VAEGA 131

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’igama le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai onao tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atule soso’oga o le tatou Fagogo, O OE O LOU TAMA?

**************************************

Na gata mai le tatou Fagogo i le vaiaso ua mavae ina ua alafa’i mai le aiga o le tamaloa o Alesana ma le fafine o Eseta, i le taliega leo tetele a Alesana ma le alii fomai o Taki.

Ma ua avea lea ma tulaga ua pesia ai foi le aiga atoa i le agaga fiafia.  Ua suia ai le agaga faanoanoa na momoe ma le aiga i le po ua tuanai atu, talu ai lava le faato’esega a le tamaitai o Salome.

A’o faia le ti o le taeao a le aiga, sa faapea mai ia le teine o Ruta, “Sa iai se ma mataupu fiafia na fia faalauiloa atu anapo.”

Ua tau fai ea a’e nei ulu o le aiga atoa ma pupula atoa atu i le tamaitai loia ma lana fa’aaliga.

“E fia fa’ailoa atu le faaiuga fiafia o le ma taumafaiga ma Dad i le ofisa a leoleo, e tusa ai ma le suiga o lona igoa,” o le faapea atu lea a Ruta.

Na tau fai velo uma ulu o le aiga agai i le alii fomai o Taki, ona o se mataupu e a’afia ai o ia.

Ua ata le alii fomai ma faapea atu, “Ia i na faasoa mai ia,”  Ma ma avea lea ma tulaga sa taoe talie ai le aga.

“Ia o lea sa taliaina e leoleo le ma savali ananafi ma ua fa’ailoa mai e le taitai leoleo, e leai se tulaga o le a ono a’afia ai Dad, ona ua mae’a ona pasi le taimi na mafai ai ona faia se faaiuga ia Dad.”

Ua tau fai patipati uma le aiga a’o latou nonofo faata’amilo i le latou laulau ‘ai.

Na fa’aauau le faamatalaga a Ruta, “O lea ua mama ia faamaumauga a Dad ma o le a ma faasaga nei agai i le sailiga o se molimau i le faalavelave na tupu o la talavou ma le tua’a a Taki.”

Ua tau so so uma atu le aiga ua leai seisi e toe pisa, ae ua lologo uma taliga i le faalogo i le faamatalaga a le teine o Ruta.

“O lo’o iai i faamaumauga ia le igoa o se tasi o alii a’oga na iai i le taimi na tupu ai le faalavelave.  O ia lea sa fai ma molimau a le aiga a le tamaititi mau’oa lea na maliu,” o le tala lea a Ruta.

“O ia lena e tatau ona saili e vaai po o le a tonu lana molimau sa fai.”

Ua oso atu ia Iakopo ma faapea atu, “E mafai ona ou fesoasoani i lau su’esu’ega aua o lea e malolo a’u vasega i le taimi nei.”

Na faapea mai foi ia le alii fomai o Taki, “O le a le mea e te mana’o ai Ruta, fa’ailoa mai,  lea e leai sa’u galuega i le taimi nei.”

“O lea e ia te a’u le tuatusi o le fale a le alii lea, o lea ou te fia asiasi iai,” o le faapea mai lea a Ruta.

“Ua lelei, e mae’a loa le tatou mea’ai, ta o ta te tietie iai,” o le faapea mai lea a le alii fomai o Taki.

[E FAIA PEA]