Pago Pago - AMERIKA SAMOA

FA’ASALA FAIPULE MAI I SWAINS MAI TAUAOFIAGA A LE MAOTA O SUI

O le aso Lulu o le vaiaso ua tuanai, na tupu ai se fa’afitauli i totonu o le Maota o Sui, na faapea ona i’u ina ta’ita’i ai i fafo le Faipule mai le motu o Swains, ma ua fa’asalaina ai nei o ia mai i le Maota Maualalo.

Na fa’aalia le le fiafia o le Afioga i le Faipule ia Su’a Alex Jennings, a’o feagai ai le Maota o Sui ma a latou tauaofiaga, ona o le fa’aauau pea ona ia le auai i palotaga o fa’atonu fou, lea o lo’o fa’agasolo nei a latou iloiloga i totonu o maota e lua.

O le vaiaso mulimuli a Ianuari, na amata ai iloiloga a le Fono Faitulafono ma i la latou iloiloga ia Ianuari 31, 2025, na fa’aleoina ai e le susuga ia Su’a lona fa’atu’i’ese i le le mafai ona auai i palotaga mo Faatonu fou, i le mae’a ai o a latou iloiloga.  

Ma ina ua fa’agasolo ona palota le maota mo le tofi o le Komesina o Leoleo, sa fa’atula’i ai e Su’a se mau ina ia te fa’afo’i le i’ugafono mo le fa’amaoniga o le susuga ia Ta’aga Saite Moliga e avea ma Komesina o Leoleo, i le komiti, se’ia mae’a ona logoina le Fofoga Fetalai, ua mafai ona ia auai i palotaga.

Na te’ena le mau a Su’a ma sa fa’alauiloa mai ai e le Fofoga Fetalai, le le’i o’o atu o se fa’aaliga mai i le Kovana, e aloaia ai fa’aopoopoga e lima na pasia i le palota o le 2022, lea e aofia ai ma le fa’atagaina ona palota o le sui mai i Swains.

Sa fa’aleoina e Su’a i le sui a le Samoa News, i lea lava aso, ina ua mae’a tauaofiaga a le Maota Fono, ia lona le auai i palota uma ua faia, ma i sona talitonuga, o se tulaga le fetaui lea i lona aia tatau i le avea ai o ia ma se Faipule.  Na saunoa foi Su’a, ua 18 tausaga o sikipi lava o ia. 

Ma i le aso Lulu o le vaiaso ua mavae, sa toe tula’i ai Su’a e toe fesiligia le tulaga ua o’o iai lenei mataupu, ona o lea ua ia va’aia, ua taunu’u i le Senate ia le fa’aaliga mai i le kovana e aloaia ai le tulaga i lona palota i totonu o tauaofiaga a le Maota o Sui.

Ae peitai, a’o saunoa Su’a sa faapea ona fa’auilavea mai le Afioga i le Fofoga Fetalai ma ia faailoa mai, le le’i o’o atu o se fa’aaliga mai i le malo.  Ae ina ua fa’aauau pea ona saunoa ia Su’a, sa faatonuina loa o ia e le Fofoga Fetalai ina ia alala mai lalo.

Sa faapea foi ona fa’atula’i e le Afioga i le Sui Fofoga Fetalai, ia Fetui Fetui Jr., ia le ave’eseina o Su’a mai totonu o le maota, ina ua fa’aauau pea ona lauga ia Su’a.

Sa faapea loa ona fa’atonuina e le Fofoga Fetalai ia leoleo o le Maota ina ia ave i fafo ia Su’a, a’o faapea mai Su’a, ia Puipui le Faavae ma le aia tatau o tagata.  Ma na ripotia mai foi le sasaeina e le alii Faipule o lona la’ei, e fa’aali ai lona tete’e i le faatinoga a le Maota o Sui.

Ma a’o tosoina atu o ia i fafo, sa vala’au mai le alii Faipule, “Fight! Fight! Fight! USA!”

