Pago Pago - AMERIKA SAMOA

LOKA NI ALII SE TOALUA I SE FUSUAGA I LE FALEKALAPU

O le po o le aso 24 o Mati, 2024, na aga’i atu ai leoleo i le fale kalapu a le Flames i Tafuna, ina ua fa’afeso’ota’i mai e le fale kalapu le faao’olima o ni alii se to’alua, i ni leoleo po (security) a le fale kalapu.

Ma a’o taumafai leoleo e ave faapagotaina nei alii, sa faapea ona papa’i le a’ao o se tasi o nei alii, i se leoleo.

Ua molia nei ia Matafa Malaki ma James Migo i moliaga o le Faatupu Vevesi ma le Fa’ao’olima, faapea ma le Tete’e i leoleo a’o faatinoina o latou tiute, mo Migo.

E tusa ai ma faamaumauga a leoleo, o le vaveao o le aso 24 o Mati, 2024 na aga’i atu ai leoleo e tali se valaau mo se fesoasoani, ona o se fusuaga na tula’i mai i le fale kalapu a le Flames i Tafuna.

Ina ua taunu’u leoleo i le nofoaga na tupu ai le faalavelave, sa faapea ona faasino ifo iai e le leoleo po (security) a le Flames, ia le taxi o lo’o iai ia Malaki.

E tusa ai ma le faamatalaga a le leoleo po (security), sa o latou taumafai e vaovao se fusuaga, ae togi atu e Malaki se fagu pia ma toeititi tau i le ulu o le susuga ia Dan Palemia, o se tasi o leoleo (security) a le Flames.

Na faapea loa ona lokaina mai e leoleo ia Malaki ma tuu i totonu o le taavale leoleo.

Ae o le taimi lea, na fa’alogoina ai e leoleo le pisa pisa o mai o se alii ma va’aia ai ni alii se to’alua o fufusu mai, o Palemia ma Migo.  Sa agai atu iai leoleo ma taofi le fusuaga a nei alii, a’o fa’aauau pea ona palauvale leotele ia le alii o Migo. 

E tusa ai ma faamaumauga a leoleo, na fai sina umi o taumafai leoleo e fa’afilemu ia Migo, ae peitai, sa fa’aauau pea ona ia tete’e atu i leoleo o lo’o taumafai e loka mai o ia, ma sa ia lafoina foi ni upu taufa’atamata’u, i leoleo.  Ma sa o’o lava foi ina ona ia so’aina le auvae o se tasi o leoleo, i lona ulu.

Ma na o’o lava i le ofisa a leoleo, o faapena lava ona taumafai leoleo e fa’afilemu le alii o Migo.  Sa le gata i le fiu o leoleo e ave o ia i totonu o le ofisa, ae ina ua mafai ona ave o ia i totonu o le ofisa, sa ia toe fa’aauau foi ona lafoina faamatalaga taufa’amata’u i leoleo.

E le o ta’ua i totonu o faamaumauga a leoleo pe na faia ni fa’amatalaga (tu’ugutu pe tusitusia) a i la’ua ua molia, ma po o le a foi le aso na lokaina ai i la’ua i le to’ese i Tafuna.

Ae o moliaga a Malaki, e aofia ai:

Faitauga 1:  Faatupu Vevesi i nofoaga faitele – o se vaega ‘B’ o solitulafono mama, e mafai ona nofosala ai se tasi i le falepuipui i le ono (6) masina, po o se sala tupe e i le va o le $150 ma le $500; po o fa’asalaga uma e lua.

Faitauga 2:  Fa’ao’olima i lona tulaga e tolu – o se vaega ‘A’ o solitulafono mama, e mafai ona nofosala ai se tasi i le o’o atu i le tausaga e tasi (1), po o se sala tupe e $1,000 po o faasalaga uma e lua.

O moliaga o Migo, e aofia ai:

Faitauga 1:  Faatupu Vevesi i nofoaga faitele – o se vaega ‘B’ o solitulafono mama, e mafai ona nofosala ai se tasi i le falepuipui i le ono (6) masina, po o se sala tupe e i le va o le $150 ma le $500; po o fa’asalaga uma e lua.

