Pago Pago - AMERIKA SAMOA

Sa faataunu’uina e le Komiti o le Faagaioiga o le Malo, a le Maota o le Senate, i lenei vaiaso, ia sa latou iloiloga i se pili “e suia ai manaoga ma tu’utu’uga mo Faatonusili o Matagaluega Faakapeneta ma Faauluuluga o vaega ma ofisa i lalo o le Ofis ao le Kovana.”

O lenei i’ugafono na fa’aulufaleina e le Taitaifono o le Komiti, le Afioga i le Senatoa ia Togiola T.A. Tulafono ma o lo’o ta’ua ai e faapea, o faatonu o matagaluega ma ulu o ofisa galue po o ofisa, e le lipoti i se ulu po o se taitai ofisa, faapea ma ofisa ma matagaluega i lalo o le Ofisa o le Kovana, e tatau ona fa’amaonia e le Maota Fono.   

E le gata i lea, ua ta’ua ai le tatau i faatonusili uma, o ni sitiseni po o Nesionale a le Iunaite Setete, e tupuga mai i Amerika Samoa, ma sa avea ma tagata nofo mau i Amerika Samoa  mo le 12 masina ae le’i o’o ina fa’amaoniaina, ma e le’i fa’amaonia se solitulafono.

E ui ina sa fa’asalalauina se iloiloga fa’alauaitele mo le tapaina o ni manatu ma finagalo a le mamalu lautele, e faatatau i lenei mataupu, ae peitai, sa leai nisi na auai atu i lea iloiloga.  Ae e pei ona sa saunoa Togiola, ua o’o atu i le komiti ia ni molimau tusitusia mai i le mamalu lautele, faapea alo ma fanau a le atunu’u, o lo’o tautua i totonu o vaega’au. 

O le atugaluga muamua sa faaleoina e Togiola, mai i tama fanau o le atunu’u i totonu o le militeri, e faatau i le taimi e toe taliu mai ai pe a mae’a la latou tautua i totonu o vaega’au, ae ua le mafai ona apalai mo nei tofiga ona e le i atoa le 12 masina o nonofo i totonu o le teritori.

“E sa’o le fautuaga,” o le saunoaga lea a Togiola.  “Ona e iai avanoa e fusifusia ai tulaga ia, ma fesiligia ai se tofiga o se tasi fa’ato’a uma mai tautoga, fo’i manuia mai i le aiga, ae e le’i atoa tausaga e pei ona manaomia e le tulafono.”

“I tulaga o isi fuafuaga faalemalo, ua uma ona fo’ia o tulaga ia.  Sa iai le manatu, o tulaga ia ua mafai ai ona fo’ia o le faafitauli mo le tulafono taufa’aofi.  E pei ona iai le fuafuaga i le palota.  O le tagata e tauto I le militeri, uma tausaga ma toe fo’i mai i totonu o le tausaga, ua uma o le tautoga, e leai se mea e afaina ai.  E le lusi le nofomau a lea alo o le atunu’u, ua i’u manuia tautoga i le malo tele.  A toe fo’i mai o ia, o ia lava o le tagata e nofo I totonu o le atunu’u,” o le tau faamanino mai lea a Togiola.

O leisi mataupu sa fa’atula’i mai e alo ma fanau o le atunu’u i totonu o le militeri, o i latou ia sa fananau i totonu o Amerika Samoa ma ua ta’ua i latou o Nesionale a le Iunaite Setete, ae o matua e mai i le malo o Samoa Tuto’atasi.  Ma ua le agava’a ai i latou, i lalo o le vaega o le pili taufa’aofi, o lo’o ta’ua ai le “tupuga mai Amerika Samoa”.

Na saunoa Togiola, “e tutusa lelei lava ia le alo lea ma se alo o se Filipaina.  E Filipaina uma matua ae fanau iinei, ua Nesionale, alu i fafo, alu i totonu o le militeri.  E tutusa lelei lava lona tulaga ma le Samoa moni lea.  E faapena foi se alo o se Saina po o seisi atunu’u mai fafo, i tulaga ia.”

“E iai le moni o latou lagona ua aumai ma e tatau foi ona iloa le alofa.  Aua o lea ua ou manatu, e iai le faataitaiga ona aafia ai, e pei ona iai le tulaga lea ua iai le Loia Sili (Gwen Tauiliili-Langkilde).  O le tamaitai lea, o lona tama o le Samoa [i Sisifo].  O lona tina o le sitiseni Amerika.  E le’i a’afia la i totonu o le tusiga o le pili lea, ia le ituaiga matua lea,” o le faamanino mai lea a Togiola. 

