Pago Pago - AMERIKA SAMOA

FESILIGIA E LE SENATE IA TAITAI A LE LBJ MA LE OFISA O LE SOIFUA MALOLOINA I TULAGA O AUAUNAGA I LE POTU FA'AMAMA TOTO

I le iloiloga a le Senate ma taitai o le LBJ faapea ma le Ofisa o le Soifua Maloloina, i le aso Lua, Mati 18, 2025, sa su’esu’eina ai e afioga i Senatoa ia ni mataupu e tusa ai ma le auaunaga i totonu o le potu fa’amama toto a le falemai.

O taitai o le falemai ma le ofisa o le soifua maloloina, na auai i lea iloiloga, na aofia ai le Taitaifono o le Komiti Faafoe a le LBJ ia Mualeava Dr. Aifili John Tufa, o le Pulesili a le LBJ ia Magele Scott Anesi, o le CMO a le LBJ ia Dr. James Sunia, ma le Faatonusili a le Ofisa o le Soifua Maloloina ia Dr. Saipale Fuimaono.

Na patino lava le vaega o lenei su’esu’ega, ona o se tusi  mai i le afioga Lolo M. Moliga, lea sa avea ma kovana, sa fa’ao’oina atu i le afioga i le Kovana Pulaalii Nikolao Pula ma le afioga i le Lutena Kovana Pulumataala Ae Ae Jr. Pulu, e tusa ai ma tulaga faaletonu i le auaunaga a le falemai i gasegase o lo’o fai a latou talavai fa’amama toto.

I le tusi a Lolo sa tusia ia Mati 12, 2025, sa fa’aalia ai e Lolo lona le fiafia e tusa ai ma le le toe iai o se auaunaga fa’atelevise, i totonu o le potu talavai faamama toto.  Ona i sona talitonuga, o se tasi lenei o auaunaga taua e mafai ona fesoasoani e fa’ato’afilemu ai le mafaufau o gasegase o lo’o faimalaga atu mo a latou talavai.

Sa faapea ona fa’ao’oina atu foi kopi o le tusi a Lolo, i le Peresetene o le Senate, le afioga i le Senatoa ia Tuaolo Manaia Fruean, o le afioga i le Fofoga Fetalai ia Savali Talavou Ale, o le Faatonusili a le LBJ ia Scott Anesi faapea le Faatonusili a le ASTCA, ia Chuck Leota.

Na fa’aalia e Lolo i le amataga o lana tusi, le avea o ia o se tasi o le toatele o lo’o fa’alagolago i le auaunaga a le potu talavai fa’amama toto, mo le fa’asaoina o latou soifua. Sa ia ta’ua foi lona fa’aaluina o itula e fa pe lima, i ana talavai.  Ma sa ia momoli le agaga fa’afetai i tausimai ma fomai o lo’o galulue punouai i totonu o le potu fa’amama toto.

Sa ta’ua e le afioga Lolo e faapea, o lenei talavai, o se tulaga fa’avaivai loto, fa’afefe tagata ma se tulaga fa’anoanoa.  Ma o le mafuaaga lea na toe fa’afouina ai lenei potu talavai, ina ia mafai ona avea ma fa’amalosi’au, fa’afiafia ma fa’alototeleina ai i latou o lo’o agai atu mo a latou talavai.  

O le mafuaaga foi lea sa tuuina iai ma televise, ina ia mafai ona fa’afiafia ai i latou, i le fa i le lima itula lea o lo’o faia ai a latou talavai, mo le fa’amamaina o le toto.

Ae peitai, sa ta’ua e le afioga i le kovana malolo, talu mai lava le amataga o lenei tausaga, ua le toe ola nei televise, ona ua le totogia pili mo lea auaunaga.

Na ta’ua e Lolo le taulagaina o le soifua maloloina fa’alemafaufau ma le fa’aletino o i latou o lo’o faia a latou talavai i potu fa’amama toto, ona ua pa’u i taitai o le LBJ ona fa’afoeina lelei le galuega i le falemai.

