Pago Pago - AMERIKA SAMOA

I fa’amaumauga a le malo, i le aso 19 o Aukuso, o lo’o ta’ua ai le lokaina e leoleo o se alii ina ua molia i lona tau’ai taavale, lea na i’u ai lava ina oso ai se gasegase o se tina ma faaleagaina ai nisi o taavale.

E tusa ai ma fa’amaumauga a le malo, o le taeao o le aso 19 o Aukuso, na maua ai e le Ofisa Leoleo i Fagatogo, ia se valaau mai i se leoleo, e le o faigaluega, e tusa ai ma se alii o lo’o tau’aia taavale i luga o le alatele, e latalata i le aoga o lo’o i Fatu ma Futi.

Ina ua taunu’u leoleo i le nofoaga na tupu ai le faalavelave, sa lokaina mai ai se alii e 29 tausaga le matua, e suafa ia Melvin Ve’e, e pei ona fa’ailoa mai e lona lava tina.

Ua molia nei Ve’e i moliaga e fa, o le Faaleagaina o Meatotino i lona tulaga e lua, o se vaega ‘A’ o solitulafono mama, lea e mafai ona nofosala ai i le falepuipui, i le le sili atu ma le tasi tausaga, po o se sala tupe e le silia ma le $1,000; po o faasalaga uma e lua.

E $1,000 se vaegatupe na faatulagaina, e mafai ona tatalaina ai le ua molia, mai i le falepuipui, e faatali ai lona faamasinoga.

Na ta’ua e se tasi o leoleo na agai atu i le nofoaga na tupu ai le faalavelave, a’o latou taumafai e lokaina mai le ua molia, sa taumafai le alii e u’una’i ‘ese atu ia leoleo.  Ae na mafai ona ave faapagotaina le ua molia, i le fesoasoani a ni isi o leoleo.

O lo’o ta’ua foi i totonu o faamaumauga a le malo, le faaleagaina o ni taavale se fa i le gaioiga a le ua molia, faapea ai ma le oso o se gasegase a se tina matua.  Lea na faatopetope atu ai o ia i le falemai mo togafitiga.