VAEGA 77

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

***********************************

Na faagata mai le tatou Fagogo i le vaiaso ua mavae ina ua folafola atu e le fafine o Elena i le tamaloa o Alesana ma lona to’alua o Eseta, o le a ia fesoasoani ia i la’ua ina ia mafai ona toe suia le igoa o Alesana mai i le igoa o Tanielu.

Ae e le’i alu ese atu Elena mai i le fale a Alesana ma Eseta, sa ia liliu atu ia Alesana ma ia faapea atu ia te ia, “O le a ou fesoasoani atu ia te oe ina ia mafai ona toe fa’afo’i lou igoa sa’o, ae ia e alofa ma e fesoasoani mai i si a’u tama o Taki.”

Manatua foi o Elena, o le tina lea o le alii fomai o Taki.

Ua tu’ua e Elena le fale a Alesana ma Eseta ma ua fai sina umi o nofonofo lenei ulugalii, ua leai se pisa, ae ua na o le nofonofo o le tagata ma mafaufau i le mea sa talanoa mai ai le fafine o Elena.

E le’i umi ae taunu’u mai loa le teine o Ruta, le ulumatua a Alesana ma Eseta ma ia faapea atu i ona matua, “E iai le mea lea ou te fia talanoa atu ai ia te oulua.”

Ua toe saofafa’i ifo ia Alesana ma Eseta ma le la tama teine matua ma faapea atu loa Ruta, “Ua mae’a ona ou failaina pepa mo le toe suia o lou igoa ia Alesana Penaia.  Ma ua uma foi ona ma talatalanoa ma lo’u pule e uiga i le tulaga e ono o’o ia te oe, pe a e toe fo’i ia Alesana Penaia.”

“E faigofie lava ona toe liliu uma ou pepa i lou igoa o Alesana Penaia.  Ae, o lo’o iai pea tu’uaiga lea o lo’o fa’asaga ia te oe a’o e talavou ma o le taimi lava e suia ai ou pepa ia Alesana Penaia, o le a lokaina ai loa oe, e tusa ai ma ou tu’ua’iga.”

“E le gata i lea, o le a fa’aopoopo iai ma tu’uaiga i lou fa’aaogaina fa’asolitulafono o le igoa o Tanielu,” o upu mulimuli ia a le teine o Ruta, na pa’u ai loa ma le fafine o Eseta, ua matapogia.

[E FAIA PEA]