Pago Pago - AMERIKA SAMOA

O le amataga o le vaiaso nei, sa fa’alauiloa aloaia mai ai e le afioga i le Kovana, ia Lemanu P. S. Mauga, ia le pasiaina e le Matagaluega o Fa’ato’aga a le Malo Tele, ia penefiti mo alo ma fanau a’oga, lea e ta’ua o le ‘Summer Electronic Benefits Transfer (S-EBT)’.

O lenei faamanuiaga ua tino mai ona o le galulue so’otau’au a le Ofisa o le ‘Human and Social Services’ (DHSS) ma le Ofisa o A’oga.

E $2.5 miliona lea ua mae’a ona fa’aagaga mo lenei fuafuaga aua penefiti o taumafa mo le soifua maloloina a alo ma fanau a’oga o le teritori, pe a ma le to’a 14,464, mo lenei tau mafanafana (summer 2024).

Na fa’aalia e le afioga Lemanu lona agaga fa’afetai i le ofisa a le USDA mo le taliaina o le talosaga ma le fa’atagaina o Amerika Samoa, e auai faatasi ma isi setete ma teritori, i le amatalia o lenei polokalama fou e fesoasoani i aiga o iai fanau a’oga, aua le faatauina o taumafa mo aiga, a’o feagai a’oga ma malologa i leisi tolu masina, po o le tau mafanafana.

E le gata i lea, na fa’aalia le agaga fa’afetai a le afioga i le Kovana i le susuga ia Tom Vilsack, le Failautusi a le USDA faapea taitai o le FSN (Food and Nutrition Services) mo le taliaina o le talosaga aua le taofia o nisi o aiaiga, lea ua mafai ai nei ona tufatufaina lenei vaegatupe mo alo ma fanau a Amerika Samoa.

O lenei polokalama o le ‘Summer EBT’, o se polokalama tumau a le Malo Tele, ina ua pasiaina le tulafono o le ‘Consolidated Appropriations Act’ i le tausaga e 2023, lea sa amataina i le tausaga nei.

Ma e pei o isi polokalama faapenei ua mavae atu, e le otomeki ona tatalaina mai nei vaegatupe.  E tele ni ala ma aiaiga e tatau ona uia e le malo o Amerika Samoa, ona fa’ato’a mafai lea ona maua e Amerika Samoa vaegatupe o lenei polokalama.

Ae o le ‘Summer EBT’ 2024 mo Amerika Samoa, ua fai sina ese, mo se faataitaiga, ua le faamalosia le totogia e Amerika Samoa o le 50% (mandatory federal match) mo le 2024 S-EBT.

E le gata i lea, e otomeki lava ona aofia alo ma fanau a’oga, i le va o le 5 ma le 18 tausaga, ma fa’amaonia mai e le Ofisa o Aoga sa auai i totonu o a’oga a le teritori i le tausaga a’oga 2023-2024.

Ma e ui ina sa ma’oti mai i le Tulafono, le na o le $40 i le masina, ia penefiti mo le tamaititi/teneititi a’oga e to’atasi, ae peitai, ua tu’uina mai foi i totonu o le Tulafono, le aia tatau i le USDA e toe fetu’una’i ai penefiti mo fanau aoga i Amerika Samoa, Alaska, Hawaii, Guam, Puerto Rico ma le US Virgin Islands.

O le mea lea, mo Amerika Samoa, e mauaina e fanau a’oga ta’ito’atasi, ia le ta’i $177 ($59 i le masina, mo masina e tolu), ma o se tupe maualuga lea, pe a faatusatusa i le na’o le $120 o lo’o maua e fanau a’oga i setete o Amerika.

O nei penefiti, e pei ona masani ai, o le a tufatufaina o ni pepa taumafa (food coupons), tauala mai i le polokalama a le ASNAP lea o lo’o mataituina e le DHSS, ma o le a maua foi ia ni ‘cards’ fou mai i le ofisa a le ASNAP, e mafai ai ona fa’aaogaina nei penefiti.

O lo’o tu’uina atu foi le aia tatau i matua, e le auai ai a latou fanau i lenei polokalama, pe a le finagalo ai, e ala lea i le le o’o mai e piki a latou S-EBT, po o le valaau mai foi i le ofisa ale DHSS ASNAP ina ia ave’ese igoa o a latou fanau mai i le lisi o fanau a’oga ua agava’a mo nei penefiti.

E fa’atasi lava ona maua S-EBT ma o le a tu’uina atu i matua po o ‘guardians’, e fua lava i luga o le fa’agasologa o le a tu’uina mai e le DHSS ASNAP.

Ma e na o matua po o ‘guardians’ o iai o latou suafa i luga o le lisi a le Ofisa a A’oga, o le a mafai ona pikiina ia S-EBT mo a latou fanau.

O le a toe fa’alauiloa mai e le ofisa a le DHSS ASNAP ia nisi taiala e tusa ai ma le mauaina o nei penefiti, ina ia mafai ona fesoasoani i le tausiga o le soifua maloloina o alo ma fanau, i vaitaimi o malologa a aoga.

Na fa’aalia le agaga fa’afetai a le afioga Lemanu i le aufaigaluega a le FNS (Food and Nutrition Services), e aofia ai Cynthia Long, Jesus Medoza ma le aufaigaluega atoa, m lo latou fa’aauau pea ona lagolagoina mana’oga tau taumafa mo Amerika Samoa.