Na toe faapea ona fa’aleoina e le Fofoga Fetalai le leai o se fa’aaliga ua o’o atu i le Maota o Sui mai i le Kovana, e tusa ai ma fa’aopoopoga fou e lima.  Ae na fa’aleoina e le sui Fofoga Fetalai lona le fiafia i le tulaga ua tula’i mai.

Sa fa’atula’i mai e le Afioga i le Faipule ia Fainuulelei Allen ia le faasalaina o Su’a mo ni aso e 30 ae peitai, sa ta’ua e le Fofoga Fetalai, le tatau ia uia e Su’a ia la’asaga e mafai ai ona toe fo’i mai i totonu o le Maota o Sui.  

O lona uiga, e le o iloa se aso tonu e mafai ona toe taliaina ai le sui mai i Swains, i totonu o le Maota o Sui.

O lenei fa’afitauli e mafua mai i le leai o se fa’aaliga aloaia ua o’o atu i taitai o le Maota o Sui, mai i le Kovana po o le Ofisa o le Initeria, e tusa ai ma le fa’ai’uga o fa’aopoopoga fou e lima.

I se tusi mai i le Ofisa o le Initeria, ia Fepuari 6, 2025, sa logoina ai le Afioga i le Kovana ia Pulaali’i Nikolao Pula, le pasiaina e le Failautusi o le Initeria o fa’aopoopoga fou e lima, i le Faavae a Amerika Samoa, e pei ona sa pasiaina ia Novema 8, 2022.

O nei fa’aopoopoga e lima, e aofia ai le tu’uina o le aia tatau i le Faipule mai Swains, e palota ai i totonu o le Maota o Sui.

Ma ua mae’a ona sainia lea tusi e John D. Brewer, Jr., le Faatonusili o le Ofisa a le OIA, ma sa fa’ao’oina atu se kopi i le Afioga i le sui Faipule o Amerika Samoa i Uasigitone, le Afioga ia Uifa’atali Amata Radewagen ma le Peresetene o le Senate, le Afioga i le Senatoa ia Tuaolo M. Fruean.

TOE TOLOPO LE ILOILOGA MO LE FAATONU O OFISA O FAATAUGA A LE MALO

O le a’afia o le susuga ia Kenneth Kuaea i se kamupani e ta’ua o le ‘Klaod Solutions Inc.,’ na avea ma tulaga na tau lavelave ai lona iloiloga e avea ma Pule o le Ofisa o Faatauga a le Malo, lea sa fa’ataunu’uina i luma o le Komiti o Faagaioiga o le Malo a le Senate, i le aso Lulu o le vaiaso ua tuanai.

O le susuga ia Kuaea ma le faletua ia Luisa Kuaea, e ana le kamupani o le Kloud Solutions ma na fitu iai kamupani sa fa’auluina ni tauofoga i le tausaga e 2021 mo le ‘TALOFAPASS’ (American Samoa Safe Travel System).  Sa le’i faamanuiaina le taumafaiga a lenei kamupani ina ua filifilia e le Ofisa o Faatauga a le Malo ia le kamupani a le Datahouse Consulting Inc., mai Honolulu.

Sa faamaninoina e Kuaea i lana molimau, le a’apa atu o le Faatonusili a le ASTCA ia i la’ua ma lona to’alua, mo se faiga pa’aga e su’esu’e ai se initeneti fou. Ae o le taimi lea o lo’o la tamafai e faavae sa la kamupani fou, ma sa faia ai se latou maliliega ma le ASTCA, aua le faavaeina o se kamupani fou e fesoasoani i le aumaia o ni avanoa faigaluega mo tagata o le atunu’u.

Na ta’ua e Kuaea le fautuaina o i la’ua e le ASTCA ina ia apalai i se vaegatupe i lalo o le polokalama a le SSBCI, e fesoasoani i le tau atina’eina o le la kamupani faapea ai ma taumafaiga ina ia faia ni avanoa faigaluega.  Ma e $500,000 se vaegatupe na o la apalai ai ma mauaina, tauala mai i le Ofisa o Tupe a le malo.