Faitauga 2:  Fa’ao’olima i lona tulaga e tolu – o se vaega ‘A’ o solitulafono mama, e mafai ona nofosala ai se tasi i le o’o atu i le tausaga e tasi (1), po o se sala tupe e $1,000 po o faasalaga uma e lua.

Faitauga 3:  Tete’e i leoleo a’o ave faapagotaina o ia – o se vaega ‘A’ o solitulafono mama, e mafai ona nofosala ai i le falepuipui mo le tausaga e tasi (1), po o se sala tupe e $1,000; po o fa’asalaga uma e lua.

E $1,000 le vaegatupe sa faatulagaina mo le tatalaina i tua o Malaki, e fa’atali ai lona faamasinoga, ae $5,000 mo Migo.

MOLIA SE TAMALOA I LE FA’AO’OLIMA I LONA TO’ALUA

O le 10:40 i le po o le aso 23 o Mati, 2024, na vala’au ai se tina i le ofisa a leoleo, ma lipotia ai le fa’ao’olima o lona to’alua ia te ia, i luma o le la fanau, e 3 ma le 5 tausaga le matutua.  Na faamatala e lenei tina i leoleo, sa o latou savavali mai ma lana fanau mai i le latou fale ma lona to’alua, i Nu’uuli ma sulufa’i mai i le fale o lona tina i Fagaima, e fa’aaoga ai le telefoni e valaau le ofisa a leoleo.

(O le a le lomia suafa o i latou o lo’o a’afia i lenei mataupu, aua le puipuiga o fanau iti).

Ina ua taunu’u leoleo i Fagaima i le fale o le tina a le ua a’afia i lenei mataupu, e tusa ai ma faamaumauga a leoleo, lo latou molimauina o ni manu’a i le fofoga o le tina ua a’afia.  Ma sa faamatala e le tina ua a’afia, na o la tauupu ma lona to’alua ona sa mana’o lona to’alua e ave le la tane kesi i le fale a ona matua, e fa’avevela ai mea’ai na totoe mai i le toana’i o le aso Sa.

Sa faamatala e le tina ua a’afia, na fai le la tauga upu i totonu o le la potu moe, ma na tulei ai o ia e lona toalua, i luga o le la moega ma ia oso atu i le tu’i fa’alua o ia i lona mata tauagavale.

Na ta’ua foi e le tina ua a’afia, lona taumafai e ‘e’e ae peitai, sa kava lona gutu e lona toalua, i lona lima.  Ma na fa’ailoa ai foi i le taimi o le su’esu’ega a leoleo, le iai o le fanau e to’alua a le ulugalii, i totonu o le potu moe, i taimi na tupu ai lenei fa’alavelave.

O lo’o ta’ua foi i faamaumauga a leoleo, le togafitia o manu’a a le tina ua a’afia i Fagaima, e le vaega a le EMS.

Na aga’i atu leoleo i le fale o le ua molia, i Nu’uuli ma sa ina ua o latou feiloai ma le ua molia, sa fa’ailoa iai e leoleo o le a aveina o ia i le latou ofisa i Tafuna mo le faatalanoaina.  Ina ua agai atu le ua molia, i totonu o le fale mo le aumaia o sona ofutino, sa mulimuli atu ai i totonu se leoleo, ma molimauina ai e le leoleo ia se toto i tafatafa o le moega i totonu o le potu moe.

Ua molia nei lenei tama e 37 tausaga mai Samoa i moliaga, e aofia ai;

Faitauga 1:  Faatupu Vevesi i totonu o aiga – o se vaega ‘A’ o solitulafono mama, lea e mafai ona nofosala ai se tasi i le falepuipui, i le o’o atu i le tasi (1) tausaga, po o se sala tupe e $1,000; po o fa’asalaga uma e lua.

Faitauga 2:  Fa’ao’olima i lona tikeri e tolu – o se vaega ‘A’ o solitulafono mama, lea e mafai ona nofosala ai se tasi i le falepuipui, i le o’o atu i le tasi (1) tausaga, po o se sala tupe e $1,000; po o fa’asalaga uma e lua.

E $3,000 le vaegatupe faatulagaina e mafai ona tatalaina ai le ua molia mai i le falepuipui, e fa’atali ai lona faamasinoga.