Pago Pago - AMERIKA SAMOA

FA’ALALA E SE ALII SE AGAESE I LONA USO ONA O LE MASALOSALO I LANA TEINE

Ua molia nei se alii i le Faao’olima i lona tulaga e tolu, ona o se faalavelave na tula’i mai i le po o Setema 20, 2024, lea na vala’au atu ai lona uso i le Ofisa a Leoleo. i Tafuna, ona ua nofo le ua molia ma fa’afefe lona uso i se agaese, ona ua masalosalo i lona uso (lea na valaau i leoleo) ma lana uo teine.

O le moliaga o le Fa’ao’olima i lona tulaga e tolu, o se vaega ‘C’ o soligatulafono mama, e mafai ona nofosala ai i le falepuipui, i le o’o atu i aso e 15, po o se sala tupe e $300; po o faasalaga uma e tolu.

E $500 le tupe sa faatulagaina e mafai ona tatalaina ai le ua molia e faatalitali ai lana faamasinoga.

E tusa ai ma faamaumauga a le malo, na ta’ua e le uso a le ua molia, le fa’ala la atu e le ua molia ia i la’ua ma sana uo, ia se agaese faapea ai ma le faamata’uina o i la’ua i se la’au malosi.

Ina ua taunu’u leoleo i le nofoaga na tupu ai le faalavelave, sa faamatalaina e le uso o le ua molia, le lu’iina o ia e lona uso e la te fufusu ae ina ua ia fesiligia lona uso i le mafuaaga, sa atili ai ona to’atama’i lona uso ma savali atu ai ia te ia ma se agaese.

Ma na ta’ua e le alii na valaau i leoleo, lona sola ese ona ua fefe ma ina ua fai atu i le ua molia, o le a ia valaau i leoleo, sa tali mai le ua molia, o le ia (le ua molia) fanaina o ia (uso) ma leoleo.

Sa ta’ua foi e le uso o le ua molia e faapea, na valaau atu lona uso ia te ia, i lena taeao ma tu’ua’ia o ia i se la faigauo ma lana (le ua molia) teine, ma lafoina atu ai ni faamatalaga taufa’amata’u, i luga o le telefoni.

Ina ua su’esu’eina e leoleo ia le ua molia i le ofisa a leoleo, sa ia faamatalaina i leoleo e faapea, sa iai sona masalosaloga i lona uso ma lana uo teine.

O lo’o ta’ua foi i faamaumauga a le malo le fa’asuaava o le ua molia, i le taimi na tupu ai le faalavelave.

Ma na ta’ua foi e le ua molia, o lana faamatalaga e tago e fana lona uso, ua na’o sina tala tausua.

LOKA UMA SE ALII MA LE TO’ALUA A LONA TUAFAFINE

O le aso 19 o Setema, 2024, e pei ona ta’ua i faamaumauga a le malo, sa molia ai le susuga ia Akaimo Taufete’e ma Christopher Montbriand, ona o se faalavelave na tupu i lo latou aiga.

O Taufete’e sa molia i le Fa’ao’olima i lona tulaga e tolu (sauaga i totonu o le aiga), o se vaega ‘C’ o soligatulafono mama, e mafai ona lokaina ai i le o’o atu i aso e sefululima, po o se sala tupe i le va o le $150 ma le $300; po o faasalaga uma e lua.

E $500 se vaegatupe na faatulagaina e tatalaina ai Taufete’e, e faatalitali ai lona faamasinoga.

Ae o Montbriand, sa molia i le faitauga e tasi i le le tausia o tulafono a le faamasinoga, ma o se vaega ‘B’ o solitulafono mama, e mafai ona faasala ai i le o’o atu i le tausaga, po o se sala tupe e $1,000; po o faasalaga uma e lua.

E $1,000 se vaegatupe faatulagaina e mafai ai ona tatalaina i tua le ua molia, e faatalitali ai lona faamasinoga.

E tusa ai ma fa’amaumauga a le malo, o le po lea na vala’au atu ai Montbriand, i le 911 ma ripotia atu ai le sauaina o ia e le tuagane a lona toalua, i le latou fale.

Ina ua taunu’u leoleo, sa fa’amatalaina iai e Montbriand, le tu’iina o ona foliga e Taufete’e ina ua ia oso atu e vaovao se taugaupu i le va o lona tuagane ma Taufete’e.

Ina ua fesiligia Montbriand po o ai e nonofo i totonu o le fale, sa ta’ua e le ua molia, o le fale lea a le tina a lona to’alua ma e nonofo uma ai latou ma toalua ma lo la alo, faapea ma Taufete’e ma lona to’alua ma le la fanau.

Sa faapea loa ona aveina atu e leoleo ia Montbriand i le ofisa a leoleo ina ia mafai ona togafitia ona manu’a e le vaega a le EMS.

Ae peitai, sa maua mai i su’esu’ega a leoleo, le solia e Montbriand, o se faaiuga faaletulafono a le faamasinoga, lea e faasa ai ona ia feso’ota’i atu i lona to’alua.  Ae o lea na maua atu e leoleo i le fale o lona toalua.

Ma sa ta’ua foi i su’esu’ega a leoleo, o Montbriand na mafua ai le taugaupu a Taufete’e ma lona tuafafine, po o lona toalua.