VAEGA 144

E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa.  E fa'atalofa atu i le faaopoopoga fou o le tatou Fagogo i lenei tausaga fou 2025.  E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.

Ia ae se'ese'e mai loa i ou se'etaga malu, ae o le a taumafai atu le soso'oga o le tatou Fagogo - O OE O LO'U TAMA?

*******************************************

Sa gata mai le tatou Fagogo i le vaiaso ua mavae, ina ua maua taitaia lava e le tamaloa o Alesana ia le alii o Semi Tagaloa i totonu o lona ofisa ma fesiligia ai e Alesana pe aisea na pepelo ai a’o latou talavou, ua mafua ai ona falepuipui o ia (Alesana).

“Ou te le iloa po o le a le uiga o lau fesili,” o le tali mai lea a Semi ia Alesana.

“Sa tele se tupe na totogi ai oe?  Pe na faamata’u oe e seisi?” o le toe fesili mai lea a Alesana.

Ua le toe tautala Semi ae ua na ona faataupupula mai ia Alesana ma i’u ai lava ina ona faapea mai, “E te le malamalama i se mea e tasi.”

Sa fai sina umi o tu le tamaloa o Alesana e aunoa ma se faamatalaga ia Semi, ae o le taimi lena ia Semi ua na o le femasia’i solo i tua atu o lana laulau ma valu le ulu pei ua osofa’i e ni uku.

Ua toe tu Semi ma faasaga mai ia Alesana ma fai mai, “Ina ne’i e faapea o lo’u aiga e mau’oa, e leai.  Ou te sau mai i se aiga matitiva.  O le mafuaaga lena sa ou fa’auo atu ai ia Ioelu (le tamaititi lea na maliu).  Ioe, na ou iloa le saua ma le le alofa o Ioelu a’o tatou laiti, ae sa tele sana fesoasoani i lo’u olaga talavou.”

“Ou te le o fai atu e faamatala mai lou olaga ma lou aiga.  Ae na o le pau la’u fesili pe aisea na e pepelo ai,” o le toe faapea atu lea a Alesana.

Ua ea a’e i luga le ulu o Semi ma na va’aia le suia o ona foliga, i le ita ma ia faapea mai ia Alesana, “Ua sili ona e alu ese atu ma lo’u ofisa ae e le’i o’o mai leoleo, ona toe loka lea o oe.”

“O le a ou alu, ae ou te le o alu ona o so’u fefe i leoleo, ae ona ou te iloa, e maimau lo’u taimi  ou te talanoa ai ia te oe,” o le tala lea a Alesana ia Semi.  “E le o oe o se tagata lelei po o se tagata faamaoni.  Ma po o le a sa’u tala e toe fai atu ia te oe, o lena ua e talitonu lava e le o se mea sese na e faia a’o tatou talavou.”

[E FAIA PEA]