Pago Pago - AMERIKA SAMOA

FA’AFEFE E SE TAMALOA IA LONA ‘NEPHEW’ I SE NAIFI

O le po o le aso 22 o Mati, 2024 na lokaina ai e leoleo ia le susuga ia Saleauau Toaitiiti ma tu’ua’ia o ia, i moliaga o le Faatupu Vevesi i totonu o aiga faapea ma le Fa’ao’olima i lona tulaga e tolu.

E tusa ai ma faamaumauga a le malo, na valaau e se tina ia le Ofisa a Leoleo i Tafuna mo se fesoasoani, ona o se alii ‘ona o lo’o fa’apisa i lo latou aiga.

Ina ua taunu’u leoleo, sa faapea ona talanoa ma le alo tamaitai a le tina lea na valaau i leoleo, o ia foi lea sa molimau i le mea na tupu.  O le tamaitai molimau e uso lona tua’a ma le ua molia.

Sa faamatala e le molimau, na misa ia Toaitiiti ma lona to’alua i luga o le telefoni, i le sau o lona to’alua e piki o ia (Toaitiiti).  

O le mea lea na fai atu ai le tuagane a le mafine na valaau i leoleo, pe mafai ona moe i Vaitogi, ae atili ai le le fiafia o Toaitiiti ma liliu mai ua misa ma le tuagane a le molimau.

Ona alu lea o Toaitiiti i totonu o le fale, ae fo’i mai i fafo ma se naifi, lea na ia fa’alala i le tuagane a le molimau, ae feosofi atu le molimau ma lona tina ma ave’ese le naifi mai ia Toaitiiti.

Sa ta’ua foi e le molimau le taumafai o Toaitiiti e fasi lona tuagane, ma o le mea na valaau ai loa le ofisa a leoleo mo se fesoasoani.

Na ta’ita’i atu loa e le molimau ia leoleo i le fale ma maua atu ai Toaitiiti o lo’o nofonofo mai i tua o le fale.

Ina ua fa’ailoa atu iai e leoleo ia Toaitiiti le mafuaaga o lo latou o’o atu, ae ‘e’e mai iai le ua molia, e o e su’e lona ‘nephew’.

Sa lokaina mai loa e leoleo ia Toaitiiti ma na molimauina e leoleo le manogi pia o le ua molia.

Na mafai ona faatalanoaina e leoleo ia le ‘nephew’ a Toaitiiti ma sa ia faamatalaina i leoleo, e na o le pau lana tala na fai i lona ‘uncle’, o le nofo e moe i le latou fale, ona o la sa misa ma lona to’alua, ae ita mai ai lona ‘uncle’ ia te ia.  Sa faamatala foi e le ‘nephew’ le alu o Toaitiiti i totonu o le fale, ma aumai se naifi, ma na laki lava le taofia e lona tuafafine ma lona tina.

Ina ua fa’atalanoaina e leoleo ia Toaitiiti i le ofisa a leoleo, sa ia talosagaina se avanoa e mafai ai ona talanoa i lona aiga.  Ae peitai, na fa’ailoa atu iai e leoleo, o so’o se mataupu e a’afia ai aiga, e tatau ona fa’ao’o atu i le Ofisa a le Loia Sili.

I moliaga e lua ua molia ai nei Toaitiiti;

Faitauga 1:  Faatupu Vevesi i totonu o Aiga – o se vaega ‘B’ o solitulafono mama, e mafai ona nofosala ai se tasi i le o’o atu i aso e sefululima (15), po o se sala tupe e i le va o le $150 ma le $300; po o fa’asalaga uma e lua.

Faitauga 2:  Fa’ao’olima i lona tulaga e tolu – o se vaega ‘C’ o solitulafono mama, e mafai ona nofosala ai se tasi i le falepuipui, i le o’o atu i aso e sefulu lima (15), po o se sala tupe e i le va o le $150 ma le $300; po o fa’asalaga uma e lua.

E $500 le vaegatupe faatulagaina e mafai ona tatalaina ai le ua molia mai i le falepuipui, e fa’atali ai lona faamasinoga.

MISA SE AIGA ONA O LE FAAFOEINA O TA’AVALE

O le afiafi o le aso 19 o Mati, 2024, na valaau ai le susuga ia Iakopo Stanley, i le ofisa a leoleo i Tafuna ona o se fa’alavelave na tupu mai i lona aiga i Iliili.  E tusa ai ma le lipoti a Stanley, na alu atu lona ‘uncle’ i lona fanua ma fa’amisa atu ia te ia, ona o le fa’afoeina o lana ta’avale, lea sa ta’ua e lona uncle, sa ave ma le le fa’autauta.

Sa ta’ua e Stanley le o’o atu o lona ‘uncle’ lea ua molia, i le fa’amalama pito i luma o lona fale, a’o ia u’uina se la’au i lona lima, ma lafo atu upu tau fa’amata’u i le oti.  Sa fa’atonuina e Stanley ia lona ‘uncle’ e alu ese ma lona fanua, ae peitai, sa le usitaia e lona ‘uncle’.

Ua molia nei le susuga ia Luka Tapuaialupe, i moliaga e tolu, e aofia ai;

Faitauga 1:  Fa’ao’olima i lona tulaga e tolu – o se vaega ‘C’ o solitulafono mama, lea e mafai ona nofosala ai se tasi i le falepuipui, i le o’o atu i aso e sefululima (15), po o se sala tupe e $300; po o fa’asalaga uma e lua.

Faitauga 2:  Faatupu Vevesi i totonu o aiga – o se vaega ‘C’ o solitulafono mama, e mafai ona nofosala ai se tasi i le falepuipui, i le o’o atu i aso e sefululima (15, po o se sala tupe e $300; po o fa’asalaga uma e lua.

Faitauga 3:  Solivale fanua a isi – o se vaega ‘B’ o solitulafono mama, e mafai ona fa’asala ai se tasi i le o’o atu i le ono masina i le falepuipui, po o se sala tupe e $500; po o fa’asalaga uma e lua.

E le i ta’ua i fa’amaumauga pe fia se tupe faatulagaina, e mafai ona tatalaina ai le ua molia mai i le falepuipui, e fa’atali ai lona fa’amasinoga.

Sa ta’ua e Stanley, le lagonaina e ona tuaoi ia le la misa ma Tapuaialupe ma ina ua fa’atalanoaina e leoleo ia se tasi o tuaoi, sa ia fa’amaonia le lipoti a Stanley.  Na ta’ua e le molimau lona lagonaina o le tauga upu i le va o Stanley ma Tapuaialupe ma le lafoina e Tapuaialupe ia se faamatalaga, i lona fasiotia o Stanley.

Na faapea loa ona agai atu leoleo ma lokaina mai Tapuaialupe.  Ina ua o latou taunu’u i le ofisa a leoleo, sa tete’e e Tapuaialupe le faia o sana molimau.