Pago Pago - AMERIKA SAMOA

ALOA’IA E LE MAOTA FONO IA LE ‘FAIAOGA O LE TAUSAGA’

Ua pasiaina e maota e lua o le Maota Fono ia se i’ugafono ‘aufa’atasi, sa faapea ona fa’aulufaleina e le Afioga i le Senatoa ia Olo Uluao Letuli, e aloa’ia ai le susuga ia Mikaela Saelua, le ulua’i faiaoga Samoa ua filifilia e avea ma se tasi o sui tauva, i le fa’ailoga o le Faiaoga o Aoga Fa’avaomalo 2025.

E to’afa ia Mikaela ia faiaoga, o lo’o tauva mo lenei fa’ailoga.

Ua fa’apea ona fa’ao’oina atu le agaga fa’afetai ma le fa’amalo, i totonu o le I’ugafono, ia Mikaela Aigamaua Saelua, mo le filifilia o ia, e avea ma se tasi o sui tauva e to’afa mo lenei fa’ailoga maualuga.

O Mikaela, o se alo e fa’asino i le Afioga i le Faipule ia Fiu Johnny Saelua ma le faletua ia Catherine Aigamaua Saelua mai i le afioaga o Leone.  Sa fa’au’uina mai o ia i le aoga maualuga a Leone, i le tausaga e 2008, e pei ona ta’ua i le fa’atomu’aga o le I’ugafono.

O lo’o ua ta’ua ai foi i totonu o le I’ugafono lona aga’i atu i fafo mo le fa’aauauina o ana a’oa’oga, lea sa fa’au’uina mai ai i le tausaga e 2014, i le Iunivesite o Kalefonia, Los Angeles i lana fa’ailoga o le ‘Bachelor of Arts’ i le ‘Political Science’ ma ‘Asian American Studies’.

Ina ua mae’a lona fa’au’uga, sa toe taliu mai Mikaela i Amerika Samoa ma amataina lona soifua galue i le aoga maualuga a Tafuna. E tasi lona tausaga i Tafuna, ae ona malaga atu i le fa’aauauina lana fa’afaiaoga i le aoga maualuga a Leone.

E tasi lona tausaga sa faiaoga ai i Leone, ae filifilia loa o ia e avea ma taitai o faiaoga o lo’oa’ao’aoina le Gagana Peretania ma le ‘Arts’ i Leone.

O Mikaela, o se tagata ua lauiloa i lona tulaga fa’aletaitai ma le fa’afaufautua i totonu o faalapotopotoga i totonu o le aoga, e pei o le kalapu a le ‘Peer Leaders’, Accreditation Team ma le ‘Forestry Club’.

I le tausaga e 2019, na filifilia ai Mikaela e avea ma totino o le faalapotopotoga faaletaitai faavaomalo (National Pacific American Leadership Institute), ma o la latou ta’iala o le sailia, a’oa’oina ma fa’afaileleina taitai fai mai e le gata i totonu o le Pasefika ae faapea Amerika.

I le tausaga e 2020 sa filifilia ai o ia e avea ma totino o se polokalama faaleta’ita’I o le ELDP (Executive Leadership Development Program) lea e gafa ma le mata’ituina o polokalama fa’aleta’ita’i i totonu o motu o le Pasefika o lo’o galulue faatasi ma le Iunaite Setete.

I le tausaga e 2021, sa faapea ona toe fo’i Mikaela mo le fa’aauauina o ana aoaoga ma ia ausia ai lona fa’ailoga o le ‘Masters’ i tulaga o aoaoga, mai i le Iunivesite o Hawaii, i Manoa.

O le tausaga a’oga 2022-2023, na filifilia ai o ia e avea ma Faiaoga o le Tausaga, ma i le masina o Oketopa 2024, sa fa’aeaina ai o ia o le ‘Faiaoga o le Tausaga’ a le Teritori o Amerika Samoa.  

Mai iina sa fa’auluina ai e Mikaela sana tusi apala imo le fa’ailoga o le Faiaoga o le Tausaga Faavaomalo, lea e filifilia mai ai faiaoga mai i setete uma o Amerika, faapea ma teritori, atoa ai ma le Itumalo o Columbia ma le Matagaluega o Vaega’au.

Ia Ianuari 30, 2025, sa fa’alauiloa mai ai e le Faalapotopotoga o A’oga (Council of Chief State School) le filifilia o Mikaela e avea ma se tasi, e to’afa iai i latou, ua avea nei ma sui tauva o lenei fa’ailoga.

Ua faapea ona tauala atu i le I’ugafono le fa’amalo ma le fa’amanuiaga a le Maota Fono, ia Mikaela, e tusa ai ma lenei tulaga maualuga ua ia ausia ma o le a mafai ona avea ma se fa’ata’ita’iga mo nisi o faiaoga o le teritori.  

I le aso Lulu o le vaiaso ua mavae, sa faapea ona fa’aleoina ai, i totonu o le Maota o Sui, le agaga fa’afetai a le Afioga i le Faipule ia Fiu Johnny Saelua e tusa ai ma lenei tulaga ua faia e le Maota o Sui, mo si ona alo.

