Pago Pago - AMERIKA SAMOA

SAUNOA SE ALII UA MOLIA I LE FA’AO’OLIMA, NA LE MAFAI ONA TAOFIOFI LONA ITA

O le 10:55 i le po o Ianuari 9, 2025, na o’o atu ai se valaau i le Ofisa a Leoleo i Tafuna ona o se fa’alavelave na tula’i mai i le va o se tasi o se aumaga ma se tagata o le nu’u.

Na agai atu leoleo i le nofoaga na tupu ai le fa’alavelave ma maua atu le na a’afia, o saofa’i mai i autafa o le alatele, ae o lo’o li’o e le aumaga.  Sa molimauina e leoleo le tulaga pagatia o foliga o le na a’afia ma sa fa’afaigata ona ia faia se faamatalaga.

Sa ia fa’ailoa atu i leoleo ia lona le malamalama i le mafua’aga na fasi ai o ia e le susuga ia Viliami Vaito’a (lea na molia), ma o se tulaga na fa’ate’ia ai o ia.  Na ta’ua e le na a’afia le tatu’i o ona foliga e Vaito’a ma sa ia fa’aaogaina foi se samala.  Na ta’ua foi e le na a’afia, le kikiina o ona foliga e Vaito’a, ina ua pa’u i lalo.

Ina ua fa’atalanoaina e leoleo ia Vaito’a, sa ia faamatalaina ia lona va’aia o le na a’afia o savali ifo ae ua ta le sa a le nu’u i lea po.  Ma na ia vala’au atu i le na a’afia, ae palauvale mai ia te ia (Vaito’a). E le gata i lea, sa ta’ua e Vaito’a le oso atu o le na a’afia, ia te ia ma se ‘cue’ piliati, ma o le mafua’aga lea na ia tu’iina ai.

Sa faamatala foi e Vaito’a le sola o le na a’afia i le latou fale, ae o lona toe fo’i mai lea na ia (Vaito’a) faasaga ai loa i le toe fasi.  Na ta’ua e Vaito’a, ua le mafai ona ia tatali lona ita, o le mafuaaga lea na ia toe fasia ai le na a’afia.

Na faapea ona taofia le to’alua lea e le aumaga ma fa’atalitali ai se’ia o’o atu leoleo.

O moliaga na fa’asaga ia Vaito’a, sa aofia ai:

Faitauga 1:  Fa’ao’olima i lona tulaga e lua, o se vaega ‘D’ i solitulafono mamafa, e mafai ona nofosala ai i le falepuipui mo le lima tausaga, po o se sala tupe e o’o atu i le $5,000; po o faasalaga uma e lua.

Faitauga 2:  Faatupu Vevesi i Nofoaga Faitele, o se vaega ‘B’ i solitulafono mama, e mafai ona nofosala ai i le falepuipui mo le ono masina, po o se sala tupe e $500; po o faasalaga uma e lua.

E $50,000 le vaegatupe na fa’atulaga e mafai ona tatalaina ai le na molia, mai i le falepuipui, e fa’atalitali ai lona faamasinoga.

MOLIA SE ALII I LONA FA’AO’OLIMA I LE FANAU A SANA UO TEINE

O le po o Ianuari 8, 2025, na valaau atu ai se tina i le ofisa a leoleo i Tafuna, e molia ai sana uo tama, i le o’o o lona a’ao i lana (tina) fanau iti, e 4 tausaga ma le 7 tausaga.

Ina ua taunu’u leoleo i le nofoaga na tupu ai le faalavelave, sa faamatalaina ai e le tina i leoleo le po ina e lana uo tama ia le gutu o lana tama teine e 7 tausaga ma sau ai le toto i lona isu.  Ae ina ua tagi le teineititi, na palauvale iai le ua molia ma fa’atonu e alu ese ma le fale.

Sa ta’ua foi e le tina le iai foi o seisi faalavelave na tupu i le aso 4 o Ianuari, lea na po ai foi e le ua molia ia lana tama teine e 4 tausaga le matua, ma pa’u ai le teineititi ma tau lona mata i le tulimanu o le moega. 

Na fesiligia e leoleo ia le tina pe aisea na le ripotia ai le faalavelave lea na tupu ia Ianuari 4, ae na tali mai le tina, ua na iloa nei lona sese, ae ona o lea ua toe tupu fo’I, o lea ua ia logoina atu ai loa le ofisa a leoleo.

Ina ua fesiligia e leoleo ia le teineititi 7 tausaga pe o ona iloa le mea na tupu, sa tali le teineititi, na po fa’alua o ia e le uo tama a lona tina, ma toto ai lona isu.

Sa faasino e le tina i leoleo ia le fale a le susuga ia Leo Polevia (lea na molia) ma e le mamao tele mai i le nofoaga na tupu ai le faalavelave.  Ma na ta’ua e le tina le faia o se inuga pia a le na molia ma ana uo, i totonu o le fale.

Na agai atu loa iai leoleo ma fa’ailoa i le na molia ia tu’uaiga ua faasaga ia te ia, ae fa’ailoa mai e le na molia, e na te le iloa se mea na tupu.  Sa faalogoina e leoleo ia le malosi o le manogi ‘ava malosi mai ia Polevia.

Ina ua aveeseina atu e leoleo ia le na molia ma agai atu i le ofisa a leoleo, sa talosagaina e le tina ia le fia ave’eseina o ana meatotino mai i le fale a le ua molia.  Sa faapea ona fesoasoani leoleo i le ave’esea mai o meatotino a le tina mai i le fale a le ua molia.

Sa aveina foi e leoleo ia le tina ma lana fanau i le ofisa a leoleo, ma valaauina ai le vaega a le CPS (Child Protective Services), ma sa mafai ona faia se feso’otaiga ma le aiga o le tina, ma momoliina iai le tina na a’afia ma lana fanau.

O moliaga na faia e fa’asaga ia Polevia na aofia ai le Faatupu Vevesi i totonu o se aiga, o se vaega ‘C’ i solitulafono mama, lea e mafai ona nofosala ai se tasi i le falepuipui mo aso e 15, po o se sala tupe i le va o le $150 ma le $300; po o faasalaga uma e lua.

O isi moliaga e aofia ai le Fa’ao’olima i lona tulaga e tolu ma le moliaga o le faia o se tulaga e afaina ai le saogalemu o se tamaititi/teineititi; o ni moliaga i le vaega ‘A’ o solitulafono mama, e mafia ona nofosala ai i le falepuipui mo le ta’i tausaga, po o ni sala tupe e ta’i $1,000; po o faasalaga uma e lua.

E $1,000 se vaegatupe na fa’atulagaina e mafai ona tatalaina ai le ua molia, e faatalitali ai lona faamasinoga.