Pago Pago - AMERIKA SAMOA

DONALD KRUSE

Sa faatumulia le Maota o le Senate i le taeao o le aso Lua na se’i mavae atu, i aiga, uo ma le aufaigaluega a le Ofisa o Tupe, sa faapea ona auai atu i le iloiloga o le susuga ia Donald Kruse, lea ua filifilia e le Afioga i le Kovana, e avea ma Tausitupe fou a le malo.

I lana saunoaga amata, sa fa’alauiloa mai ai e le Afioga i le Senatoa ia Utu S. Poasa, le Taitaifono o le Komiti o Paketi a le Senate, ia le susuga i le Fa’afeagaiga, ae o se alii faipisinisi.  Ma na ta’ua e Utu ua mae’a ona ia va’ai i tala’aga o le soifuaga galue faapea ma faamaumauga lagolago, a Kruse, ae e na te le’i tau i sana tusi talosaga mo lenei avanoa.

Na fesiligia e Utu ia Kruse pe na apala imo le avanoa, pe sa piki sa’o mai lava o ia e le Afioga i le Kovana.  Sa tali mai Kruse, na ia apala imo lenei avanoa e ala i le fa’auluina o lana ‘resume’ po o le tala’aga o lona soifuaga galue.

Sa ta’ua e Utu le saunoaga a le afioga i le Kovana i le tatalaga o le tauaofiaga lona 39 a le Fono Faitulafono, lea sa ia ta’ua ai le le ausia o le $41 miliona o le tupe aoina taumate i le kuata muamua, ina ua na’o le $28 miliona o tupe a le malo, na aoina i le faaiuga o le  kuata muamua o le tausaga tupe 2025.

Na saunoa Utu, o le a avea lea faafitauli ma tulaga o le a feagai ai le Malo o Amerika Samoa ma se ‘deficit’ e $55 miliona, i le faaiuga o le tausaga tupe.

Sa faapea ai ona fesiligia e Utu ia le sui Faatonu pe ua ia faia se su’esu’ega e tusa ai ma lea faafitauli ma po o a ni sitepu a le malo ua faia, e fofoina ai lenei faafitauli.

Na faamanino mai e Kruse, e na o le lua vaiaso talu ona filifilia o ia i le tofiga fou ma o fuainumera sa ta’ua e le kovana, o lo’o faavae i ulua’i ripoti, e le’i faamautuina.  Ae peitai, o lo’o manaomia ona fa’aitiitia ia tupe alu, o le mafuaaga lea sa fa’amalosia ai se tulafono e fa’aitiitia ai tupe fa’aalu i le sefulu pasene.  

Sa fa’aalia foi e Kruse, o lo’o latou galulue i le sailiga o nisi auala e mafai ai ona fofoina lenei faafitauli.

Na fa’aleoina e Utu sona atugaluga pe afai ae fa’aauau ai pea lenei faafitauli, ma lona le mautonu pe faapefea ona totogia tagata faigaluega a le malo, ma isi pili, ma e ono i’u ai ina tapunia le malo.

Sa saunoa le Afioga i le Senatoa ia Magalei Logovi’i ua na’o le lua vaiaso talu ona galue le sui Faatonu ma atonu e le o ia te ia uma tali o a latou fesili.  Ae sa ia fa’atula’i se mau, pe afai ae pasia le tofiga a Kruse, ia toe valaau o ia pe a mavae e masina, e mafai ona sau e tali uma a latou fesili tau tupe.

Ae ia fa’atatau ia fesili i le agava’a o le sui filifilia.

Sa faapea ona lagolagoina e le Afioga i le Peresetene o le Senate, Senatoa Tuaolo Manaia Fruean, ia le finagalo fa’aalia a Magalei.  Na ta’ua e Tuaolo le tele o ni fesili mo le sui Faatonu, e aofia ai le tupe lea sa nono e le malo mai i le Teugatupe a le Ritaea.

Ae sa toe faamamafaina e Tuaolo, o le iloiloga ua na ona fa’amaonia ai le agava’a o le sui filifilia, ae e mafai ona toe su’esu’eina o ia i se taimi mulimuli ane, pe afai ae pasia lona tofi Faatonu.

Sa fa’aalia e Tuaolo le fa’ate’ia o ia ina ua ia va’aia Kruse o alala mai i leisi itu o le maota, a’o ia agai atu i lona nofoa.  Ma o lea na ia toina ai le fa’asolo sa i lona ua, ma fa’aula ai Kruse. Na fa’aauau ona saunoa Tuaolo i le uiga o lana gaioiga sa faia i le aganu’u, o se gaioiga a se tama po o se matai, ua iai lona fa’atuatuaga i le agava’a o lona atalii, e tausia le aiga.  

I le tu ma le aganu’u fa’aSamoa, a ‘Faaui le ula’ a le tama i lona atalii, ua fa’aali mai ai le ave’esea o le pule mai i le tama, ae tu’uina atu i le atalii.  I le mae’a ai o le saunoaga a Tuaolo, na ia fa’atonuina ai Kruse, ina ia toe la’ei lana fa’asolo ma sa faapea ona faia e Kruse.

