Pago Pago - AMERIKA SAMOA & Laie - HAWAII

TALOSAGA SE TINA UA MOLIA I LE MALIU A LONA ALO 11 TAUSAGA MO LE TATALAINA O IA I TUA

Ua i luma nei o le faamasinoga ia se talosaga a le tina ia Sina Pili, mai Laie, Hawaii, lea o lo’o lokaina ma molia i le maliu o sona alo teine e 11 tausaga, mo le tatalaina o ia, i lalo o le va’ava’aiga a le malo.

O lo’o molia Pili i le fasioti tagata le fuafuaina, faia o ni tulaga e a’afia ai le saogalemu o se teineititi, faapea ai ma le le fa’atinoina o lona tiute fa’aletina, ua i’u ai ina maliu ia Azaeliyah Pili-Ah You.

O lo’o ua te’ena e Pili ia ona moliaga uma.

I le talosaga a Pili mo le tatalaina o ia i tua i lona to’alua, ua ia talosagaina ai le fa’atulagaina e se faamasino ia aiaiga o le tatalaina o ia, ina ia le mafai ai ona ia galue ma fanau iti.

O le aso 9 o Aperila ua fuafua e faataunu’uina ai le iloiloga o lenei talosaga, ae o lona faamasinoga lea ua fa’atulagaina mo Me 12.

TU’UA’IA SE TAMALOA I LE GAOIA O KI O MASINI TA LAVALAVA

O le aoauli o le aso 19 o Tesema, 2024, na fa’afeso’ota’i ai e le pule o se fale ta lavalava, ia le Ofisa a Leoleo, ma ripotia ai le gaoia e se alii, o se fuifui ki, e ki ai a latou masina ta lavalava, ma fa’amamago lavalava.

Sa fa’aalia e leoleo, o le ua molia, o se alii ua o latou masani ai i le molia so’o i solitulafono.

Na mafai ona matamata ia leoleo i ata vitio mai i le fale ta lavalava, lea na molimauina ai le alu atu o le susuga ia Deion White (lea ua molia) i le fale ta lavalava, ma taumafai e fa’atau se fagu uaina.  

Ae ina ua liliu mai le tua o le fa’atau oloa, sa faapea ona se’i e White ia le fuifui ki na tautau i tafatafa o le laulau a le faatauoloa, lea na iai ma ki o masini ta lavalava.

Na tu’ua e le ua molia ia le faleoloa ae na toe fo’i atu i se taimi mulimuli ane, ma taumafai e tatala ia le vaega o masini ta lavalava, na iai seleni.  Ae peitai, sa le faamanuiaina ana taumafaiga.

Ae na mafai ona ia tatalaina ia le masini vai ma aveina ai seleni sa iai i totonu.  O nei mea uma sa mafai ona pu’eina i le masini pu’e ata a le fale ta lavalava.

Ua molia nei ia White i faitauga e  lua, e aofia ai le Gaoi ma le Faomea.  O nei moliaga e lua, o ni vaega ‘C’ i solitulafono mamafa, e mafai ona nofosala ai i le falepuipui, i le le sili atu ma le ta’i fitu tausaga i le moliaga, po o se sala tupe i le va o le $5,000 ma le $20,000; po o faasalaga uma e lua.

E $20,000 se vaegatupe na fa’atulagaina e mafai ona tatalaina ai le ua molia, e faatalitali ai lona faamasinoga.

LOKA SE ALII 25 TAUSAGA I LONA FA’ALALA O SE AGAESE I LONA USO MATUA MA LONA TAMA

O le afiafi o Ianuari 5, 2025, na fa’afeso’ota’i ai e se tamaloa ia le Ofisa a Leoleo i Tafuna, ona o lona atalii, le susuga ia Peter Fa’amoe.  Sa ta’ua e le tua’a a Fa’amoe, le fa’atupu vevesi o lona atalii i totonu o le latou aiga ma ia fa’alalaina atu se agaese ia te ia, ma lona atalii matua.

Sa faapea ona agai atu leoleo i le nofoaga na tupu ai le faalavelave, ma a’o latou fa’atalanoaina ia le tua’a a Fa’amoe, sa o latou lagonaina le pisa ma le palauvale solo o le ua molia.  O lea na lokaina mai ai o ia e leoleo ma tu’uina i totonu o le taavale leoleo, ma aveina atu loa o ia i le ofisa a leoleo mo le fa’aauauina o su’esu’ega.

Na fa’atalanoaina e leoleo ia le uso matua a le ua molia, ma sa ia faamatalaina le ula atu o le ua molia ia te ia, a’o ‘ai i totonu o le umukuka.  Sa ta’ua e le uso matua le ula atu o le ua molia, i lona le faia o ni galuega i totonu o le aiga, ae na’o ‘ai lava.  Ma sa tali mai iai le uso matua, e leai sana feau.

