VAEGA 154

E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa.  E fa'atalofa atu i le faaopoopoga fou o le tatou Fagogo i lenei tausaga fou 2025.  E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.

Ia ae se'ese'e mai loa i ou se'etaga malu, ae o le a taumafai atu le soso'oga o le tatou Fagogo - O OE O LO'U TAMA?

****************************************************

Na gata mai le tatou Fagogo i le vaiaso ua mavae, ina ua o’o atu le ulugalii mau’oa lea e ana le tamaititi na maliu, lea na mafua ai ona molia le tamaloa o Alesana i le tulafono, i le fale o le aiga a Alesana ma lona toalua o Eseta.

O le tamaitai o Naomi, le ui’i a le fanau a Alesana ma Eseta, sa na ia fa’aulufaleina ia le ulugalii ma taitai atu i totonu o le potu malolo e fa’atalitali ai, ae ua alu e logo ona matua ma le latou aiga.

Ona o le tamaitai matua i le fanauga e toatolu a Alesana ma Eseta, o le teine o Ruta, o se loia, o ia lea o lo’o tula’i ma lona tama i totonu o le faamasinoga, sa ia fautuaina lona tama e aua ne’i alu atu e talanoa ma le ulugalii, ae tu’u atu ia te ia, e alu e fesaga’i ma le ulugalii, e vaai po o le a le mea o manana’o ai.

O lea na faatalitali atu ai pea ia le ulugalii o Alesana ma Eseta ma le la fanau o Naomi ma Iakopo, i totonu o le umukuka, lea o lo’o faia ai le latou inuga ti o le taeao, ae e le’i faimalaga atu i le fale faamasino.

Ae ua savali atu nei Ruta ma fa’afeiloa’i atu i le ulugalii ma fesiligia le mafuaaga ua o’o atu ai i lena taeao.

Na le iloa e Ruta pe ata pe ita i le talosaga a le ulugalii na folasia i ona luma.  E pei ona sa saunoa le loomatua, ua o la o’o atu i lea taeao, e talosagaina le tamaloa o Alesana, ina ia ave i tua lana tagi, po o lana apili.

Sa fai lava sina umi o saofa’i Ruta ma fa’ataupupula atu i le ulugalii, ae ua le tautala.  Ona ia faapea atu ai lea, “Aisea ua o latou manatu ai e tatau ona toe ave i tua le talosaga a lo’u tama?”

Ua amata ona tagi le loomatua ona faapea mai lea o le toeaina, “Ua silia ma le 10 tausaga talu ona tupu le fa’alavelave.  E o’o mai lava i le aso, e le mafai ona ma fa’agaloina le ma tamaititi.  Ae na ma tau maua se mapusaga o le mafaufau, ina ua fa’ailoa mai e leoleo, o lea ua faasala le tagata i le faalavelave na ave’esea ai le ma tamaititi.”

“Ae o lenei ua pei lava fa’ato’a tupu le faalavelave, ina ua o ma maua le tala, o lea ua toe su’esu’eina lenei mataupu,” o le oso mai lea a le loomatua ma le tagi.

“Ou te fa’amalie atu ia te oulua matua ona o le mea sa tupu i le lua alo,” o le faapea atu lea a Ruta.  “E le mafai ona ou faapea atu ou te malamalama i le mafatiaga o lo’o feagai ma oulua.  Ae peitai, e le o lo’u tama le mafua’aga na maliu ai o ia.  E sese le tagata ua faasalaina i lenei faalavelave.”

[E FAIA PEA]