atu i Leoleo a o taumafai e pu’e fa’apagota o ia.

 

O lo o taofia pea Mauga i le toese i Tafuna e fa’atali ai le aso e lau ai lona fa’asalaga.

 

SUI TAGO JR

 

O le aso 18 Oketopa o le tausaga nei lea ua fa’atulaga e toe tula’i ai le ali’i o Sui Tago Jr i luma o le fa’amasinoga maualuga mo lana ulua’i iloiloga, i le mae’a ai lea ona ia teena o le moliaga mamafa o loo tuuaia ai o ia e le malo i le aso Gafua na te’a nei.

 

O Tago Jr o loo tu’uaia i le moliaga mamafa o le umia fa’asolitulafono lea o vaega o le pauta fa’asaina o le aisa. O lea moliaga na alia’e mai ina ua maua e Leoleo se pepa iila i le taga o lona ofu sa faia o loo i ai vaega o le pauta o le aisa.

 

O Tago Jr, o le isi lea e to’atolu i ai latou na pu’e fa’apagota mai e Leoleo, ina ua latou osofaia ni nofoaga se 2 i le masina o Iulai na te’a nei. O ia nofoaga e aofia ai se fale i Petesa, atoa ai ma le ta’avale a se tagata sa paka i luma o se faleoloa.

 

O isi ali’i e to’alua o lo o tu’uaia fa’atasi ma Tago Jr e aofia ai Misi Siua ma Henry O’Brien.

 

Ina ua fesiligia e Leoleo ia Tago Jr, sa ia ta’utino ai e fa’apea, o laua sa malaga ma Siua e momoli le fa’atau o fualaau fa’asaina a le isi tagata i Vaitogi. Sa ia taua atili e fa’apea, ua silia ma le 4 masina talu ona ia fesoasoani ia Siua i le tuleiina atu o fualaau fa’asaina i tagata lautele.

 

O lo o taofia pea Tago Jr i le toese ina ua le mafai ona ia totogi le $5,000 lea na fa’atulaga e le fa’maasinoga e tatala ai o ia i tua.