Sa saunoa atili Togiola, afai ae na pasia lenei pili taufa’aofi ae e le’i pasia le tofiga a le tamaitai Loia Sili, semanu e le agava’a o ia, e apalai.

Na faapea ona faamamafaina e Togiola ia le loloto o sootaga i le va o Samoa e lua, ma ia u’una’ia ai afioga i Senatoa ina ia saili se auala e mafai ai ona faatagaina tama o Nesionale a le Iunaite Setete ma Samoa Tutoatasi, o lo’o tauto i totonu o le militeri, ona agava’a mo nei tofiga.

“E le o ni tulafono faigofie lea e tatou te mafaufau iai, i tulafono taufa’aofi ia.  O le agaga e tasi, e le o mea e tatou te popole ai i aso nei, ae a tatou va’ava’ai i le lumanai i leisi 10 ma le 20 tausaga.  O le a le mea o le a tupu i o tatou alo ma fanau.  Ina ne’i ave ave, o mai tamaiti ua taamilomilo i fafo, ae ua ese tagata ia e faia le galuega,” o le faamamafa mai lea a le afioga i le Senatoa.

I se manatu na fa’atula’i e le Peresetene o le Senate, le afioga ia Tuaolo Manaia Fruean, sa ia fautuaina ai le ave’esea o le upu “Amerika” ae tu’u iai na’o le upu ‘Samoa’, mai i le fuaiupu o le pili, “ia mautinoa ai o faatonusili o Sitiseni po o Nesionale o le Iunaite Setete e tupuga mai Amerika Samoa.”

Sa fa’aluaina e le Afioga Togiola ia lea manatu.

I le saunoaga a le Afioga i le Senatoa ia Utu Sila Poasa sa faatatau i tagata e tali tutusa o latou tulaga ma le Loia Sili ma ia fautuaina ai le fausia o seisi vaega o le pili, e mafai ai e tagata o iai tulaga faapea, ua atoa le 20 tausaga o tautua ma le fa’amaoni i totonu o le teritori.

“E iai nisi o militeri, e ritaea, ona nofonofo lea i fafo, pe fia ni tausaga, ona sau lea, ua ‘exempt’ i latou.  E tatau ona tatou foi i tua i le taimi na ‘discharge’ ai mai le militeri, ona aumai lea o le tausaga lea e tasi, e [faataga] ai le ‘exempt’ lea, ina ia fea uma tagata,” o le saunoaga lea a Utu.

Sa toe tau faamanino mai e Togiola, o lo’o ia taumafai ina ia mulimuli lenei i’ugafono i le tulafono o le palota.  “Aua o le tulafono o le palota, e le ‘lusi’ penefiti a le tagata militeri.  Ae a uma la le tautoga, e tatau i le tagata ona toe fo’i mai iinei i totonu o le tausaga atoa.  A uma le tausaga ae e le’i foi mai le tagata lea ua litaea, ona lusi loa lea o lona tulaga nofo mau, ona toe amata lea o lona ‘resident’, aua ua le toe militeri.”

Na toe fesiligia e Utu le tulaga i alo ma fanau a tagatanu’u o Amerika Samoa o lo’o i totonu o vaega’au, o lo’o fananau i atunu’u i fafo, po o atunu’u o lo’o latou tautua ai.

Sa saunoa Togiola, “O i latou o sitiseni.  Aua o alo ma fanau a outou sa i le militeri, o outou o sitiseni.”

Na faaleoina e le Afioga i le Senatoa ia Tuana’itau Malaki Togiola sona atugaluga e tusa ai ma tagata o Swains, ona o lea ua ta’ua i le pili taufa’aofi, e na o tagata e tupuga mai i tagata Samoa.

Ae sa faamanino mai e Togiola, o lo’o tali ia le faaupuga i le amataga o le pili, i atugaluga a le afioga i le Senatoa, ona o Swains, o se vaega o le Teritori a Amerika Samoa.  Ma na ta’ua foi e Togiola, o lo’o galulue ia loia a le Senate I se fa’aupuga talafeagai, e aofia ai tagata o Swains i le suiga o le pili.