Ae ina ua maua lenei vaega tupe ma maua se la konakarate ma se kamupani mai Niu Ioka, sa faapea ona a’afia ona o le Koviti-19, ina ua amata ona limiti taimi faigaluega mai i le 6 i le taeao, seia o’o i le 6 i le afiafi, ae o le latou konakarate ma le kamupani i Niu Ioka, e mana’omia ona galulue i le va o le 12 i le po ma le 7 i le taeao.

Na fesiligia e le Afioga i le Senatoa ia Tuanaitau Malaki P. Togiola ia Kuaea, pe sa o la toe totogia le tupe.  Sa tali Kuaea, na o la taumafai e feiloai ma le kovana ina ia faamanino iai le tulaga ua feagai ma le la kamupani.

Ae na toe fesili ia Tuana’itau pe na toe totogi le tupe pe leai, sa tali Kuaea, o lo’o latou galulue e faatulaga se fuafuaga e mafai ai ona togitogi mai ai le tupe.

Na fa’amanatu atu e le Taitaifono o le Komiti, le Afioga i le Senatoa ia Togiola Tulafono, ia Kuaea, lona ta’ua i lana molimau, e le o a’afia o ia i le pulega o le Kloud Solutions, ae o lo’o ta’ua i le tala’aga o lona soifuaga galue, o ia o le COO (Chief Operations Officer) a le kamupani.

Sa faamanino mai e Kuaea, o ia o se tagata faigaluega i totonu o le kamupani, ma o lona tofiga lena sa iai.

O lea na toe fesili ai Togiola po o ai le pule o le kamupani, sa tali Kuaea, o le pule o lona to’alua, o Luisa Kuaea.

Na toe fesili Togiola po o lona to’alua e umia pasene uma o sea i totonu o le kamupani.  Sa tali Kuaea, ioe.  Ma na saunoa foi Kuaea, ina ua filifilia i la’ua ma lona to’alua e avea ma sui faatonusili, sa o latou faasoa ma a latou loia, ina ia tu’uina le kamupani i totonu o se ‘trust’ e mafai ona tu’uina atu i lo la alo (Hanna), ina ia ‘aua nei iai se faafitauli e ono tula’i mai ai.  

O Luisa Kuaea ua filifilia e avea ma sui Faatonu o le Ofisa o le Medicaid.

Na fesili Togiola po o iai se vaega i faamaumauga e mafai ai ona toe fo’i le pulega o le kamupani ia i la’ua ma lona to’alua, pe afai ae mae’a le fa tausaga o la tofiga.  Sa tali Kuaea, e na te le iloa lea tulaga ona e le’i iai i le taimi na tu’ufa’atasia ai le ‘trust’.  

Sa toe fesili Togiola pe ua mae’a ona faavae le ‘trust’, sa tali Kuaea, o lo’o fa’agasolo lea tulaga.  O lea na faapea atu ai Togiola, o lona uiga o lo’o iai pea le kamupani a le Kloud Solutions i lalo o le puleaga a lona to’alua, aua e le’i mae’a ona fa’amautuina le ‘trust’.  Sa tali Kuaea, ioe.

Na saunoa ai Togiola, i le le fa’amaoni atoatoa o Kuaea i lana molimau.  Ma na fautuaina ai o ia i le alo ‘ese mai le taumafai e ‘alo mai fesili.  

Ona liliu lea o le afioga i le Senatoa i le fesiligia o le tulaga o le la tagi faasaga i le malo, tauala atu i le Ofisa o Faatauga, lea o lo’o i le Faamasinoga Maualuga.

Ae na toe taumafai Kuaea e ‘alo mai le taliina o le fesili, e ala i lona taumafai e faamalamalama le mafuaaga na o’o atu ai lea mataupu i le Faamasinoga Maualuga, ona o le leai o se tali mai i le Ofisa o Faamaisnoga a Tagata Faigaluega o le Malo (ALJ).  Ae peitai, sa toe faauilavea ia Togiola ma toe fesiligia le tulaga ua o’o iai le faamasinoga.

Na tali mai Kuaea, o lo’o latou faatalitali pea i se faaiuga mai i le Faamasino Sili, ma ua atoa le fa tausaga talu ona failaina lea mataupu.

