Ads by Google Ads by Google

TALA MAI SAMOA


[ata: foa'i]

PASEFIKA

MALIU SE TAMAITITI INA UA SIPAKA I LE UILA

O le fa’ai’uga o le vaiaso na se’i mavae atu nei, ua fa’amaonia mai e le Komesina a Leoleo i Samoa, na maliu ai se tamaititi 19 tausaga mai i le afioaga o Solosolo, ina ua ia taumafai e ave’ese se pou moli.

Na saunoa  le susuga ia Auapaau Logoitino Filipo, o lo’o masalomia le malilu o lenei tamaititi, ona ua ui la i se laina eletise.

Sa feaveai i luga o upega tafa’ilagi i le po o le aso Faraile ia ata o le taimi na tupu ai lenei faalavelave, lea na va’aia ai le ta’atia o le tamaititi i autafa o le auala, a’o faalava ni uaea eletise i ona luga.

Na agai atu sui o le Vaega Tineimu faapea ma Leoleo i le nofoaga na tupu ai le faalavelave ma o lo’o iai se talitonuga, sa le’i mafai ona o’o atu tagata o le aiga o le ua maliu mo se lavea’iga, ona o le puipuiga o le saogalemu.

O lo’o iai se talitonuga, ona o le malosi o le savaili i lea afiafi, na pa’u ai se pou moli.  Ma sa faatalia le vaega a le Eletise ina ia tape mai le eletise.

O le suafa o le ua maliu, o Iosefa Viliamu Sealiinuu Siaosi, po o ‘Jamu’.

TALI LA’AULI LEUATEA SCHMIDT I LE FAATONUGA MO LE FAATE’AINA O IA

I se ripoti mai i  le Leitio Niu Sila (RNZ), ua fa’aalia mai ai le taliaina e le susuga ia La’auliolemalietoa Leuatea Schmidt, lea sa avea ma Minisita o Faatoaga ma Faigavafaiva i Samoa, ia se fa’ai’uga a le Palemia o Samoa, le afioga Fiame Naomi Mata’afa, lea ua fa’ate’aina ai o ia mai i lona tofiga i totonu o le malo.

O le susuga ia La’auli, o le taitaifono foi a le itu a le Faatuatua i le Atua Samoa ua Tasi (F.A.S.T), ma ua mafua le fa’ate’aina o ia, ona o ni moliaga ua feagai ma ia.

Sa faaleoina e La’auli i luga o upega tafa’ilagi ia lona agaga fa’afetai i e o lo’o lagolagoina o ia ma o lo’o taofimau pea i lona mama mai i moliaga e pei ona tu’ua’ia ai o ia.

Ma sa ia saunoa mai foi e faapea, o le a feiloai i luma o le faamasinoga, e fa’ailoa mai ai le mea moni.

Na fa’amanino mai e le susuga ia Auapa’au Logoitino Filipo ia moliaga ua faia faasaga ia La’auli, e aofia ai faitauga e tolu, i le taupulepule ma le taumafai e taofia fa’agasologa o le faamasinoga.  Taupulepulega ina ia solia le Tulafono (fausia o ni molimau).

E le gata i lea, o moliaga i sauaga e ala i le fa’aaogaina o upe tafailagi.  E tolu foi ni faitauga i le faia o ni faamatalaga sese, ua a’afia pe ta’uleagaina ai se tagata.  Ma faitauga e lua o le lafoina o ni faamatalaga ma se faamoemoega e talepeina ai le filemu.

TOE TATALA FEMALAGAIGA I LUGA O LE SAMI

O le aso Sa i Samoa (aso To’onai i Amerika Samoa) sa toe amatalia ai femalagaiga i luga o le sami i Samoa, talu ona tapunia ona o tulaga faaletonu i tala o le tau, ona o matagi malolosi faapea le sou o le vasa.

Sa fa’aalia le agaga fiafia o le mamalu lautele ina ua toe tatalaina femalagaiga, e le gata i le uafu i Salelologa ma Mulifanua ae faapea foi le uafu i Matautu.

I se fa’asoa mai a le susuga ia Taimua Toa, i le Samoa Observer, sa ia fa’aalia ai se popolega ia te ia, ina ua tapunia femalagaiga i le va o Upolu ma Savaii, a’o iai o ia i Savaii ae o lo’o fuafua e toe faimalaga atu i lona aiga i Ausetalia i le aso Gafua.

Sa ia faamatalaina lo latou nofonofo i le uafu i Salelologa i le po o le aso Toonai ma isi tagata, ma na alu lena po atoa, o fai pesepesega faaleagaga a i latou sa i le uafu.  E le gata i lea, o talosaga molia, lea sa ta’ua e Toa, o se tulaga o le a le toe galo ia te ia ma o le a mafai ona toe fo’i ma ia lea a’oa’oga, i le mamana o talosaga.