Vaega 141

Taeao Manuia.  Taeao Toto'a, i le mamalu o le tatou aufaitau nusipepa i lenei taeao fou.

Tatou te tau fai si'i le Vi'iga ma le Fa'amanu i le Silisili Ese, i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafa'i i luma o nu'u, ae le o tua o nu'u, i lenei taeao fou.  E fa'afeiloa'i atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa'au i le Lagi.

Ae saga'i mai loa, o le a toe soso'o atu le tatou Fagogo, "O OE O LO'U TAMA?" i lona vaega e 141.

***************************************************

Ua o'o i le taeao na soso'o ai, ua usupo lava le tamaloa o Alesana ma gasese le ti o le taeao a lona toalua ma si ana fanau faapea le alii fomai lea ua o latou toe nonofo faatasi.

E saofafa'i ane la le fafine o Eseta ma lana fanau, o Ruta, Iakopo ma Naomi faapea le alii fomai o Taki, ae savali le tamaloa o Alesana agai i lo la potu, ae faapea mai i lona aiga, "Inu le tou ti, so'u alu ou te sauni."

Ua fetilofa'i ia Eseta ma lana fanau.  Ae faapea atu le tala a Ruta, "O Dad lea la'a o ma Iakopo e su'e le tamaloa o Semi Tagaloa."

"Oi e te lua le'i mauaina ananafi?" o le fesili mai lea a Naomi.

Ua saofafa'i ane loa Ruta ma Iakopo ma faamatala le mea atoa na tupu i le aso ananafi, ma le sola fa'alilolilo a Semi mai i lona ofisa faigaluega.

"E sa'o lava la le masalosalo a si toeaina," o le faamatalaga lea a le fafine o Eseta ina ua uma ona faamatala e Ruta ma Iakopo le mea sa tupu.  "O lona uiga, ua iloa lelei e Semi le mafuaaga na lua o atu ai."

"Ae ma te le'i ta'uina i lana tamaloa faigaluega le mafuaaga na ma o atu ai," o le tala lea a Ruta.  "Na pau lava le ma tala na fai i lana aufaigaluega, o le fia maua o so ma avanoa e matou te talatalanoa ai."

'O le uiga lena o la'u tala.  Ua leva ona masalosalo le toeaina, na totogi e le ulugalii papalagi ia Semi e pepelo i luma o le faamasinoga.  Ai ua leva na nofo ma tilotilo mai Semi po o afea e o atu ai nisi e toe su'esu'e lana pepelo sa fai.  Ai na faapea ananafi, o oulua ni leoleo," o le finau malosi mai lea a le fafine.

"Talosia ae ma mauaina ma Dad le alii le la nei," o le tala lea a Iakopo.

Ua mae'a le ti o le taeao a le aiga, ma ua sauni atu foi ia le tamaitai o Naomi ma le alii fomai o Taki, mo galuega, e ui la ua uma ona fa'amavae ia Taki mai i le falemai.  Ae ua usu lava i taeao uma e alu e momoli ia Naomi, i le galuega.

Ae ua feosofi foi ia Iakopo ma lona tama i le la'ua taavale ma agai sa'o atu lava i le ofisa faigaluega a Semi.

E taunu'u atu Iakopo ma lona tama, ua leva ona faatali mai le tama o le ofisa ma le faamatalaga mo la'ua.

"E faamalie atu, ua le saofia mai Semi i le fale faigaluega i lenei aso," o le tali mai lea a le tama ofisa ia Iakopo ina ua fesiligia po o ua usu atu ia lana pule.

[E FAIA PEA)