Ads by Google Ads by Google

TALA O LE LALOLAGI


Centennial Building [ata: SN]

Pago Pago, AMERIKA SAMOA

 

MANA’OMIA TERRITORIAL BANK O AMERIKA SAMOA TUPE SILIVA & APAMEMEA

 

O lo ua fa’alauiloa pea le fa’aauau ona sioti pea lava o tupe siliva ma pene apamemea mo le faletupe o le Territorial Bank o Amerika Samoa (TBAS).

 

Ua le gata i le faletupe, ae ua fa’apea lava i le atunuu atoa i tagata fa’atau ma le vasega foi o pisinisi tumaoti e fa’atautaia latou faleoloa ma isi uma ituaiga o fefaataua’iga, ua gasolo mai i faletupe mo le mana’omia o tupe siliva ma tupe apamemea mo le faiga o latou sui mo fa’atauga, ae ua le mafai ona fesoasoani atu i ai le faletupe i o latou fanoga ona e le o lava fo’i tupe siliva ma apamemea a le faletupe latou.

 

Ua fa’ailoa  o le vaiaso na te’a nei sa fa’ato’a fa’auia atu ai siaki stimulus a le vasega o le atunuu e le’i maua mai lava se stimulus mai le amataga se’ia oo mai i siaki lona tolu, ma ua maua ai le aotelega o latou siaki stimulus e $3,200.

 

Ua talosagaina atu nei e le TBAS se fesoasoani mai a le Federal Reserve ia i latou mo lea fa’amoemoe ina ia fa’alava mai tupe siliva ma apamemea poo tupe lusi mo le faiga o sui mo fefa’atauaiga i le atunuu atoa.

 

Ua fa’ailoa mai ua ofoina atu e le faletupe le totogi e 10sene mo le tagata e na te faauia ane i le faletupe se tinoitupe e 1.00 o tupe siliva ma tupe apamemea.

 

E ai pepa e mafai ona fa’aputu i ai tupe sene, tupe lima sene ma tupe 10sene ma ua faatulaga mai le $20 mo le tagata e to’atasi e na te mauaina le totogi o le auina ane o ana tupe siliva i le TBAS. 

 

O le a le aumaia ia te oe nei pepa e faamautu i ai sene ma isi tupe siliva uma, ae mafai ona fa’atau ese mai lava ei latou nei pepa e afifi atu ai tupe siliva ma apamemea.

 

Afai e te aumaia i le faletupe le aotelega e $50 o tupe siliva ma apamemea, e maua lau $5 e fa’afoi atu ia te oe.

 

FA’AMANATU 65 TAUSAGA FALETUA O NA’OUPU SMITH - HARVEST BUFFET TACOMA, WASHINGTON

 

Na fa’atasia nisi o le pa’ia o Aiga, Ekalesia ma le vasega o Fanau ma latou aiga, ina ia fa’amanatuina le atoaga o le 65 tausaga o le faletua ma o le tina o le galuega i Portland, Oregon Na’oupu Penitito Smith.

 

O lenei tina sa soifua a’e i Sataua i Savaii, peita’i na fa’ato’a fai aiga mai i Amerika Samoa lea sa fa’ato’a fa’aipoipo ai ma le susuga le Faife’au Aso Fitu Samoa o Penitito Smith. ma amata ai le aiga ina ua alalatumau ai i Malaeimi.

 

Na oo ina siitia mai i latou i Amerika nei ma fa’amautu ai i Portland, Oregon lea lava e galulue ai nei ma ua mae’a fa’amautu atili ai le fanau ma le aiga.

 

O le fa’amanatuga o lona 65 tausaga o le soifua ua toe fa’atasia ai le fanau, peita’i ua le mafai ona oo mai nisi o le fanau o loo fa’amautu i Ausetalia, ae ua fa’amanatuina le aso soifua ma fa’afofogaina fo’i fa’amanuiaga mai ia te’i latou o lo’o alaala mamao mai i fanau ma aiga.

 

O le ‘aiga sa fa’atautaia lea i le Harvest Buffet i Tacoma, ma sa iloga ona aufa’atasia i ai fa’afeagaiga e to’a fa mo lea fa’amoemoe. O le susuga le Faife’au Aso Fitu Richard T. Solaita mai le SISDAC- Olympia, Washington.

