Ads by Google Ads by Google

Tala o le Lalolagi


[ata: foa'i]

Pago Pago, AMERIKA SAMOA

 

MAUA FA’ATUPEGA MO TAUMAFAIGA E FA’AITIITIA SAUAGA O TINA

 

O le aso Lulu sa fa’alauiloa ai e le afioga i le faipule i le Konekeresi ia Uifa’atali Amata alagatupe fou e $685,000 mo Amerika Samoa mai le Ofisa o Sauaga e fa’asaga i Tina a le Justice Department a le malo tele. 

 

O le vaevaeina o lea alagatupe e aofia ai le $616,964 mai le Polokalama a le STOP (Services, Training, Officers, Prosecutors) lea e mafai ona maua ai se vaega tupe mo teritori ma setete e fa’aeleai ai ala e mafai ona fesoasoani ai le Matagaluega o Fa’amasinoga ma e fa’amalosia le tulafono, Leoleo, i latou e saisaia mai nisi e solituina tulafono o le sauaina o tina, fa’atasi ai ma fa’atupega mo nisi o sosaiete ma fa’alapotopotoga e sapaia ma galulue maumaua’i e fa’atino galuega alofa e tautuaina ai nei tina.

 

O le tinoitupe lona lua e $68,933. e auala mai lea i le Sexual Assault Services Formula Program. O loo fa’aauala mai ai nisi o fa’atupega e aoga mo ni nofoaga e faamautu ai nisi ua a’afia i faiga fa’amalositeine ma e fa’auia mo na’o fa’alapotopotoga o lo’o fa’atautaia e le mo se polofiti, ae le o ni fa’alapotopotoga fo’i e fa’atautaia e le malo, latou lea e tautuaina nei tina ua a’afia pe sa a’afia i nei soligatulafono.

 

Fa’ailoa e Uifa’atali, “Ou te fa’afetaia nei lava fa’atupega aoga tele mo le taumafaiga a le tatou teritori ina ia matua ave’esea nei ituaiga soligatulafono mai le tupu pea i le atunuu.”

 

“E le tatau ona tatou fa’atagaina pea nei ituaiga o sauaga matuia mai le fa’ao’o i o tatou tamaitai talavou ma tina matutua. Ua tatau ona tatou tutufa’atasi ma tete’e atu i nei faiga e le tatau ma le soifuaga o tatou tama’ita’i, o e fa’atamasa i ai Aiga Samoa. E le o se mea e taumateina o lo’o i ai lenei faafitauli o feagai ma o tatou uso a tama’ita’i, ae maise le fanau teine talavou. O nei fa’atupega, o le a mafai ona aoga tele e una’ia atili ai taumafaiga e taofia ma soloia lea ituaiga o solitulafono mai le tupu pea i Amerika Samoa.”

 

Ua ia fa’amalo foi i le faigamalo fou a Lemanu ma Talauaega ina ia mafai ona talosagaina nei fa’atupega ia fa’aauau ona fa’amalosia nei gaioiga lelei e fa’atino e nei fa’alapotopotoga NGO - ma e le faia mo ni polofiti ina ia mautu lea fesoasoani tele mo i latou e fa’atino ai tiute i le lautele o tamaitai o le atunuu.

 

“E LE ATOATOA LE AMIOTONU A LE TALAVOU - AE FA’AFIAFIA AGAGA E TAPUA’I” - LAUVI TITIUATOA ASIASI AFAMASAGA

 

O le auga lea o le tautalaga ma molimau sa fa’afofogaina i le sauniga fa’ale-aiga o le susuga le alii talavou Lauvi Titiuatoa Asiasi Afamasaga. O se tasi sa soifua a’e i Falealupo, Samoa ae na tausia, a’oga ma ua i’u fo’i lona soifua i Bellingham ma Seattle i le setete o Uosinitone. 

 

O le toe sauniga o lenei alii talavou, na fa’autataia lea i le Trinity SDA Chapel i Kent, Washington ma va’aia le to’atele o le mamalu lasilasi o le Ekalesia SDA Samoa ma le SDA a sui Papalagi sa auai, ona o le latou molimau, “Pe afai e le atoatoa le talavou i le amiotonu a le Atua, tuu ai pea ia aua, e leai lava so tatou ua atoatoa, ae o se tasi e matua fa’afiafia agaga e tapua’i, i taimi uma e auai mai ai, e tatau lava ona ta’imua i le agaga o le fa’amasani ma ni uso fou ua asiasi mai, fa’atalofa ma le laufofoga fiafia e fa’aoso fa’agae’etia ai loto o so’o se tasi e ulufale mai e tapua’i fa’atasi ma i matou uma.” 