O iina na amata ai lona ona leotele ia Fa’amoe ma palauvale mai i lona uso matua, a’o iai o la matua.  O le savali atu o le uso matua ia Fa’amoe, na amata ai loa ona o la fufusu, ae feosofi atu le la tama ma se tasi o a la tausoga, e taofiofi la’ua.

Ae o le taimi lea na fa’apea mai ai le ua molia i lona uso matua, o le a ia fasiotia o ia.  Sa ta’ua foi le savali i fafo o Fa’amoe ma u’u mai se naifi mai i luma o le fale, ma togi ai lona uso matua.  Ona ia tago lea i se agaese ma fa’ala la mai i lona uso matua, ma lona tua’a ma faapea mai, o le a ia tipitipiina i la’ua.

I le molimau a le tua’a a le na molia, sa ia fa’amaonia ai faamatalaga uma sa faia e lona atalii matua, e o’o lava i le fa’ala la atu e le ua molia, o le agaese ia la’ua ma lafo atu ni upu taufa’amata’u ia i la’ua.

Sa faamatalaina foi e le tua’a a le ua molia, e le o se taimi muamua lea ua faia ai e le ua molia lea tulaga i totonu o le latou aiga.

O le faamatalaga a Faamoe, i leoleo, ina ua faatalanoaina o ia, sa le fiafia i lona uso matua, ona e na’o le ‘ai ae le faia se galuega i le latou aiga, i aso uma.  Ma sa ia fa’amaonia lona palauvale i lona uso ma lona tu’iina o ia.  Ma lona savali i fafo ma u’u mai se naifi ma togi ai lona uso matua.

Ma na ia fa’amaonia foi lona fa’ala la o se agaese i lona uso ma lona tama, ma lafoina iai ni upu tau fa’amata’u.

Ua molia nei Fa’amoe i le moliaga o le Faatupu Vevesi i totonu o lona aiga ma le Fa’ao’olima i lona tulaga e tolu.

O le moliaga o le fa’atupu vevesi, o se vaega ‘C’ i solitulafono mama, e mafai ona nofosala ai i le falepuipui i le o’o atu i aso e 15, po o se sala tupe i le va o le $150 ma le $300; po o faasalaga uma e lua.

O le moliaga o le fa’ao’olima, o se vaega ‘A’ i solitulafono mama, e mafai ona nofosala ai i le falepuipui, i le o’o atu i le tausaga, po o se sala tupe e $1,000; po o faasalaga uma e lua.

E $1,000 se vaegatupe na fa’atulagaina mo le tatalaina o le ua molia, e faatalitali ai lona faamasinoga.

MOLIA SE ALII I LE FA'AFOEINA O SE TA'AVALE A’O FA’ASUAAVA MA LE LEAI O SONA LAISENE AVETA'AVALE

O le taofiga o le taavale a le susuga ia Kuresa Selesele i le aso Kerisimasi 2024, na molia ai o ia i le aveta’avale ae o lo’o fa’asuaava ma le fa’asala o lana laisene aveta’avale.

E tusa ai ma fa’amaumauga a le faamasinoga, o lo’o ta’ua ai le va’aia e ni sui malu o le malo sa tiuteina se vaega o le alatele, ia se taavale i luga o le alatele e leai sona laisene.  Na faapea ona taofia ai loa e leoleo lea taavale i luma o le faleoloa a le US Mart i tafatafa o Futiga.  Sa molimauina ai e leoleo le mu o totonu o mata o le aveta’avale (le na molia) ma le malosi o le manogi pia i totonu o le taavale.

Na fa’ailoa atu e leoleo ia Selesele le mafua’aga na taofia ai lana taavale ma sa fesiligia foi o ia pe sa ia tagofia se ‘ava malosi, lea sa tali mai ai le na molia, e leai.  Sa ia fa’ailoa atu i leoleo, o ia lea e agai atu i le latou fale mai i le fale a sana uo.

Sa ripotia foi e leoleo le malosi o le manogi ‘ava malosi a le na molia ma sa leai sana laisene aveta’avale se’ia vagana ia lana ID na tago i le tu’u atu i leoleo, e faamaonia ai lona tagata.

Na fa’atonuina loa e leoleo ia Selesele ina ia sau i fafo mai i lana ta’avale mo le fa’ataunu’uina o ni suesuega e fa’amaonia ai po o fa’asua’ava pe leai.  Sa fa’atolu ona faia le su’ega a le na molia ma sa fa’amaonia fa’atolu lona tagofia o ‘ava malolosi.  

Sa faapea foi ona fa’ailoa atu e le ua molia, i leoleo, le ave’esea e le faamasinoga o lona laisene avetaavale.  Ma ina ua siakiina e leoleo ia fa’amaumauga a le faamasinoga, sa fa’amaonia ai le fa’asalaina o lana laisene aveta’avale.