 

O Richard Solaita ma le faletua o Fesiligia To’ailoa Solaita o nisi ua loa tausaga o mafuta ma aiga i Nuuuli, Amerika Samoa ma galulue i le SISDAC-AS i Malaeimi.\

 

Na siitia le fa’afetai ma le Upu fa’amalosi i le tina o fa’amanatuina lona aso soifua, ae maise fo’i o se toe fa’amanatu i le pa’ia lasi o aiga, uo mamae ma e foi e mafuta fa’atasi ma Na’oupu Smith i le Ekalesia Aso Fitu Samoa, ao le isi itu atoa o le mafutaga o le fanau ma o latou aiga, ma fanau a fanau a le tina matua.

 

O le susuga Pr Ulusago, le toalua lea o le alo tamaitai ulumatua o le fanau a Na’oupu ma le tama o Penitito sa avea ma fofoga taumolimoli o le fanau ma aiga, e fa’afeiloa’ia le mamalu na autova’a ma fa’asolo mai le polokalama matagofie na fa’ataoto mo le latou fiafia i le aso o le tina.

 

O isi fa’afeagaiga sa auai, Pr Tau Viliamu mai Leone ma le Manu’atele sa isi ofoina le tatalo mo le taumafataga ma sa faia fo’i fa’afiafiaga a le fanau mai Federal Way lea e alaala ai le fa’afeagaiga Tupulagi & Temukisa Ulusago, ona soso’o lea ma fa’afiafiaga sa tapena i ai le fanau a fanau mai Portland Oregon.

 

O siva Samoa sa fa’asalalauina a aiga ta’itasi, ae maise ai le Ekalesia sa tautua ai le tina o Na’oupu fa’apea ma le Ekalesia sa masii atu le latou Toreka, Ekalesia lea i DesMoines. O le latou siva sa tatalaina lea i le $1,000 o le meaalofa lava mo le tina matua i lona aso soifua.

 

I le ‘aiga sa fiafia tagata uma i a latou tausami e manatu ai, aua sa alu lava oe i le mea e gata ai, ae sa le alu ma ave i le aiga. Matagofie mea ua aua o le keke fo’i o le aso fa’apitoa o Tina sa matua fai i ai le fai mea lelei o le tamaitai mai Leone ma Vailoatai o Tofoipupu.

 

O fa’aaloaloga sa fa’afao fo’i i ai a’ao o le pa’ia o fanau ma aiga fa’apea le tama o le aiga le susuga le Faafeagaiga Penitito Smith, sa matua iloga ai le fai tina ma le alofa fa’amaoni. Na lalanu uma uo mamae o tina sa i le maota i fa’aaloaloga o le teutusi ma le fasi keke o le aso faapitoa o Na’oupu Smith. O fa’amanuiaga fo’i sa saunoa i ai le susuga le Faife’au Tau Viliamu o le Cornerstone Samoan SDA, sa ia talosagaina ai le alofa o le Atua ia fa’afualoa mo le tina.

 

“O a lava tiga ma ma’i o lenei olaga, ae o le mea ua sili ona fa’afiafiaina ai oe le tina ua aotelega mai lea i lenei maota i le aso. O au fa’amanuiaga e ala i fanau ma fanau a lau fanau, o lou aiga i ona itu e fia, ma aiga o lau fanau ua mafuta ma ua tupu lauolaola e pei o tamai olive i lau la’oai i le aso. Ae silisili o au uo mamae i ekalesia uma sa e tautua ma o lo’o e tautua ai, lea latou te siitia talosaga ma nono manu aua lou soifua ia fa’afualoa i le mafutaga mafana i le alofa ma le fa’amaoni ma le tama o le aiga.

 

O manuia na e le ‘au maua. Ia e soifua e tusa o le fa’asoa a le Atua i le ola ma le malosi, aua o i tatou lava o auupega mo lana galuega i ona a’ao.” O le toe saunoaga lea ina ua mae’a le aiga ma fa’aaloaloga fa’apea fa’afiafiaga matagofie a fanau a fanau, ona tu’ua ai lea o le mafutaga ma le agaga fiafia o tagata uma sa aofia i ai.