I le manatu fa’aalia a le Afioga i le Senatoa ia Olo Uluao Letuli, sa ia faaleoina ai sona atugaluga ina ne’i faapea, ua fa’ailoga lanu ia le pili, ona o lo’o faasa ai tagata e leai ni o latou so’otaga i Amerika Samoa ae ua silia ma le 20 tausaga o nonofo ma galulue i totonu o le teritori.

Na ta’ua e Olo ia le susuga ia James McGuire, o se sitiseni o Amerika ae ua atoa le 50 tausaga o nofo ma galue i totonu o Amerika Samoa.

E ui ina sa aloaia e Togiola ia le atugaluga a Olo, ae peitai, sa ia saunoa mai e faapea, “e mata’u i le tulaga lea, aua o so’o se tagata mai i atunu’u i fafo, e alu i Amerika fai lona sitiseni ma toe fo’i mai, e leai se ‘ese’esega ma le tulaga lea na saunoa iai le Senatoa.  O lona uiga ua toe ave’ese atoa le puipuiga atoa lea e tatou te taumafai e ave, ia aua ne’i motusia le so’otaga Samoa i totonu o mea ia.  Ona o le mea e tatou te va’ai iai, afai o le tulaga e agai i luma, e iai le aso e tatou te va’ai atu o le afa o le Maota o Sui ua le o ni Samoa.”

“O le popolega lea e aumai i le tulafono taufa’aofi, ina ne’i ave ave, iai ni tausaga e le o mamao, ua tatou le toe vaai i ni alo o Samoa, ae ua amata ona tofi mai isi tulaga ia i latou e fa’atautaia le malo,” o le saunoaga lea a Togiola. 

Na fa’aauau ona saunoa Togiola e tusa ai ma ni faitioga o le a faia e faasaga i le Fono, i le ‘fefe vale’, ae sa ia faamamafa mai e faapea, e tatau ona faia se gaioiga i le taimi nei, aua alo ma fanau o le lumanai, ma o latou aiga.

Sa ia faamamafaina mai e faapea, afai e le faia se fuafuaga i lea tulaga i le taimi, o le a o’o ina tuai.  Mo se faataitaiga, sa ia faamatalaina ai le tulaga i le Faigamalo a Trump, lea ua taitaia e Elon Musk, o se tagata na fanau i Aferika i Saute, ae ua avea nei ma sitiseni i Amerika, ia le vaega su’esu’e a le DOGE ma ua faitau afe tagata faigaluega o le malo feterale, ua ia fa’ate’aina mai galuega ma ua avea ma tulaga ua le mautonu ai tagata.

Saunoa Togiola, o se tulaga faapena, e ono tupu i totonu o Amerika Samoa pe afai e latou te le faia iai se fuafuaga i le taimi nei.

Na saunoa le Afioga i le Senatoa ia Gaoteote Palaie Tofau, atonu e fa’ailoga lanu se faalogo i le pili, ae e mo le lumanai o a tatou alo ma fanau, ina ia puipuia ai o latou faasinomaga mai i le tagata e le o ni Samoa ae o iai le aia tatau e nonofo ai i totonu o le teritori, ona o latou tulaga o Nesionale po o sitiseni.

Sa ioeina e Togiola le fa’ailoga lanu o le ii’ugafono taufa’aofi, ae sa ia toe faamamafaina ia mafuaaga sa faavaeina ai, e sili atu lona taua, o le fa’amautuina o le tumau o le Malo o Amerika Samoa i  lima o tama fanau a Amerika Samoa.

Sa ta’ua foi e Togiola ia tulafono tau fanau, lea o lo’o ma’oti mai ai, afai e le 50  pasene toto Samoa, e le mafai e se tagata ona pulea ni fanua.  Ma sa iai nisi o tagata sitiseni o Amerika ua faia ni a latou tagi i le Faamasinoga Maualuga a Amerika e faapea, e fa’ailoga lanu lea tulafono.

Ae peitai, i le faaiuga a le faamasinoga na ta’ua ai le fa’atagaina o nei ituaiga tulafono faailoga lanu i fanua lotoifale, aua e taua le puipuia o fanua ma le aganu’u a Amerika Samoa.

O le a fa’apea ona tu’uina nei faaopoopoga i totonu o le pili taufa’aofi, ae e le’i toe fa’aulu mo lona faitauga lona lua.