VAEGA 78

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 78.

***************************************************

E taunu’u atu le teine o Naomi ma si ona tuagane o Iakopo, i le fale i lena afiafi, o lo’o tau tapilipili mai si o la tina ina ua matapogia talu ai le tala a le teine matua o Ruta, e faapea, e toe fa’asa’o loa le igoa o le latou tama, ave sa’o loa i le falepuipui ona o tu’uaiga faasaga ia te ia, a’o talavou o ia.

Ua tau pulapula ifo le fafine o Eseta ma tu’u fesili po o le a le mea ua tupu.

Sa taumafai ifo le teine o Ruta e faamatala i lona tina le mafua’aga na ona le iloa ai se mea, ae oso atu le tamaloa o Alesana ma fa’asalavei le faamatalaga a lona afafine, ma faapea atu i lona to’alua, “E leai se mea, hon.  O lea na fai mai Ruta, ua seki mea uma mo le suiga o lo’u igoa.”

“Naomi, ta’ita’I atu lou tina i totonu o le potu e fai sana malologa,” o le faatonuga lea a Alesana i lona afafine laititi, ma sa faapea ona tago mai Naomi i le fa’atu atu lona ta’ita’i ma ta’ita’i atu o ia i totonu o le potu a ona matua.

Ae o le taimi lena ua saofa’i ifo ia Alesana i le nofoa i totonu o le latou potu malolo ma faapea atu ia Ruta, “Aua ne’i toe faia se faamatalaga e uiga i lenei mea, i luma o lou tina, ne’i te’i ua tupu mai se faaletonu ia te ia.”

Ua ioe uma Ruta ma si ona tuagane i le faatonuga a lo la tama.

Ua liliu mai le tamaloa o Alesana ia Ruta ma faatonu e toe faamanino atu lana faamatalaga.  Ma sa faapea atu Ruta, o le toe fa’asa’oga o le igoa o Alesana, e faigofie lava ona fai.  Ae o si ona lave, e toe fiki mai ai i luga faamaumauga o lona faamasinoga a’o talavou o ia, ma e ono toe lavelavea ai pe afai, e le’i pasi tausaga faatulagaina e fa’aleaogaina ai nei moliaga.

Ua faapea mai Ruta, “Afai ae fa’asa’o lou igoa ae le’i pasi le tausaga e fa’aleaogaina ai nei moliaga, e i’u ina e toe lavelavea ai.”

“Ma leisi mea lea na fai mai ai la’u pule, e ono molia oe i ni moliaga fou, i lou fa’aaoga o le igoa o seisi tagata.  Ae o le tulaga lena, e pa’u la i luga o Taki.  Afai ae mana’o Taki ma lona tina e fai se la tagi e fa’asaga ia te oe, e ono molia ai oe iina,” o le tala lea a Ruta.

“O lona uiga, e fai o le moliaga muamua ae o le a toe fafa atu ai ma leisi moliaga fou, pe afai ae mo’i le tala a Taki, i le faia o sana tagi e faasaga ia te oe,” o le tala atu lea a Ruta i si ona tama.

“O lea na sau le tina a Taki,” o le tala lea a le tamaloa o Alesana.  “Ma, e ese ona lagona e uiga i lenei mataupu, mai lagona o Taki.  Sa sau malamalama lava si fafine ma o lana fa’amatalaga ia i ma’ua ma le tou tina, ia alofa faamagalo Taki i ona lagona le fiafia.  Ma ua malie foi o ia, e avea ma molimau mo a’u pe afai ae fai so’u faamasinoga.”

“Oka, ka’i lelei si fafine,” o le tala lea a Iakopo.

“Ou te mana’o ou te alu e toe talanoa ia Taki,” o le tala lea a Naomi, lea ua toe savali mai mai le aveina o lona tina i totonu o le la potu.

“Leai,” o le oso atu a le tamaloa o Alesana.  “O a’u e tatau ona ou alu e fa’afesaga’i ma Taki.  Ou te le tu’ua’ia o ia i ona lagona, e tonu ma sa’o lelei ona lagona.  Ae i lo ma faia ma si ona tua’a, e tatau lava ona ou alu e taumafai e fa’ato’ese i si ona atalii.”

Ua leai se tasi e toe faia se tala i lena taimi.  Aua ua silafia lelei e le fanau, e sa’o lava le faamatalaga a si o latou tama.

Ua faapea mai loa Alesana i si ana fanau, o le aso a taeao, pe a pule alofa le Alii e aulia ma le manuia, o le a alu ai loa e taumafai e saili sona avanoa i le alii fomai.

[E FAIA PEA]