Pago Pago - AMERIKA SAMOA

O le po o Oketopa 18, 2024 na agai atu ai leoleo i se fusuaga a ni alii se to’alua, sa faia i luma o se faleoloa.

E tusa ai ma fa’amaumauga a le malo, na valaau atu se tamaitai i le ofisa a leoleo i Tafuna ona o ni alii se to’alua o lo’o fufusu i luma o se faleoloa.

Ina ua taunu’u leoleo, na vaaia se faapotopotoga a tagta i luma o le faleoloa, ae na iloa lelei atu lava e leoleo ia le alii na a’afia i le faalavelave, ona o le manu’a i luga o lona mata taumatau ma le fula o lona mata tauagavale.  Ae ua tafe mai le toto i ona foliga ma lona mitiafu.

Na fesiligia e leoleo ia le na a’afia, i le mafuaaga o le faalavelave, ae ona tali mai, e savali mai i fafo o le faleoloa, ae alu atu le ua molia ma fesiligia o ia, po o le a le mea e mana’o ai.

Sa ta’ua e le na a’afia, e na te le iloa pe lagona le fesili a le ua molia, ona e tutuli ona taliga, ae na fa’ate’ia o ia i le savali atu o le ua molia ma ta fa’alua lona ulu i se laupapa 1x3.

Ua molia nei le susuga ia Kapeneta Tupua i le moliaga o le Fa’ao’olima i lona tulaga e lua, o se vaega ‘D’ o solitulafono mamafa, e mafai ona loka ai i le o’o atu i tausaga e lima, po o se sala tupe e $5,000; po o faasalaga uma e lua.

E $5,000 se vaegatupe na faatulagaina e tatalaina ai le ua molia, e faatalitali ai ona faamasinoga.

Ae e le’i molia Tupua, na aveina uma i la’ua ma le na a’afia i le ofisa leoleo i Tafuna, mo le fa’aauauina o su’esu’ega, aemaise ai le togafitiga o manu’a a le na a’afia.

Ma na fa’amatalaina e le tamaitai na valaau i le ofisa a leoleo, e faapea, na tu tu i fafo o le faleoloa e faatali le na a’afia, lea sa alu i totonu o le faleoloa, e faatau ni pia.  Ae na fa’ate’ia o ia ina ua alu atu Tupua ma fesiligia le na a’afia, po o le a le mea e tilotilo atu ai faapena.  Ma ia ta ina fa’alua ia le na a’afia i le laupapa 1x3.

Ina ua fa’atalanoaina e leoleo ia Tupua, sa ia faamatalaina lona va’aia o le na a’afia o inu pia i luma o le faleoloa, ae fa’ato’a mae’a atu le sa a le nu’u.  Ma sa ia fai atu iai, e le mafai ona inu pia i luma o le faleoloa, ae peitai, e le’i ano mai le na a’afia i lana faamatalaga.  O le mafua’aga lea na ia savali atu ai ma le laupapa 1x3 ma ta ai le na a’afia.