VAEGA 130

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 130.

**********************************************

Ua savali ese tau le teine o Naomi ae ua o lo’o tootuli pea ia Salome i totonu o le potu malolo a le aiga.

A’o punou pea Salome, sa fa’ate’ia o ia i le papa’i mai o le tagata ma taumafai e faatu atu o ia i luga, ma lona tepa a’e, o le teine matua o Ruta.

Ua ta’ita’i atu e Ruta ia Salome i le nofoa ma faanofo i lalo ma ia faapea atu ma le leo lemu, “Salome, e leai seisi o le matou aiga o ita ia te oe.  O le mea sa tupu, ua leva ona tupu ma na ua e vaai iai, sa faagaloina e Naomi na mea uma.  Na o le pau le agaga o lo’o ia Naomi, o le agaga faanoanoa pe a toe manatunatu i na aso.  E faapena foi o’u matua.  E le o feitai, na’o le agaga faanoanoa.  Ma e moni o na e te mana’o e faamagalo atu oe, ae o lena tulaga, e na’o oe e mama ai le avega.  Ae le ave’esea ai le avega mai o’u matua ma Naomi.”

“Afai ua e salamo faamaoni i lau mea sa fai, aua e te toe taumfai e toe fafagu mai i le mafaufau o Naomi po o o’u matua.  Ae o le tulaga ia oulua ma Iakopo, o le mea lena a oulua.”

“Ae sau i na alu, e fai sau malologa, ua leva le po.”

Ua le lagona se leo o Salome, ae ua na’o le lulu o lona ulu ma tula’i ifo i luga ma la savavali atu ma Ruta i le faitoto’a.

E tatala atu le faitoto’a ae pei e vaai Salome i se aitu, i lona vaai atu o tu mai le alii o Iakopo i fafo.

“Salome, oka, o la ua leva ona ou nofonofo i luma o lou fale ae o lea e te i’i i le matou fale,” o le tala lea a Iakopo.

Ua savali ese mai le teine o Ruta ae tu’u ai na’o Iakopo ma Salome i le faitoto’a.

“Ua leva na e sau?  Sau ta o e momoli oe i le fale,” o le faapea mai lea a Iakopo.

Ua tau ‘ata’ata atu ia Salome ia Iakopo ma ia faapea atu, “E le’i leva na ou sau.  Ae, Iakopo e iai le mea ou te fia talanoa ai ia te oe.  Sau ta o e momoli a’u ma o ta talanoa atu ai i le auala.”

[E FAIA PEA]