SAMOA

FAATONUINA LE FAIA O SU’ESU’EGA O LE MAFAUFAU MO LE UA MOLIA I LE FASIOTI TAGATA

Ua toe suia nei le mafaufau o Papalii Sia Catherine Figiel, lea o lo’o molia i le fasioti tagata, ina ia fa’aauau pea le tautua a lana loia, mo ia, faapea ma lona ioe e auai i suesuega o le mafaufau.

Sa fa’amaonia mai lea tulaga e le tamaitai loia o Unasa Iuni Sapolu, lea ua toe tula’i mo Papalii, i luma o le Faamasinoga Maualuga, i le amataga o le vaiaso.

Na ta’ua foi e Unasa le mae’a ona faaulufaleina o se talosaga mo le faia o suesuega o le mafaufau mo Papalii, ma ua faapea ona taliaina lea talosaga, e le itu a le malo.

E lua ni tagata o le a faapea ona faataunu’uina lenei su’esu’ega, e pei ona sa fa’ailoa mai e Unasa.  O le tasi, o se tausimai, ae o leisi, o se foma’i o le mafaufau (psychiatrist).

Ma na faapea foi ona faauluina e Unasa seisi talosaga mo le taofia o lenei mataupu mai i vaega faasalalau – ae peitai, ua toe ave i tua lea talosaga.

Na talia e le afioga i le Faamasino Sili ia Vui Clarence Nelson, ia le talosaga mo se su’esu’ega o le mafaufau mo Papalii, ma e tolu vaiaso ua tu’uina mai e faia ai nei su’esu’ega.

O lo’o fa’aauau pea ona taofia Papalii i le to’ese, e faatalitali ai leisi ona faamasinoga, e tali ai ona moliaga o le fasioti tagata, ona o se faalavelave na tulai mai, lea na maliu ai le tamaitai polofesa ia Dr. Caroline Sinavaiana Gabbard.

MALIU SE TAMA MAI SAMOA I SE FAALAVELAVE TAU TAAVALE I AUSETALIA

Ua faamaonia mai nei le maliu o le susuga ia Siu Manu, i Ausetalia, ona o se faalavelave tau ta’avale na tula’i mai i le amataga o le vaiaso, lea na maliliu ai ni tagata se to’alua ma manunu’a ai ni tagata se to’aiva.

O le susuga ia Manu sa malaga atu i Ausetalia, o se tasi o tagata faigaluega i galuega fa’avaitaimi ma o le to’atele o le pasese na i totonu o le pasi, o tagata faigaluega faavaitaimi mai fafo atu o Ausetalia.

Na salalau i luga o upega tafailagi ia nisi o ata vitio sa pu’eina i le taimi na tupu ai le faalavelave.  Ma sa va’aia ai le toatele o tagata faigaluega sa i totonu o le pasi, na taumafai e feosofi mai i fafo, ina ua lavea le pasi.

Sa va’aia ai foi le ta’atia o se tasi o alii faigaluega i tafaala ma le leo o se tamaitai o faapea mai, talanoa iai, faamafanafana o ia.

I se fa’aaliga mai i le ofisa leoleo a le a’ai o Victoria lea na tupu ai le faalavelave, na ta’ua ai le fa’aauau pea o su’esu’ega a leoleo i le mafua’aga tonu na tupu ai lenei faalavelave.

Ae sa ta’ua e se alii leoleo sinia, o Mark McDonald, i le aso Lua lea na tupu ai le faalavelave, o lo’o iai se talitonuga i lo latou ofisa, na taumafai le pasi e sikipi le taavale sa i ona luma.  O lo’o fesoasoani foi le aveta’avale o le taavale lea na i luma o le pasi, faatasi ma nisi aveta’avale sa molimauina le fa’alavelave, i le ofisa a leoleo ma la latou su’esu’ega.

MOLIA NI ALII SE TO’ALUA MAI TOAMUA I FUALAAU FAASAINA

E to’afa i latou sa lokaina e leoleo i le osofaiga fa’afuase’i a leoleo, na faia i se fale i Toamua-uta ia Me 2023, lea na mauaina mai ai ni vaega o fualaau faasaina, e aofia ai Aisa ma Maliuana, faapea foi ma ni a’upega malolosi, ma ni masini gaoia.

O i latou e to’afa na molia mai i lea osofaiga, na aofia ai ni alii se to’alua, o Vincent Patelesio Smith mai Toamua-uta ma Laki Jr. Silva mai Vaimoso; ma ni tamaitai se to’alua, e aofia ai Victoria Kalapu o Matautu ma Sharlene Fidow mai Aleisa.

Ma ua fa’amaonia nei i luma o le Fa’amasinoga Sili ia le solia e Smith ma Silva o le tulafono, ae ua toe tu’usa’oloto ia Kalapu ma Fidow.

O le afioga i le Faamasino Sili ia leiataualesa Daryl Clarke sa pule faamalumalu i taualumaga o lenei faamasinoga ma o le amataga o lenei vaiaso sa maua mai ai lana faaiuga.

E fitu moliaga na tu’ua’ia ai Smith, e aofia ai ma se vaega o fualaau faasaina, o Aisa, lea na maua i totonu o se taga pepa iila laititi, na i totonu o lona ofuvae.  E ui ina sa faapea mai lenei alii, e na te le iloa na iai ni fualaau faasaina i lona ofu ma sa ia finau mai foi, i le iai o ni tulaga faaletonu i molimau a le malo.

Ae peitai, sa te’ena e le afioga i le Faamasino Sili ia le finauga a Smith.

Sa faapea foi ona faamaonia moliaga o Silva i lona umia o se vaega o fualaau faasaina, o maliuana.

TOE FA’AFO’I MAI NI SEILA SE TO’AONO

E to’aono ni seila sa galulue faakonakarate i luga o va’a, ua toe fa’afo’i mai i o latou aiga i Samoa, i le lua masina talu ona faimalaga ese atu, ona o amio le taupulea.

Ua fa’ailoa mai e le fa’auluuluga o le ofisa va’a a le Samoa Shipping Services, le susuga ia Tafesilafa’i Ipuniu Filipo, o se fa’afitauli e tupu so’o lenei tulaga ma e tauvalea ai lava tagata faigaluega Samoa, o lo’o galulue i luga o va’a.  Ae le gata i lea, e avea ma tulaga e tula’i mai ai faafitauli i ni isi o seila fou.

Saunoa Tafesilafa’i, e mafua lava nei fa’afitauli ona o le ‘ava malosi, ma o se faafitauli e mamafa tele i le taga’i a lo latou ofisa.