VAEGA 89

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 89.

*****************************************

Ua malaga ese atu ia le fanau a le tamaloa o Alesana ma lona to’alua o Eseta mai i le falemai, lea o lo’o fa’ata’otolia ai Alesana, ae ua tu’u ai nei na o la’ua e faatalitali le taimi e alu atu ai le fomai e fai atu se tala, pe a o la te’a i tua pe leai.

O se taimi lava o lea taeao, na o’o atu ai le asiasiga a le foma’i ma e ui lava o lo’o tulaga lelei mea uma i lana tagataga’i ae peitai, ona o le matua o le soifuaga o Alesana ma le umi na matapogia ai, sa finagalo ai le alii fomai e toe moe tasi i le falemai, e fa’amaonia o lo’o sologa lelei mea uma i lona soifua maloloina.

Ina ua alu ese atu le fomai i le mae’a ai o lana asiasiga i lea taeao, sa faatonuina loa e Alesana ia le fafine o Eseta ina ia valaau le la fanau ma fa’ailoa iai le tala a le fomai.  E le gata i lea, ae ua fai atu foi ia Alesana ia Eseta, e fai ia Ruta ina ia alu atu e la te talanoa i le tulaga ua o’o iai le la mataupu.

Manatua foi, o lea ua finagalo ia Alesana e toe fa’asa’o lona igoa aemaise o ona pepa i le malo.  Ae o le lave o le mana’oga a le toeaina, ona o le mataupu lea na lavelavea ai a’o talavou, ua mae’a ona suesueina e lona afafine o Ruta ma fa’amaonia ai le tumau pea o moliaga e faasaga i lona tama, ona sa maliu ai se alii talavou.

O le mafuaaga foi lea na usitaia ai e Alesana le tonu valea a lana uo mamae, o Tanielu, le tua’a a le alii fomai o Taki, ina o le a maliu o ia, sa ia tauanauina ai Alesana, e tago e sui lona igoa ia Tanielu ma ia fa’aaogaina pepa o le malo, e ‘alo’ese mai ai mai i le saisaitia o ia e le faamasinoga.

Aua o le mea moni lava, o le mafuaaga uma lava o le fa’alavelave lea na tupu a’o talavou ia Alesana ma Tanielu, na mafua ona o le alii o Tanielu, le tua’a o le alii fomai o Taki.  Ma ina ua maliu le tamaititi lea sa fusu ma Tanielu, sa faatonu loa o ia e Alesana, e sola ese, ae tu’u atu ia te ia.  Aua sa faamaualuga i le manatu a Alesana, e le taitai a’afia o ia, aua o lo’o molimau uma isi alii na iai, e le o ia na mafua ai ona maliu le alii talavou lea sa fufusu ma Tanielu, le tua’a a le alii fomai o Taki.

Ae peitai, o le tamaititi lea na maliu i le faalavelave, o se atalii a se ulugalii mau’oa o le ‘a’ai lea ma o le malosi o le paoa o le tupe, sa i’u ai ina liua molimau a le uo a le alii talavou lea ua maliu, ma ia fa’asino ai lona lima ia Alesana, o ia lea sa fasiotia ia le atalii a le ulugalii mau’oa.

Ma o le mafua’aga foi lea na naunau ai lava Tanielu, le tua’a a le alii fomai o Taki, ina ia usitaia e si ana uo o Alesana ia lana fuafuaga valea, o le suia o lona igoa.  Ona o le taimi lea, o lo’o ta’oto ai Tanielu i le falemai ona o se fa’alavelave na tupu mai, ma o le tala a le fomai, e le i’u i se tulaga lelei ona manu’a.

O le tauanau, tauanau ai pea e Tanielu o Alesana, na i’u ai lava ina ioe iai Alesana i le ‘plan’ a Tanielu, pe a maliu, e tago e sui lona igoa ma ona pepa i le malo, i le igoa o Tanielu.

[E FAIA PEA]