VAEGA 92

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 92.

E fetaui lava le matala o le ‘elevator’ lea na alu atu ai le teine o Naomi i le fogafale pito a luga o le falemai o lo’o la galulue ai ma le alii fomai o Taki, ae matala mai foi ma le faitoto’a o le ofisa a Taki, ua savali mai le alii fomai o le a manava i le fale.

Na fai sina umi o tu Taki i luma o lona faitoto’a ma tilotilo mai i le savali atu a Naomi, ua le mautonu po o le a lana taga o le a fai.  Pe tu pea e faatali le savali atu a Naomi po o le savali ese.

Ae o le taimi foi lea ia Naomi, e savali atu lava i le mea o tu mai ai le alii fomai o Taki, ae ua matua’i ta ta vale lona fatu ina ne’i otegia pe ‘e’e mai ia Taki ia te ia.

O le taunu’u lava o Naomi i luma tonu o le alii fomai sa ia faapea atu ai loa, “E mafai ona ta talanoa?”

Ua pei Taki o se tagata o lo’o moe savali, i lona toe liliu atu i lana ofisa ma tatala le faitoto’a ma toe savali atu loa i totonu.  Na fa’asasa’o atu lava le alii fomai ma saofai i lona nofoa i tua o lona kesi, ae talitali mai i le teine o Naomi.

Ua saofa’i Naomi i le nofoa lea e fesagai ma Taki ma na fai sina umi o saofafa’i le to’alua lea, ua na o le pupula atu leisi i leisi, e aunoa ma se tala po o se pisa.

“Ou te le iloa ia te oe, ae o a’u ua ou fia alu i le fale, o lea na alu le po o o’u faigaluega,” o le faamatalaga lea a le alii fomai ia Naomi.

“Ou te iloa o oe o se tagata e tumu i le alofa ma le loto malamalama,” o le amataga lea o le lauga a le teine o Naomi.  “Ma ou te iloa foi ua tele le sese a lo matou aiga ia te oe ma e leai seisi o tu’ua’ia oe i lou le fiafia ma lou mana’o e molia lo’u tama i le tulafono.”

E tau fai mai le tala a le alii fomai, ae oso atu Naomi ma faapea atu, “Ou te le i sau e toe sui lou mafaufau e uiga i lou alu i le ofisa a leoleo.  O lou aia tatau lena.” 

Na fai sina te’i o le alii leoleo i le faamatalaga lea a Naomi.

Ua fa’aauau le lauga a Naomi, “E na o le pau le mafua’aga ua ou sau ai, o le fa’ato’ese atu ia te oe, e tusa ai ma a’u faamatalaga i le aso na tupu ai le fa’alavelave i lo’u tama.  Sa faigata ia te a’u lo’u va’ai atu i lo’u tama i le tulaga na iai.  Ou te fa’amalie atu ai ia te oe.  O a ni fa’aupuga sa le logomalie pe ua le tau tamali’i i lau fa’afofoga, faamolemole fa’amagalo mai.”

Ua na o le nofo o le alii fomai o Taki ma sioa mai ia Naomi a’o fa’aauau lana lauga.

“Ou te fia fa’afetai atu foi ia te oe ona ou te iloa lou galue malosi ina ia mafai ona toe maua e lo’u tama le malosi.  Sa molimauina lea tulaga e le tele o tausima’i ma na o latou faamatalaina mai ia te a’u.”

Na uma loa le faaupuga lea a Naomi, tula’i loa i luga ma toe faapea atu ia Taki.  “Po o fea le mea o le a e malaga iai, alofa le Atua fa’amanuia ia te oe ma ou la’asaga uma.”

Ona savali loa lea i fafo o Naomi e aunoa ma le toe tilotilo mai i le alii fomai.

[E FAIA PEA]