O moliaga na tu’ua’ia ai Selesele, na aofia ai lona solia o se tulafono ina ua ia fa’afoeina se taavale, o se vaega ‘D’ i solitulafono mamafa, e mafai ona nofosala ai i le falepuipui i le va o le 90 aso ma le lima tausaga, po o se sala tupe e $5,000; po o faasalaga uma e lua.

Faapea ai ma moliaga o le leai o sona laisene aveta’avale ma le le ola o moli o lana ta’avale, o ni vaega ‘B’ i solitulafono mama, e mafai ona nofosala ai i le falepuipui i le le silia ma le ta’i ono masina i le moliaga e tasi, po o se sala tupe e $500; po o faasalaga uma e lua.

Ma le moliaga mulimuli, o le fa’afoeina o se ta’avale a’o fa’asuaava, o se vaega ‘A’ i solitulafono mama, e mafai ona nofosala ai i le falepuipui, i le o’o atu i le tausaga atoa, po o se sala tupe e $1,000; po o fa’asalaga uma e lua.

E $2,000 le vaegatupe na fa’atulagaina, e mafai ona tatalaina ai le ua molia, e faatalitali ai lona faamasinoga.

MOLIA SE ALII 21 TAUSAGA E LE’I ILOA O SE SOLITULAFONO LE INU PIA O SE PASESE I TOTONU OSE TAAVALE

E tusa ai ma fa’amaumauga a le fa’amasinoga, o le po o Tesema 20, 2024, a’o feagai ai leoleo ma latou tiute i luga o le alatele, sa o latou taofia ai se taavale i luma o le CBT.  A’o talanoa leoleo ma le aveta’avale, sa o latou iloa atu le pasese o le ta’avale, o lo’o ia u’uina se apa pia o lo’o matala.

Na faapea loa ona fa’aafe e leoleo ia le taavale i autafa o le auala.  Ma na fa’ailoa atu e le aveta’avale i leoleo, ua alu le aso o inu pia le susuga ia Toriano Silva (le na molia), a’o la feoa’i fa’atamilo i le motu, ma sa ia fa’atonuina foi Silva e tu’u loa lana inu pia.

Sa faatonuina e leoleo ia Silva e oso mai i fafo mai le ta’avale, ae pa’u mai ai nisi apa pia e lua.  Na ta’ua e Silva, e na te le’i iloa e fa’asaina ona inu pia se pasese i totonu o le taavale.

Na fa’atagaina e leoleo ia le fa’aauauina o le malaga a le aveta’avale, ae ua o latou taofia Silva mo le fa’aauauina o a latou su’esu’ega.  Ma na molia Silva i le moliaga o le taumafaina o se ‘ava malosi i se nofoaga e fa’asa ona taumafa ai ‘ava malolosi.

O lea moliaga o se vaega ‘B’ i solitulafono mama, e mafai ona nofosala ai i le falepuipui, i le o’o atu i le ono masina, po o se sala tupe e $500; po o fa’asalaga uma e lua.

E leai se tupe na fa’atulagaina, e tatalaina ai le na molia mai i le falepuipui, a’o fa’atalitali lona faamasinoga.

LOKA SE TAMAITAI I LALO O SE FA’ATONUGA MAI I LE FAAMASINOGA

I totonu o fa’amaumauga a le faamasinoga, o lo’o ta’ua ai le taofia e leoleo o le ta’avale a se tamaitai Fiti e 42 tausaga le matua, e suafa ia Farin Maui, ona o se fa’atonuga mai i le fa’amasinoga talu ai sona moliaga muamua, i le aveta’avale e aunoa ma se laisene aveta’avale.

Na va’aia e leoleo ia le agai atu o le ta’avale a Maui i le itu i Sasa’e o le motu ma o latou taofia ai loa le taavale a Maui.  E tusa ai ma le fa’amalamalamaga a leoleo ia Maui ina ua taofia o ia, o le fa’asalaga o le laisene aveta’avale a Maui mai i le fa’amasinoga, na amata mai ia Ianuari 24, 2024 ae e fa’ato’a mae’a lea fa’asalaga ia Ianuari 24, 2026.

O le aso lava lea na lokaina atu ai e leoleo ia Maui ma aveina sa’o atu o ia i luma o le faamasinoga faaitumalo mo lona faamasinoga.

O ona moliaga, na aofia ai le aveta’avale faasolitulafono, o se vaega ‘D’ i solitulafono mamafa, e mafai ona nofosala ai i le falepuipui i le va o aso e 90 ma le lima tausaga, po o se sala tupe e $5,000; po o faasalaga uma e lua.

Faapea ma le moliaga o le fa’afoeina o se taavale, e aunoa ma se laisene aveta’avale.  O se solitulafono i le vaega ‘B’ i solitulafono mama, e mafai ona nofosala ai i le falepuipui i le le sili atu ma le ono masina, po o se sala tupe e $500; po o faasalaga uma e lua.

E $2,000 se vaegatupe na fa’atulagaina e mafai ona tatalaina ai le na molia.