Sa tu’ua’ia foi e le afioga Lolo ia le pulega a le LBJ, i le le faatinoina o latou tiute.  Ona e ui lava ina i le le mafai ona totogi pili mo lea auaunaga, ae e le o motusia ona maua e le komiti fa’afoe a latou alauni fa’alemasina – lea sa ia ta’ua, o ni peimeni o lo’o solia ai le tulafono.

Ua faapea foi ona fa’asaga le to’asa a le afioga i le kovana malolo, i le Faatonusili a le ASTCA ma lana pulega, ma tu’ua’ia i latou i lo latou le alolofa, e ala i le taofia o lenei auaunaga mo le potu talavai faamama toto.

Sa faapea ona ia ta’ua ia fuafuaga tetele a le ASTCA lea sa faia i Samoa, faapea ma nisi o a latou fuafuaga, ua fa’aaluina ai le faitau afe o tupe, ae peitai, ua o latou manatu mama i le tulaga o le soifua maloloina ma lagona o gasegase i totonu o le potu talavai faamama toto.  Na ta’ua foi e Lolo ia le tetele o ponesi ua fa’apea ona maua e le komiti faafoe a le ofisa telefoni a le malo.

Sa fa’aalia foi e Lolo e faapea, e ui ina iai se manatu i taitai o le malo, e le talafeagai lana talosaga mo se televise ma auaunaga tau initeneti mo nofoaga o lo’o tautuaina tagata matutua (65 agai i luga) o le atun’u, ae peitai, o le tautua a nei tagata matutua, na paeina ai le ala, lea ua o tatou o’o mai i nei vaitaimi.

Ma o le iai o ni televise maua fua ma auaunaga tau initeneti i nofoaga lautele po o nofoaga ‘private’, o lo’o tautuaina le mamalu o tama ma tina matutua, o sina fa’ailo lea o le agaga fa’afetai mo la latou tautua.  

Na faapea ona fesiligia e le Peresetene o le Senate, le afioga ia Tuaolo Manaia Fruean, ia le taitaifono o le LBJ, e tusa ai ma lenei mataupu ua fa’atula’i mai e Lolo.

Sa tali mai le susuga ia Mualeava, e tusa ai ma se ripoti mai i le faatonusili o le LBJ, ia Scott Anesi, na iai sina taimi na taofia ai lea auaunaga, ona o sui i ofisa televise, lea sa sui mai i le Bluesky, i le ASTCA, ina ia aua ne’i toe motu lea auaunaga.  Ae o lea ua toe fa’aauau lea auaunaga.

Na faamanino atili e Anesi e faapea, e 14 televise lea ua fa’aaogaina i totonu o le potu fa’amama toto, ae peitai, sa iai sina faafitauli na feagai ma le fa’apipi’iina o nei televise.  Ae o lea ua mafai ona fofoina le faafitauli, ae ua na o le lima televise o lo’o mafai ona fa’aaoga.  Ma o le taimi nei, o lo’o galulue pea le latou aufaigaluega ina ia mafai ona fa’aola ma leisi 9 o totoe.  A le mafai, o le a faapea ona toe faatauina nisi televise fou.

Sa toe fesili Lolo pe iai se moni i le tusi a Lolo e tusa ai ma le taofia o lea auaunaga, on aua le mafai ona totogia pili a le falemai.  Na te’ena e Anesi lea tu’uaiga, ma ia saunoa mai, na mafua ona afaina lea auaunaga, ona o tulaga ‘technical’ ae le o se tulaga i tupe.

Na toe fesili foi Lolo pe aisea e le o’o atu ai lea auaunaga i vaega uma o le falemai.  Ma ia faamatalaina le faalua ona taofia o ia i le falemai, ma sa pei o la e loka i se falepuipui, ona e na o le taoto i le moega ma sioa i puipui ma le fa’alo o le falemai mo le valu itula, e faatalitali ai ana tui.  Ma sa ia ta’ua e faapea, o se vaega mamafa fa’alemafaufau lea tulaga.

