Pago Pago - AMERIKA SAMOA

LAVEA LE TAAVALE A LE TUAOI I LE MISA A SE AUUSO

O le taeao o le aso 22 o Mati, 2024, na vala’au mai ai se mafine i le Ofisa a Leoleo i Tafuna, e lipotia mai ai le fa’aleagaina o le ta’avale a se tasi o ona tausoga, i se tau’aiga ma’a a se auuso na faia i le la misa.

Ina ua taunu’u leoleo i le maota o le mafine sa lipotia atu le misa i le ofisa a leoleo, sa ia faamatalaina le faia o se latou tafaoga i luma o le fale o se tasi o ona tausoga, ae o latou faalogoina ai se tauga’upu i le va o se ‘auuso, e suafa ia Vaaimamao ma Pesaeli Poufa, i totonu o le latou fale.

Sa faamatala foi e le molimau le o’o o le misa a le ‘auuso lea i le tau’aiga ma’a ma ta’e ai le fa’amalama o le ta’avale a lona tausaga.

Na agai atu loa leoleo e tau saili ia Vaaimamao ma Pesaeli, ae peitai, sa na’o Vaimamao na o latou mauaina ma aveina atu loa o ia i le ofisa a leoleo mo le fa’aauauina o su’esue’ga.

I le faamatalaga a Vaaimamao i leoleo, na alu sana fa’atauga fuamoa i lea taeao ma ina ua ia toe fo’i mai sa ia sakaina loa le tele o fuamoa, ae totoe ai na’o ni nai fuamoa ma lona uso, o Pesaeli, ae e le i fiafia ai lona uso.  Sa ta’ua e Vaaimamao le tau’aia e Pesaeli, o fuamoa, i fafo ma le fale ma palauvale atu ia te ia, lea na amata ai loa le la tauga upu, ma i’u ai ina ona tuliesea lona uso (Pesaeli) mai i le fale.

Sa ta’ua foi e Vaaimamao lona faia o se faamatalaga e uiga i se tamaitai na feoa’i muamua ma lona uso, ma o iina na tau’ai mai ai loa o ia (Vaaimamao) e Pesaeli, i ni ma’a, lea na i’u ina tau i le ta’avale a se tasi o a latou tuaoi.

O se taimi mulimuli ane, na maua ai e leoleo ia Pesaeli, i Fagaima ma aveina atu ai foi ma ia i le ofisa a leoleo mo le su’esu’eina.

Ma e tusa ai ma se faamatalaga a Pesaeli, sa le fiafia o ia ona sa ia faatonuina lona uso (Vaaimamao) e tapena le umukuka, ae palauvale atu Vaaimamao ia te ia.  O le mea lea na ia tuli’esea ai Vaaimamao ma le fale, ae musu.

Sa ta’ua foi e Pesaeli le valaau atu o lona uso e uiga i se tamaitai sa o la feoa’i muamua ma lau atu lona valea.  Ma o le mea lea sa ia u’uina ai ni ma’a se lua ma togi mai ai Vaaimamao, ae peitai, sa tau leisi ma’a i le fa’amalama o le ta’avale a le latou tuaoi.

Ua molia nei lenei ‘auuso i le moliaga o le Faatupu Vevesi i Nofoaga Faitele – o se vaega ‘B’ i solitulafono mama, e fa’asala ai i le falepuipui i le ono (6) masina, po o se sala tupe e i le va o le $150 ma le $500; po o fa’asalaga uma e lua.

Mo Pesieli Poufa, o lo o ua molia foi o ia i le moliaga o le Faaleagaina o Mea Totino i lona tulaga tolu – o se vaega ‘B’ i solitulafono mama, e nofosala ai i le falepuipui i le o’o atu i le ono (6) masina, po o se sala tupe e $500; po o fa’asalaga uma e lua.

E $500 le vaegatupe faatulagaina e mafai ona tatalaina ai Pesaeli, e faatali ai lona faamasinoga.  Ae e le i aofia i totonu o fa’amaumauga a le malo ia se tupe fa’atulagaina mo Vaaimamao.

LOKA SE TAMALOA I LONA FA’AFEFE TAGATA I LE FANAINA O I LATOU

E tusa ai ma faamaumauga a leoleo, o lo’o ta’ua ai le agai atu o leoleo e tali se valaau mo se fesoasoani, a ni isi na valaau mai i le Ofisa a Leoleo mai Tafuna, ona o se tamaloa o lo’o fa’afefeina le tafanaina o i latou, pe afai e le talanoa i le pule o se fale nofo totogi.

O lenei fa’alavelave o lo’o lipotia le tula’i mai i le 9:05 i le po ma ua molia ai nei le susuga ia Douglas Tuigamala.

Sa faamatalaina e le mafine ne valaau i le ofisa a leoleo, sa ia lagonaina mai totonu o lona fale, le palauvale tauvala’au a Tuigamala, i fafo.  Ma na mafua ona faapopoleina o ia, i le saogalemu a lana fanau,  ona o faaupuga a Tuigamala, e faapea, o le a ia fanaina so’o se tasi, pe a le talanoa ia Talataina, le pule o fale nofo totogi.

Na fa’amatala foi e seisi molimau, e nofo ai i fale nofo totogi nei, e le o se fa’alavelave muamua lea ua tupu i lea nofoaga, i lea aso.  Sa ta’ua e lenei molimau, o le ta o le 7 i lea afiafi, na mua’i alu atu ai Tuigamala ma palauvale i luma o le fale, ma valaau ia Talataina e sau i fafo.  Na alu ese Tuigamala, ae peitai, na toe fo’i atu ma ia tapuni leotele le faitotoa o le fale a le molimau.

Sa ta’ua foi e lenei molimau lona sau i fafo ma fesiligia Tuigamala pe aisea na ia tapunia leotele ai le faitotoa o lona fale, ae tali Tuigamala, o lo’o ia tau sa’ilia ia Talataina.

Ma na faamatalaina e le molimau le tago o Tuigamala i le taga o lona ofu, ma faapea mai, o le a ia fanaina se tasi, pe afai e le sau i fafo ia Talataina.  Ona o le popole o le molimau, na ia toe foi ai i totonu o lona fale, ae sa ia fa’alogo mai ua tuitu’i Tuigamala, i faitoto’a o fale a ona tuaoi.

Ina ua agai atu leoleo i le fale o Tuigamala, sa o latou faalogoina o ia o tauvalaau mai e fa’asa ona ulufale atu seisi i totonu o lona fale.  Ae sa tatalaina mai le faitoto’a e le faletua a Tuigamala ma ulufale atu ai loa leoleo, ma ave faapagotaina le ua molia.

Ina ua taunu’u leoleo ma Tuigamala i le ofisa a leoleo i Tafuna, sa tete’e le ua molia e faia sana faamatalaga po o sana molimau.

Ua molia nei o ia i moliaga e lua, o le Faatupu Vevesi i Nofoaga Faitele – o se vaega ‘A’ o solitulafono mama, lea e mafai ona nofosala ai se tasi i le to’ese i le ono (6) masina, po o se sala tupe e $500; po o faasalaga uma e lua.

Faapea ma le moliaga lona tolu, o le Fa’ao’olima i lona tulaga e tolu – o se vaega ‘C’ o solitulafono mama, lea e mafai ona nofosala ai se tasi, i le o’o atu i aso e sefululima (15), i le falepuipui, po o se sala tupe e $300; po o fa’asalaga uma e lua.

E $3,000 le tinoitupe faatulagaina e mafai ona tatalaina ai le ua molia mai i le falepuipui, e faatali ai lona faamasinoga.