VAEGA 152

E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa.  E fa'atalofa atu i le faaopoopoga fou o le tatou Fagogo i lenei tausaga fou 2025.  E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.

Ia ae se'ese'e mai loa i ou se'etaga malu, ae o le a taumafai atu le soso'oga o le tatou Fagogo - O OE O LO'U TAMA?

**********************************************************

Na gata le tatou Fagogo i le vaiaso ua mavae ina ua malolo le faamasinoga a le tamaloa o Alesana mo sina taimi pu’upu’u.

O le taimi lava na savavali mai ai i fafo ia Ruta ma lona tama, faapea ma lo latou aiga, na faatonuina ai loa e Ruta ia ona tei, o lona tuagane o Iakopo ma lona uso o Naomi, faapea le latou tina, ina ia ave le latou tama i le taimi.

Ina ua savavali ese atu lona aiga, sa faapea loa ona savali le tamaitai loia, o Ruta i le nofoaga o tu tu mai ai vaega fa’asalalau ma ia faapea atu iai, “O lea e matou te taumfaai e fa’asa’o se sese na a’afia ai le olaga o se alii talavou i tausaga ua tuanai.”

Ae ina ua mae’a le faamatalaga a Ruta, sa ia tepa atu i leisi itu o le fale faamasino, ma tau atu ai lana va’ai i le ulugalii mau’oa, o matua ia o le tamaititi na maliu i le faalavelave o lo’o molia ai Alesana.  O lo’o la tu tu ma tilotilo mai ia Ruta ma lana fa’asalalauga lea ua faia i vaega fa’asalalau.

Ua mae’a le feiloaiga a Ruta ma vaega fa’asalalau, ae ua liliu atu nei o le a savali atu i le mea o tu tu mai ai le ulugalii.  Ae peitai, sa liliu le ulugalii ma savali ese.

Ua toe fo’i atu nei le aiga a le tamaloa o Alesana ma le fafine o Eseta i le latou fale.  Ae o le taimi lea ua o ai le alii fomai o Taki ma lona tina i le faletalimalo o lo’o fa’amautu ai le fafine.

E alu lava le ta’avale a Iakopo ae o lo’o alu foi lona ia mafaufau i le teine o Salome lea sa alu atu e lagolago le fa’amasinoga a lona tama.

O le taeao na soso’o ai, sa faapea ona toe tapena ai le aiga mo le toe fo’i atu i le fale faamasino.

A’o feagai le aiga ma le latou inuga ti o le taeao, ae tu’itu’i atu le faitoto’a o le fale.

Ina ua tatalaina e le teine o Naomi, sa fa’ate’ia o ia ina ua va’aia le ulugalii mau’oa o lo’o tu tu mai i leisi itu o le faitoto’a.

[E FAIA PEA]