VAEGA 98

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 98.

***********************************

"Suga Naomi, sau e faamavae ia Salome lea o le a alu,” o le toe valaau leotele atu lea a le teine o Ruta i si ona uso laititi o Naomi.  Ae o le taimi lea, ua na ona ia tu ma o’omi lima o Salome ma faataupupula atu i ona mata.

“E te le’i ta’u mai, o lau supavaisa lea i le galuega,” o le tala lea a le tamaloa o Alesana i si ona afafine laititi.

Ua na o le tu o Salome ma lilivale solo.  Ae o le taimi lea ua savali atu ai Naomi ma faapea atu ia Salome, “Ta feiloai taeao i le galuega.”  Ona toe liliu lea o Naomi ma toe savali atua gai i lona potu.

Ua tago atu nei Iakopo ma u’u mai le lima a Salome ma ta’ita’I atu agai i le faitotoa ma valaau mai i ona matua, se’i alu e momoli ia Salome sau ai.

Na tuai le a’apa atu o Iakopo e toe u’u mai le lima a Salome, ae ua leva ona o’o i fafo le savali faatopetope a Salome ma tu ai e pei o la e to lona sela.

O Iakopo na faapea ai ona o le matamuli a si ana manamea ua mafua ai ona faatopetope mai i fafo, ae leiloa e si tama, e ese le mafuaaga ua vave savali mai ai i fafo Salome.

Ae na pei e oso Salome i se niu ina ua toe matala faafuasei mai le faitoto’a o le fale, ae oso mai i fafo ia Ruta ma toe valaau mai, “Tofa Salome, e ta te toe feiloai lava i se taimi lata mai.”  Ma ata leotele mai ia Salome.

“E leaga sa’o lava le ulu o le teine le la,” o le tala lea a Iakopo e uiga i lona tuafafine, a’o ia oso i totonu o le taavale.

Sa le’i lelei se moe a le teine o Salome i lena po, i lona toe mafaufau mai i le mea sa tupu i le fale a Iakopo.

O taimi uma lava e tapuni ai mata a Salome o le a moe, ae toe tum ai ona luma foliga o le teine o Naomi a’o laititi ma lapo’a I vaitaimi o latou a’o’oga fa’atasi.  Ona toe nofo ta ta ifo lea i luga o Salome ma u’u lona ulu, pei a vale.

[E FAIA PEA]