VAEGA 132

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 132.

*******************************************

Ua fa’atu e le tama o Iakopo ia le taavale ma oso i fafo, ma taumafai e manava, ona ua ‘ese lava lana faalogo, talu ai mea uma ia sa faamatalaina atu e le tamaitai o Salome i lona faiga o si ona tuafafine o Naomi, a’o la talavou.

Na lagonaina e Iakopo le maligi o ona loimata i le alofa ma le nutimomoia o lona loto, i si ona tuafafine.

Sa umi se taimi o tu tu i fafo o le taavale ia Iakopo, ua na leiloa po o le a leisi ana taga o le a fai.

Ae o le taimi lea, ua tatala lemu ifo e Salome lana faitoto’a ma oso mai i fafo o le taavale ma savali atu i le pito i tua o le taavale.

“Iakopo faamolemole faamagalo mai a’u,” o le tala ma su su lea a Salome, ae ua na o le u mai ai lava o le papatua a Iakopo.

Ua fa’alala atu nei le lima o Salome ma faatu se tamai taavale la’u pasese mai i luga o le alatele ma ia oso ai loa ma alu ese atu ai.

O le uma lava o le tagi a Iakopo sa ia toe oso ai i totonu o lana taavale ma ia toe fo’i faatopetope atu i lo latou fale ma ia alu sa’o i totonu o lona potu, ua matua’i le mautonu lona manatu i se mea o le a tupu mai i le lumanai.

O le taeao na soso’o ai, sa usupo ai lava le tamaloa o Alesana ma amata ona pateto mai i totonu o le umukuka, i le gaseseina o le ti o le taeao a le latou aiga.

Na mafaufau le tamaloa i le tulaga na o’o iai le latou fiafia i le po ua mavae, talu ai lava le tamaitai o Salome.

E le’i umi na galue le tamaloa o Alesana ae savali mai le alii fomai o Taki ma alu atu i le fesoasoani ia Alesana. 

O le avea o le galulue faatasi ma le fiafia a le to’alua sa fai ai lava ona suia le agaga i totonu o le fale.  E feala mai le fafine o Eseta ma lana fanau o Ruta, Iakopo ma Naomi, i taliega a Alesana ma le alii fomai o Taki, o lo’o fai atu i totonu o le umukuka.

Na avea ma tulaga na faapea ona pesia ai foi o latou agaga i le fiafia ma o latou talatalanoa fiafia ai lava ma a’ai fiafia i lena taeao.

[E FAIA PEA]