SALALAU I UPEGA TAFA’ILAGI FAAFITAULI FEAGAI MA SE SUI FAATONU A LE MALO

Na salalau i luga o upega tafa’ilagi ia se ata vitio o se fe’ese’esea’iga i le va o sui Faatonu a le Ofisa Faasao o Tala Faasolopito a Amerika Samoa (ASHPO), ia Epifania Suafo’a Taua’i, ma se fa’atauoloa Asia, ma i’u ai ina o’o le a’ao o Taua’i i le fa’atauoloa.

E le gata i lea, na lagonaina foi le fa’aaogaina e Taua’i o ni upu e le logoleleia i le fa’alogo ma ia ta’ua ai le iai o lona aia tatau e o’o ai lona lima i le tamaitai fa’atauoloa.

E le o manino le mafua’aga moni na tupu ai lenei fa’alavelave, ae i se faamatalaga i luga o lenei ata vitio, sa ta’ua ai e faapea, ona o se fe’ese’esea’iga i tau o oloa ma sa ta’ua i le faamatalaga a le tagata na ia tu’uina lenei ata vitio i luga o upega tafa’ilagi e faapea, e le o ni uiga fa’aalia ia a se faatonusili ma ua tatau ona faate’a Taua’i mai i lana galuega.

E le gata i lea, na ta’ua foi e lea tagata le le sa’o o le filifiliga o lenei faatonusili, ma o loo filifili ia faatonusili mai tagata e fiafia iai taitai o le malo, e tusa lava pe le agava’a mo le galuega.

(O se tulaga e fia faamanino e le Samoa News, o le ofisa lenei a le ASHPO, o lo’o i lalo o le taitaiga a le Ofisa a le Kovana, e pei o le Ofisa a le Medicaid, ma o lona taitai, e filifilia e le kovana, ae le palotaina, e pei o le toatele o faatonu o le kapeneta.  Ma o le talitonuga, o le mafuaaga lea e le o manaomia ai ona fa’amaonia a latou tofiga a le Fono.)

Ae peitai, o lenei fa’aaliga e faatatau i le faafitauli ia Taua’i, o lo’o fa’atula’i mai ai se fa’afitauli o lo’o feagai ma le Faigamalo a Pula ma Pulu, ma le pasiaina o a latou faatonusili e le Maota o Sui.

I le vaiaso ua mavae, na toe palota faalua ai le Maota o Sui, i sui faatonu e to’alua, e le’i pasia muamua.  O Timothy Jones, e avea ma Faatonusili o le Matagaluega o Alagamanuia mo le Sami ma Vaomatua (DMWR) faapea ma Aaron Hall, e avea ma Faatonusili o le Ofisa o Feso’ota’iga/KVZK-TV.

Ma sa le’i toe pasia foi Jones i le palota lona lua, i le na’o le 7 ioe, ae 10 leai – ae na mana’omia ni ioe se 11 e pasia ai e le Maota o Sui.  O lona uiga, e tusa ai ma le tulafono, ua tatau loa ona fa’atula’i ese o ia mai i lona tofiga, ae e mafai ona toe fa’aulu lona igoa mo le tofiga lava e tasi, i le nofoaiga fou a le Maota o Sui.

E le o mautinoa i le taimi, pe toe fa’aulufale mai i totonu le igoa a Jones.

Ae i lana palota lona lua, sa faapea ona pasia ai e Afioga i Faipule ia Aaron Hall, e avea ma Faatonusili o le Ofisa o Feso’ota’iga/KVZK-TV.  Ma ua pasia ai nei lona tofiga Faatonusili, ona ua mae’a ona pasia mai o ia e le Maota o le Senate.

Sa pasiaina foi i le vaiaso ua mavae, e le Maota o Sui ia le susuga ia Palaita Tusipasi Suiaunoa e avea ma Faatonusili o le Ofisa o Falepuipui.  Ma ua mae’a foi ona pasiaina o ia e le Maota o le Senate.

Ae o lo’o fa’aauau pea ona fa’atalitali ia le pasiaina o Faatonu mo le Ofisa o Faatauga a le malo, faapea ma le Komesina o le Ofisa Palota, ina ua talosagaina e Afioga i Senatoa, nisi faamaumauga faaopoopo, ona mafai ai lea ona faia sa latou faaiuga.

I le Ofisa o Faatauga a le malo, sa fa’apea ona fa’aalia e Afioga i Senatoa ia so latou atugaluga e tusa ai ma le pisinisi a le sui faatonu ma lona faletua.  Ma e le o mautinoa pe ua taulimaina e sui o le maota maualuga ia fa’amaumauga, e pei ona sa talosagaina, ma po o afea e toe fa’aauauina ai lea iloiloga.

Sa faapea foi ona te’ena e le Senate, i la latou palota, ia le sui filifilia mo le Ofisa o Paka ma Malaeta’alo a le malo.  Ma e le’i fa’atulagaina le toe palotaina o lenei sui.  Ae e le o mautinoa pe taunu’u le iloiloga a le Maota o Sui, ona o lea ua te’ena mai lenei sui, e le maota maualuga.