VAEGA 160

E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa.  E fa'atalofa atu i le faaopoopoga fou o le tatou Fagogo i lenei tausaga fou 2025.  E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.

Ia ae se'ese'e mai loa i ou se'etaga malu, ae o le a taumafai atu le soso'oga o le tatou Fagogo - O OE O LO'U TAMA?

********************************************

Na gata mai le tatou Fagogo i le vaiaso ua tuanai ina ua mae’a le molimau a le tamaloa o Semi Tagaloa, lea sa molimauina le mea moni na tupu a’o latou talavou ma le tamaloa o Alesana, i le faalavelave lea sa maliu ai le atalii a se ulugalii mau’oa ma lokaina ai Alesana.

I le mae’a o le molimau a Semi, sa fa’ata’ape ai loa e le alii faamasino ia le faamasinoga, ma ia fautuaina le toe aofia potopoto atu i le aso Gafua o le vaiaso fou mo le lauina o lana fa’ai’uga.

Ua tu’umuli atu le alii faamasino.  Ma sa tu vave lava i luga ia le tamaloa o Alesana ma tilotilo mai i tua po o ona iloa mai le tamaloa o Semi.

Ae e fetaui lava le vaai mai o Alesana ae ua o’o Semi i le faitoto’a ma savali mai ai i fafo ma le potu faamasino.

Sa tamo’e faatopetope mai Alesana e tuliloa mai ia Semi.  Ma maua ina o ia i sitepu i fafo o le fale faamasino.

Na taofi mai e Alesana ia Semi ma ia faapea atu iai, “Aisea?”

Sa iloa lelei e Semi le uiga o le fesili a Alesana.  Ua fa’amimigi ona tau’au ma ia faapea mai, “Ua mamafa tele le avega.  Ua ou fia malolo.”

Ua tago atu nei ia Alesana ma opo mai ia Semi ma ia fa’apea atu iai, “O le a lava le fa’aiuga a le faamasinoga, ua ou nofo sauni e talia, aua o le taimi muamua lava lenei, ua fa’alogologo ai la’u fanau ma lo’u to’alua, ua iai se isi e na te fa’amaonia la’u faamatalaga e uiga i le mea moni na tupu i lea aso.”

“Fa’afetai atu lava ia te oe Semi.  A iai se mea e mafai ona ou aoga ai mo oe i  le lumanai, aua e te ma e fa’ailoa mai,” o le tala lea a Alesana ia Semi ma ia tu’uina atu lona lima e l ulu lima ma Semi, ae e le’i toe savali ese atu.

[E FAIA PEA]