Vaega 147

Taeao Manuia. Taeao Totoa, i le mamalu o le tatou aufaitau nusipepa i lenei taeao fou.

Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana

tausiga mamana, ia i tatou uma, ua mafai ai ona o tatou toe fesilafai i luma o nuu, ae le

o tua o nuu, i lenei taeao fou. E faafeiloai atu foi i tina ma tama matutua ua mafai ona

aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa, o le a toe sosoo atu le tatou Fagogo, “O OE O LO’U TAMA” i lona

vaega e 147.

************************************************************

O le taeao na soso’o ai, na feala mai le aiga o le tamaloa o Alesana, ua leai se Alesana.  Ina ua fesiligia e lana fanau o Ruta, Iakopo ma Naomi ia le latou tina o Eseta po o fea ua usu iai le latou tama, ae peitai, e o’o foi ia Eseta, e na te le iloa po o fea na usupo iai  lona to’alua.

“Sa ou faapea o lea ua usu mai i le fale’aiga e pei o lana masani,” o le tala lea a Eseta.

A’o tapenapena le aiga i lea taeao, i le latou ti o le taeao, sa lagonaina le matala mai o le faitoto’a o le fale ma na latou tilotilo mai, ua savali mai totonu le tamaloa o Alesana.

“Dad, o fea na e alu iai ua popole uma atu tagata ia te oe?” o le tamo’e mai lea o le teine laititi o Naomi ma u’u atu le lima o lona tama.

“Sa ou usupo e fa’aaoga le manaia o le taeao po, e savalivali ai ma toe saili nisi mafaufauga fou,” o le tali mai lea o le tamaloa o Alesana.  “Ruta, a mae’a le tatou ti o le taeao, ona fai lea o se ta talanoaga.”

I le taimi atoa o le inuga ti a le aiga, na va’aia ai e le fafine o Eseta ma lana fanau, aemaise foi o le alii fomai o Taki (lea ua o latou nonofo faatasi), le sagisagi fiafia mai o le talatalanoa a le tamaloa o Alesana.

Ua na o le fetilofa’i solo o Ruta, Iakopo, Naomi ma le alii fomai o Taki, ma tu’ufesili faalemafaufau leisi i leisi, po o le a le mea lea ua tupu i le latou tama.

Ua mae’a le ti o le taeao a le aiga ma ua usu Naomi ma Taki i le falemai ae ua alu le alii o Iakopo i le a’oga.   Ma faapea foi i le fafine o Eseta, ua pisi i feau masani o le aso.

Ae ua savavali atu le tamaloa o Alesana ma lona afafine o Ruta i totonu o le latou potu malolo.  Ona faapea mai lea o Alesana i lona afafine, “Ruta, sauni le ta faamasinoga e apili ai lo’u fa’asalaga.  Ou te iloa ua le mafai ona maua mai ia le tamaloa o Semi, ae e le afaina lea tulaga.  Na o le pau le mea ou te mana’o ai, o so’u aso i totonu o le faamasinoga, se’i o’u faamatala la’u itu o le mea na tupu.”

“O le mea lena sa ou le maua i le taimi muamua o faamasinoga ina ua tupu le faalavelave.  E leai lava seisi na fesili mai ia te a’u, pe tu’u mai foi se avanoa, e fai ai sa’u faamatalaga i luma o le faamasino, e uiga i le mea sa tupu,” o le tala lea a Alesana.

[E FAIA PEA]