VAEGA 156

E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa.  E fa'atalofa atu i le faaopoopoga fou o le tatou Fagogo i lenei tausaga fou 2025.  E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.

Ia ae se'ese'e mai loa i ou se'etaga malu, ae o le a taumafai atu le soso'oga o le tatou Fagogo - O OE O LO'U TAMA?

******************************************

Sa gata le tatou Fagogo i le vaiaso ua mavae, ina ua toe fa’agasolo taualumaga a le faamasinoga i le Apili a le tamaloa o Alesana, ona o le mea lea sa tupu ia te ia i lona olaga talavou, lea na loka ai o ia ma faia ai fa’amaumauga i totonu o le Ofisa a Leoleo, o ia o se fasioti tagata.

Ma i le fa’agasologa o le faamasinoga Apili, sa faapea ona maua ai e le tamaloa o Alesana ia le avanoa e tula’i ai i luma o le faamasinoga e faamatala lana itu, i le mea sa tupu i lea aso.

Na lologo uma taliga o i latou sa I totonu o le potu faamasino, na aofia ai ma le to’alua a Alesana, le fafine o Eseta faapea le la fanau, o le tamaitai o Naomi, o le alii o Iakopo ma le tamaitai matua o Ruta, lea o lo’o avea ma loia a Alesana, a’o faamatalatala tomanatunatuga a le tamaloa o Alesana, e tusa ai ma lea aso faigata.

Sa auai atu ai foi i totonu o le potu faamasino i lea aso, ia le alii fomai o Taki ma si ona tina. 

Ma na o la maua ai se avanoa e fa’alogologo ai foi i le a’afiaga o le tua’a o Taki, le uo pele a le tamaloa o Alesana, i le mea sa tupu.

Aua manatua foi, o le mea moni lava, o le tua’a o Taki lea na mafua ai ona maliu le atalii a le ulugalii mau’oa.  Ae o le alofa tele iai o le tamaloa o Alesana, sa ia malie ai e fafa le faasalaga o le mea na tupu, ae ia fa’asao mai si ana uo mamae.

Na leai se tasi sa i totonu o le potu, sa le’i maligi loimata i le faamatalaga a le tamaloa o Alesana, o le mea sa tupu.

Na o’o lava foi i le alii fomai ia Taki ma lona tina, ua laue e pei lava na fasi i la’ua e se tasi ona e le gata, o se i’uga faanoanoa o le tama o le alii fomai, ae faapea foi le puapuaga na feagai ma le tamaloa o Alesana, ona o lona alofa lava i si ana uo, le tua’a o le alii fomai o Taki.

Ua mae’a le molimau a le tamaloa o Alesana ma ua toe fo’i mai i lona nofoa.

Ma ua fai sina leva ona saofa’i le alii faamasino ma punou.  Ona ea a’e lea i luga ma ia fesili mai i le tamaitai loia, po o le teine o Ruta, po o iai se la molimau e mafai ona lagolagoina le molimau a Alesana.

Sa tula’i lemu ifo i luga ia Ruta ma tau amata ona tali atu i le alii faamasino, ae na fa’ate’ia o ia ina ua tali mai se tagata mai i tua ma faapea mai, “E iai le molimau.”

[E FAIA PEA]