 

O fanau a ona uso ma tuafafine, ua molimau ma le tagi i latou, aua ua amia lava le sa avea ma latou uncle sili ona pele ia i latou. “O Lauvi Asiasi poo LA, o le matou sulufa’iga pe a oo ina afaina i matou i o matou lagona ootia, pe a fia maua se mea, ae taofiofi mai e matou matua. E malamalama ai o matou loto pe ia fa’ailoa maia ia matou le eseesega o nei vaitaimi ua matou ola ai ma aso sa ola a’e ai matua ma taumafai e oo mai iinei. O ia e fa’afiafia loto, a uma loa ona matou pepese lea ma fai matou tala e fa’amalie ai matou lagona ootia.”

 

I le tele o mea sa a’oga ma ta’alo ai le ali’i talavou, e matele ina fa’aigoaina ia “Rock” ona o lona tino ma le poo o lona ao, ae maise le lanu fo’i o lona pa’u.

 

I ana uo Papalagi, Mexico ma Guam, e leai lava se isi e ese ai le latou fa’amatalaga. “O se tasi o talavou e mautinoa ia te iloa lelei e aulelei, o lana ata e matua suia ai le tele o foliga e fa’afetauia lana susuga i aso uma, e le mafai ona e se tasi na fa’ataututu ia te ia i le tulaga o pese to’atasi fa’aKaraoke. O mea na e tolu, e avea ma ona malosi’aga, ma e matua fa’afiafiaina tagata uma pe a auai LA i soo se fa’atasiga. E i ai le malosi’aga ia te ia e mafai ai ona fa’afiafia so’o se isi la te talanoa.”

 

“O se tasi e fa’amoemoeina le suifofoga i pese ma vi’iga o le Atua i soo se sauniga aua o se tasi e siufofoga lelei ma le fiafia e pese. Pe afai e i ai LA i soo se mea e faia mo le Autalavou, e mautinoa lava e tumutumu ma fiafia le tupulaga, e i ai lona tomai i le fa’amaopoopoina o loto. Ona o lea ua sola a’o talavou lona la, ua oo lava i lona taimi e malolo ai ona o a’afiaga o lona fatu sa loa ona tauivi mai ma ia.” O se molimau lea a le ta’ita’i o le Ekalesia Aso Fitu Samoa a le Ma’atulimanu i Trinity, Kent Washington.

 

O lona sauniga lea ma soso’o ai lava ma lona sauniga mulimuli ma e fa’aefuefuina lona tino ina ia mafai ona teumau pea e si ona tina peleina, Valasi Afamasaga. 

 

O le ala fo’i lea o le tumu na’ua o le sauniga i lenei vaitau o le Covid-19, ona o le to’atele o le ekasia papalagi, ona o le toe fia tepa tasi lava i foliga o LA ae le’i fa’amavae ma lenei olaga. Ia manuia lau Malaga Lauvi Titiuatoa Asiasi Afamasaga.

 

FAITAU SEFULU AFE O TAGATA SULUFAI I LAUELEELE O AMERIKA

 

Ia Setema 14, 2021 ua atoa lelei le to’a 64,000. tagata sulufai ua mae’a aumaia mai Afakanisitana e le vaega au a Amerika ina ia mafai ona latou toe masii ese mai Kabul, Afakanisitana. O le to’atele ua fa’amautu nei i nofoaga fa’apitoa o vaega au a Amerika e tatalia ai le latou fa’anofoia i so’o se setete ua fa’avasega mai e le malo e alaala ai i latou ma fa’aauau lo latou nonofo ai o se aiga i eleele o Amerika.

 

Peita’i, o se galuega na manatu e vave ona faatino ma e le umi fo’i ona nofoia e nei vaega au nofoaga a le militeri, ua tosotoso nei ona o lo ua alia’i mai ma le fa’ama’i pipisi o le misela i totonu o nofoaga o loo nonofo ai i latou uma nei. Ua iloga mai e i ai nisi o fanauiti sa malaga mai, ae ua o mai ma le misela. O nisi fo’i e to’aitiiti ua maua ane, e fa’amaonia lo latou maua i le Covid-19.

 

O lo ua to’atele o nei tagata sulufai lea ua amata nei ona tauamfai lava ia vave ona mae’a fa’atulaga o latou pepa, ae se’i saili galuega e faigaluega ai, pe a mae’a fa’amautu o latou aiga i se fale e nonofo ma faigaluega ai.

 

I totonu o Washington State lava ia, ua matua leai se mea e le fa’apipi’ia solo ai fa’asilasilaga o lo’o ua mana’omia lava tagata faigaluega.