E le gata i lea, sa famamafaina foi e le peresetene o le senate, le manaomia tele o lea auaunaga i totonu o le ER, aua le umi lea e faatalitali ai tagata o le atunu’u, mo se foma’i.  Sa fa’aalia e Lolo lona fa’asea i le leai o lea auaunaga manaomia i totonu o le falemai, aemaise ai, o lo’o lava le tupe e fa’atino ai lea tulaga.

Na lagolagoina e Mualeava ia le manatu fa’aalia a le peresetene o le Senate ma sa ia ta’ua le iai o TV i nisi o vaega o le falemai, ae o lo’o ua iai se fuafuaga fa’ata’atia, mo le fa’ao’oina atu o lea auaunaga, i vaega uma o le falemai.

Ae peitai, ina ua saunoa le afioga i le Senatoa ia Tuana’itau Malagi Togiola, o se tasi o gasegase faamama toto, sa ia ta’ua ai e faapea, e na te le’i va’ai lava i se televise, i le potu o lo’o fai ai ana talavai faamama toto.

E le gata i lea, sa saunoa foi Tuana’itau, e tusa a ma se fa’alavelave na tula’i mai i le aso Lua o le vaiaso ua tuanai, a’o faia lana talavai, lea na pe so’o ai le eletise a le falemai.  Sa ia ta’ua ai e faapea, “E toe ola mai, ae pe a ma se lima pe sefulu minute, ae toe pe.  Na ou fai atu loa i le teine fomai, ua lava.” (O lona uiga, ia fa’amuta loa lana talavai).  Ma sa faapea foi ona faia e nisi gasegase sa o latou iai faatasi i totonu o le potu fa’amama toto i lea aso.

Ma na saunoa Tuana’itau, e tusa ai ma se ripoti na o’o atu ia te ia, i le mafuaaga o lea fa’afitauli, ona e le gafatia e le malosi o le afi (generator) lea o lo’o iai a le falemai, ona tauave ia masini a le falemai.

Sa faamanino mai e Mualeava, sa le’i soso’oina le afi fa’aleoleo i le afi autu a le falemai.  Ae ua mae’a ona fofoina lea fa’afitauli.  Ma sa ia fa’ailoa atu foi i afioga i senatoa, le le’i a’afia o le falemai i le taimi lea na pe ai le eletise mo le lima itula.  Ma e le gata i lea,  o lo’o ua mae’a ona okaina se afi fou a le falemai.

Sa fia malamalama afioga i Senatoa i tofiga fou i totonu o le ofisa a le kovana, lea na ta’ua e le faatonusili o le ofisa o tagata faigaluega a le malo (HR), o Faatonusili ma Faufautua sinia, faapea ma o latou totogi, o vaegatupe o lo’o fa’aagaga mo nei galuega fou faapea ma o latou tiute.

Na saunoa nisi o afioga i Senatoa, ua fai sina mamafa o le malo, ma e foliga mai o le kapeneta a le kovana, o ‘middlemen’ ae le o ni faatonu pasia.

O le susuga i le Tausitupe ia Donald Kruse, o le Faatonusili a le HR ia Tiaoalii Dr. Asenati Saau-Umi faapea le sui Faatonu o le Ofisa o Tupe Faasoasoa ia Aukuso Saatia, sa avea ma molimau o lenei iloiloga, i lalo o le taitaiga a le susuga i le taitaifono, le afioga i le Senatoa ia Utu Sila Poasa.

I lana saunoaga amata na ta’ua ai e le afioga Utu le agaga o le iloiloga, ona o le fia malamalama o afioga i Senatoa, i le tulaga o tupe a le malo ma nisi o mataupu, ae e le’i malolo le Fono, ae le o se agaga fa’asinosino lima.

(O lea ua malolo nei le Fono se’ia o’o ia Iulai, ae e pei ona ta’ua e Utu, o le a fa’aauau pea a latou galuega.)