Sa fia malamalama Togiola pe a mafai faapefea e Kuaea ona faia ni faaiuga taua i le malo lea ua ia aveina i le faamasinoga.  Na saunoa Kuaea, sa o’o atu le sui Loia Sili i lo latu ofisa e talanoaina mataupu po o tagi, o lo’o iai pea, ma ina ua o’o i le mataupu e faatatau i le tagi a lana kamupani, sa ia tu’umuli ese mai le fonotaga.

Na saunoa Kuaea, ua le o toe iai sona agaga i totonu o lea mataupu, o lea ua tu’uina atu i a’ao o le ofisa a le Loia Sili.

Sa toe fesiligia e Togiola ia le aitalafu e $500,000 mai i le SSBCI, pe ua totogia se vaega o lea aitalafu.  Sa tali Kuaea e leai, ma sa o latou taumafai e saili se auala e mafai ai ona faamagaloina lea aitalafu talu ai le gau o le latu kamupani ona o le koviti-19.

Na fesiligia foi Kuaea pe sa ia apalai mo ni penefiti mo tagata le faigaluega, sa tali Kuaea e leai, seia vagana ai lona to’alua.

Sa fesiligia foi Kuaea pe sa maua se totogi a lona to’alua a’o avea ma CEO i le taimi na fa’aaogaina ai le $500,000 i le faagaioiga o le kamupani.  Na tali Kuaea e leai ma na’o le pau le tagata o le latou aiga na maua le totogi, o ia.

Na fa’aleoina e Togiola lona le malamalama, ona e le’i maua se totogi a lona faletua, ae sa ia mauaina penefiti mo tagata e leai ni galuega, ae sa maua le totogi a Kuaea.

I le faaiuga o le iloiloga, na faapea ona tapaina ai e Togiola ia kopi uma o tupe na maua mai i le kamupani Niu Ioka lea sa konakarate ma Kloud Solutions i le vaitaimi o le Koviti, faapea ai ma le talosaga mo penefiti mo tagata le faigaluega (unemployment benefit) a le faletua.

Ma sa fa’alauiloa atu ai e Togiola le toe samania o le sui Faatonu i luma o le komiti, pe a mae’a ona iloiloina e totino o le komiti faamaumauga e pei ona talosagaina.

PASIA E LE SENATE IA LE FA’ATONUSILI FOU A LE DOC

I lona iloiloga i luma o le Komiti o le Faagaioiga o le Malo a le Senate i le vaiaso ua mavae, sa fautuaina ai e Afioga i Tama o le Atunu’u ia Magdeline Pepe Petaia, le sui Faatonu o le Ofisa o Fefaatauaiga a le malo, ina ia fai fa’alelei lana aufaigaluega ma ia onosa’i ma manatunatu loloto i ana faaiuga fai.  Ia saili le filemu ma le taitaiga a le Atua, aemaise lava i matuapu taua e ono a’afia ai le aufaigaluega ma le mamalu lautele.

Na fa’atatau fautuaga a Afioga i Senatoa i le faaiuga na faia e Petaia i le masina ua mavae, ina ua to’ai nofoia le nofoa faaletaitai o lea ofisa, i lona fa’ate’aina o ni sui faatonu se to’alua.

I lana saunoaga, sa faapea ona faamamafaina ai e le Afioga i le Senatoa ia Muagututi’a Tauoa, o se tasi nei o lupe faalele a Amerika Samoa, ua toe taliu mai e tautua i totonu o le teritori ma sa ia vi’ia ana taumafaiga fa’aleaoaoga ma lana auaunaga i totonu o le malo i le tele o tausaga, ua talitonu ai le Senatoa, ua agava’a ai Petaia e avea ma taitai o le Ofisa o Fefaatauaiga.

Sa faapea foi ona faamamafaina e Muagututi’a le taua o le tula’i mai o nei fanau talavou e avea ma taitai i totonu o le malo, e pei o Petaia.  Ma sa ia u’una’ia ai Afioga i Senatoa, ina ia o latou pasiaina le tofiga Faatonu a Petaia.