Sa toe faapea mai Tuaolo, atonu e le o oe o so’u atalii, ae o oe o lo’u tama fa’aleagaga.  Na fa’aauau ona saunoa Tuaolo e faapea, ua leva ona ia faatalitali po o ai o le a filifilia e le kovana e avea ma Tausitupe a le malo, ona o le taua o lenei tiute i totonu o le malo.

Ma sa ta’ua e Tuaolo e faapea, o lenei tofiga e mana’omia ai se tagata ua mautu i tulaga tau tupe, aua o le a le fa’aosoosoina ai lea tagata e gaoi ma ave fa’anana tupe a le malo, ma isi lava gaioiga le faamaoni.

O lea na saunoa ai Tuaolo, o le filifiliga o Don, e mai i le Atua.  Ma sa ia ta’ua le leva ona oi le atunu’u.  Ma ia fesiligia ai po o fea ua alu ai le $36 miliona.  O le $2 miliona mo le toe fa’aleleia o le fale lea sa iai le faletupe a le ANZ i Fagatogo.  Sa ia fesiligia foi po o fea o le a se’e iai le ofisa a le Kovana.  Ma po o fea le $1.5 miliona lea na fa’atulagaina mo se malaevaalele i le motu o Swains.

Ua fia malamalama le afioga i le Peresetene o le Senate, po o fea ua alu iai nei tupe.

Sa saunoa foi Tuaolo e tusa ai ma lona iloiloina o ripoti i le galuega mo le toe faaleleia o le fale lea sa iai le ANZ i Fagatogo, ma e na’o le $100,000 o lo’o totoe.  Ma sa ia fa’alauiloa mai le tatau ona tali se tagata i nei mea.

Na fa’aalia foi e le Afioga i le Peresetene o le Senate, o le tagavai a le Iunaite Setete, o le Faatuatua i le Atua, ae o Amerika Samoa, “Samoa, Faamuamua le Atua”.  “Ae o le a le mea ua tupu?  Ua fa’amuamua e tagata o latou mana’oga, ua fa’amuamua mea e mana’o ai, ae ua tu’u le atunu’u.”

Sa ia ta’ua foi, “Atonu o le mea lea ua aumai ai oe, tago e faasa’o mea ia Don.”  Ma lana toe upu i le maota, “O fea o iai le tofa a le maota, le Teutupe lea a le atunu’u.”

Sa fa’ai’uina e le Afioga i le Senatoa ia Muagututi’a Tauoa ia le iloiloga, i le si’i maualuga o ona a’ao ma ia faamanuia atu i le sui Faatonu, ae le gata i lea, i lona tofi Fa’afaifeau.

Na fa’aleoina e Kruse lona agaga fa’afetai mo faamanuiaga ua ia paleina i lea taeao ma sa ia ta’ua e faapea, na ia mana’o i le tofiga ina ia fesoasoani i le malo ma tagata o Amerika Samoa.

I le fa’aiuga o le palota a le Maota o le Senate, sa pasia ai Kruse i le 13-2.

Ma o le vaiaso fou o le a palotaina ai lona tofiga e le Maota o Sui, ina ua mae’a lona iloiloga i le aso Lua.

Ae i le palota a le Maota o Sui i le aso Lua, mo Tim Jones, sa le’i fa’amanuiaina ai le sui Faatonu, ina ua palota Faipule, 6 ioe, 12 leai.  Ona toe talosaina lea e le Fofoga Fetalai ia le toe faia o seisi palota, lea na ‘auai ai finagalo o afioga Faipule, ma o le vaiaso fou ua fuafua e toe palotaina ai Jones.

BARNEY SENE

O le iloiloga lona lua a le Senate i le aso Lua, e mo le tofiga Faatonu a le susuga ia Barney Sene, e avea ma Faatonusili o Malaevaalele ma Uafu.

Sa fa’alauiloa atu ai e le Afioga i le Senatoa ia Muagututi’a Tauola, o sona alo le sui Faatonu, o se lupe faalele a le Itumalo a Sua, na malaga atu i fafo ae ua toe taliu mai e tautua le teritori.

Na saunoa Muagututi’a ma fa’ailoa atu i le sui Faatonu, o lo latou taimi lenei ma o le latou tofiga, o le pasiaina o i latou.  

Sa faapea ona lagolagoina e le Afioga i le Peresetene o le Senate ia Tuaolo Manaia Fruean, ia le manatu fa’aalia a Muagututi’a ma ta’ua ai e Tuaolo, a mae’a ona pasia Sene, e mafai ona toe valaauina o ia, i seisi iloiloga e talanoaina nisi o mataupu o lo’o atugalu ai le Senate e tusa ai ma lea Matagaluega.

Na faapea foi ona pasia Sene i le palota a le Senate, 15-0, i le latou tauaofiaga na soso’o ai.  Ma sa faapea foi ona pasia lona tofiga a le Maota o Sui i le aso Lua.