O le afioga i le alii Senatoa ia Magalei Logovi’i sa tu’uina iai le avanoa muamua ma na ia fesiligia le faatonu o le HR pe fia ni faatonusili (executive directors) i luga o le ofisa a le kovana.  Na tali Tiaoalii, e to’alua, ae ono Faufautua (Executive Advisors-EA).  O faatonu e toalua, e ta’i $80,000 o latou totogi, ae e to’alima EA e ta’i $75,000 ae to’atasi, e $100,000 lona totogi.

Na tulitatao mai e Magalei le tali a Tiaoalii ma ia fesiligia le faatonu pe ua sili atu le totogi a le EA (lea e $100,000 lona totogi), i lo le totogi a le Lutena Kovana.  Sa tali Tiaoalii, na ia fesiligia le ofisa o le kovana e tusa ai ma lea tulaga, ae na fa’ailoa atu, o se tulaga na finagalo ai le kovana ma o ia e tali i le kovana.

(I le talanoaina o lenei mataupu, sa le’i ta’ua e Tiaoalii ia suafa o i latou e to’avalu (ED & EA), ae sa ia ta’ua, o le tagata lea o lo’o totogi $100,000 o le Faufautua tau tupe.  Ina ua su’esu’eina e le Samoa News ia le siata o tofiga a le malo, ma iloa ai o Brett Butler le Faufautua tau tupe.  Ma o ofisa o lo’o i lalo o lana va’ava’aiga, e aofia ai le Ofisa o Tupe, Paketi, Ofisa o Faatauga, Ofisa Su’etusi, Ofisa e mataituina meatotino a le malo, ASEDA, OFIA, ARPA ma le CP/SP.)

Sa saunoa Kruse, ua mae’a ona ia fa’aleoina i le kovana lona le auai i le tulaga o ‘middleman’, po o se so’oupu, i le va o ia ma le kovana.  Aua e pei ona ta’ua e Kruse, i lona malamalama ai i le fa’agasologa, e amata mai i le kovana, lutena kovana, faatonu o le kapeneta, e aunoa ma ni ED po o ni EA i le ogatotonu.

Na fesiligia le afioga i le senatoa ia Togiola T.A. Tulafono po o ai e fa’atulagaina (classified) ia galuega ia.  Sa tali Tiaoalii, o tofiga filifilia a le kovana (political appointees), ae peitai, sa toe faamanino mai e Togiola, o lo’o fia manino i le faatulagaga (classifications).  Sa fesiligia e le afioga i le senatoa ia le tamaitai faatonu, pe sa ia tagai i tiute (job descriptions) a i latou ia.

Sa saunoa Togiola, atonu o ripoti ia e manaomia ona ‘subpoena’ e mafai ona maua mai ai.

Ona fesiligia lea e Togiola tiute patino a ED ma EA, lea na tali mai ai Tiaoalii, o i latou ia e fesoasoani i faatonusili ma ofisa, ina ia ausia a latou sini ma misiona.  Ma o se faataitaiga sa ia faaleoina, o siitaga a le aufaigaluega a le Ofisa o Aoga, lea ua iloiloina nei e ED ma EA.

O se tulaga na saunoa ai le afioga i le Senatoa, e foliga mai e le o toe iai ni fesootaiga i le va o faatonu ma faatonu, “ae fa’aaoga EA o latou e faia fesootaiga lea i le va o faatonu ma matagaluega?”

Ae peitai, sa faamanino mai e Tiaoalii, o ED/EA e pei o ni tagata tamomo’e (runners), e fesoasoani atili i le faatonu.  Peitai, sa saunoa mai Togiola, a savali pei o se pato, leo i le pato, atonu o se pato.  Ma na saunoa Togiola, ua tele ni fa’asea ua o’o atu e tusa ai ma lenei tulaga, ona ua gaosia ai ni pa pupuni faaopoopo.

Na toe saunoa mai Kruse, “O le afioga i le kovana, o lo’u ‘posi’ (boss) lea, ae iai foi la’u matafaioi o le faufautua.  Ua uma foi la na ave iai fautuaga i le tulaga lea.  E pule lava le afioga i le kovana.  Ae i sa’u iloa mitimiti, e le fetaui ma le tulafono le mea lea ua tupu.  E pau le mea lea e i totonu o le tulafono, Kovana, Directors, o lana kapeneta lea.”   