E tusa ai ma le faaiuga a Petaia i le fa’ate’aina o sui faatonu e to’atolu, sa faaleoina ai e Muagututia le tala mai i le Tusi Paia, i le tali a Iesu ia Peteru, lea na fesili pe faafia ona faamagalo se uso ua agaleagaina o ia.

Lea na tali ai Iesu, ia fa’afitusefulu ni fitu.  Ma na saunoa Muagututi’a po o le a le uiga o lea mea.  Ma sa ia tali mai, ina ia aua ne’i o tatou mata’i na o leaga, ae ia tatou faia mea uma ma le agaga mama.

Na fa’atula’i ai loa e le Afioga i le Senatoa ia se mau ina ia tu’umuli atu le sui Faatonu ae pasia lona tofiga fou.

Sa fa’aluaina e le Afioga i le Senatoa ia Noa F. Vea le mau a Muagututi’a.  Ma sa ta’ua e Noa, ua leva ona ia masani ia Petaia, ma o se tagata fa’aaloalo, alofa ma le faamaoni.  Na faapea foi ona u’una’ia e Noa ia afioga i Senatoa, ina ia latou pasiaina le tofiga mo Petaia.

Ina o le a alo atu le Afioga i le Taitaifono, Senatoa Togiola T.A. Tulafono e tapunia le iloiloga, ae peitai, sa si’i le a’ao o le Afioga i le Senatoa ia Olo Uluao Letuli ma ia toe fa’atula’i le mataupu e uiga i sui Faatonu e to’alua ia na fa’ate’a e Petaia, ona ua toatele nisi o lona itumalo ua fa’afeso’ota’iina atu o ia e tusa ai ma lea mataupu.

Sa faapea ona fesiligia e Olo ia Petaia pe ua toe fa’afaigaluega ia sui Faatonu ia na fa’ate’a.  Sa tali Petaia, ioe.

E ui ina e le’i fesiligia e Olo le mafuaaga na fa’ate’ia ai i la’ua ia e to’alua, ae sa ia fa’aleoina le tau o nisi o Senatoa ia i la’ua ia e to’alua ma ua leva ona o la galulue faamaoni i totonu o le malo.  Na faamamafaina e le Senatoa o le itumalo a Fofo lona le fesiligia o le agava’a o Petaia, ae e tatau ona ia taitai i le alofa ma le agamalu.

Na fa’aleoina e le afioga i le Senatoa ia Magalei Logovii ona foi atugaluga e tusa ai ma lenei mataupu, ona o se tasi o la’ua ia na a’afia, e mai i lona alalafaga i Fitiuta.  Ma sa ia fa’aalia lona le fiafia e tusa ai ma lenei mataupu ona o se tulaga na saunoa ai le peresetene o le Senate i le tatalaga aloaia o le Fono, ina ia alo ‘ese mai I le faia o ni suiga i tofiga taitai se’ia mae’a ona pasia mai.

Ma na faapea ona fesiligia ai loa e Magalei ia Petaia, i le mafuaaga sa ia faia ai lea faai’uga, ae e le’i fa’amaonia lona tofiga faaletaitai.

Na faamanino mai e Petaia, e leai seisi na fa’ate’aina.  Ae sa ia faamalamalama e faapea, o ni aiaiga i totonu o a la konakarate ma tulaga faafaigaluega, e le’i manino, ae sa ia toe faamamafa mai e faapea, e le’i faate’aina i la’ua.

Na tapunia e le Afioga i le Peresetene o le Senate, ia Senatoa Tuaoloa Manaia Fruean, ia le iloiloga e ala i lona faamalamalama mai o le la faia ma le sui Faatonu, ma lona ta’uina o ia o se tasi o lana fanau.  Ma sa ia ta’ua ai foi lona otegiaina o le tamaitai, ina ua tula’i mai lenei mataupu, ma ua mae’a ona ia faamaninoina lana itu, lea e pei ona ia toe fofogaina i totonu o le Senate.

Ina ua mae’a le iloiloga a le komiti, sa faapea ona pasiaina e afioga i Senatoa ia Petaia e avea ma Faatonusili o le Ofisa o Fefaatauaiga, i se palota, 12 ioe, 4 leai.