Sa faapea loa ona fesiligia e le afioga Togiola ia le sui faatonu o le Ofisa o Paketi, ia Aukuso Saatia, po o faapefea ona totogi ia tofiga fou nei e to’avalu ona e leai se tupe fa’asoasoa na faia faapitoa mo ituaiga galuega ia.  Na fa’amanino mai e Saatia e faapea, o le totogi mo i latu nei, e ta’i i tua i le saunoaga a le kovana i le tatalaga o le fono, lea sa ia ta’ua ai le iai o se fetuuna’iga i tofiga i totonu o le ofisa o le kovana, o lona uiga, e leai se vaegatupe fou o fa’aaogaina.

Ae sa toe saunoa mai Togiola, na saunoa le kovana i lana saunoaga lava lea e tasi, o le a iai se ‘shortfall’ i tupe a le malo e $55 miliona, i tupe aoina lotoifale, lea o lo’o avea ma popolega i le Senate.  Ma ia fesiligia ai le sui faatonu, po o iai se fuafuaga a le malo, ina ia faapaleni le paketi ae e le’i o’o i le faaiuga o le tausaga tupe 2025.

Sa fa’ailoa mai e Saatia le feololo o tupe aoina ma le fesoasoani tele o le 10% ‘cost containment’ lea na faamalosia e le kovana.  Na toe fesili Togiola pe ua mafai ona fa’aatoa e tupe aoina i le kuata lua ia tupe sioti o le kuata muamua.  Ae peitai, sa tali mai Satia, e na o fuainumera e le’i mafai ona fa’amaonia, o lo’o ia umia ma e le mafai ona ia tali mai i le fesili a le afioga i le senatoa.

Na toe faamanatu atu e Togiola i molimau ina ia fa’amaoni i a latou tali, aua e na te tulitulia lava a latou tali. 

Sa fa’auilavea Kruse ma ia toe faamanatu mai i afioga i Senatoa, e fa’ato’a faamuta le kuata lua ia Aperila 15.  Ae o lo’o ua amata tulaga lelei le tala o le tupe.  Sa ia fa’amaonia foi le saunoaga a Saatia i le tulaga lelei o fuainumera o iai nei, ae e le mafai ona tu’uina mai se fuainumera ma’oti, ona o lea e le’i uma le kuata lua.

Na toe tulitatao mai e le afioga i le Senatoa Gaoteote Palaie Tofau, ia le tulaga i galuega fou e valu ia o lo’o i luga o le ofisa a le kovana, e faapea, ua tele pule ae toalaiti le aufaigaluega.  Ma na ia ta’ua e faapea, o tofiga nei e le’i pasia ma e le fesiligia e le Fono ia latou, na’o faatonu.

Ma sa ta’ua foi e Gaoteote ia le le totogia o pili, ae o lo’o saunoa molimau a le malo, o lo’o tele tupe.  Sa fa’atatau le saunoaga a le afioga i le Senatoa i le aitalafu a le malo i le tupe o le Ritaea faapea ma lafoga toe totogi a tagata.  Sa ia fautuaina ia taitai o le malo ina ia totogi a latou pili.

E tusa ai ma ED ma EA, sa fia malamalama le afioga i le Senatoa, po o ai le ‘boss’ moni?  O i latou ia o lo’o mana’o le Fono e talia a latou fesili.

Sa fesiligia e le afioga i le Senatoa ia Olo Uluao Letuli ia le faatonu o le HR, po o ai sa pasiaina totogi o le EA e $100,000.  Na tali le tamaitai faaotnu, na pasia e le faatonu o le ofisa o paketi ma le kovana.  Ma na saunoa le afioga i le Senatoa, e le logolelei lea tulaga i lana faafofoga ma e fa’aalia ai le le fa’aaloalo i le lutena kovana.