VAEGA 124

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 124.

**************************************************************

O se po fiafia lea po i le aiga a le tamaloa o Alesana ma le fafine ia Eseta ina ua i’u manuia le fonotaga a Alesana ma le ofisa a leoleo.

Na faatopetope le tamaloa o Alesana i le fale ma alu sa’o lava i le umukuka ma amata loa ona pisi i le gaseseina o se latou taumafataga tele mo lea afiafi.

Ina ua uma ona talanoa ia Ruta ma lona uso laititi o Naomi, lea na faatonuina ai e Ruta ia Naomi, e valaau ia le alii fomai o Taki e la te o atu faatasi i le fale.

Sa le’i toe faatali ia Naomi ae ia tago loa ma vili le numera a Taki ma ta’u iai le feau a lona uso o Ruta.

“Ia ua lelei, lea o le a ou o’o atu i luma o le falemai, i le taimi e te manava ai,” o le tala mai lea a Taki ia Naomi.

Ae sa fiu Ruta e vala’au ia le telefoni a lona tuagane, o Iakopo ae peitai, e le tali mai o ia.

O le taimi lena ia Iakopo, o lo’o tu i fafo o le fale lea o lo’o nofo ai le teine o Salome ma tauvala’au le telefoni a Salome, ae e le o tali mai le teine.

O lo’o iloa lelei e Iakopo, e le o faigaluega ia Salome, aua ua uma ona ia valaau ia Naomi.  Manatua o Salome, o le supavaisa o Tausimai i le falemai lea o lo’o faigaluega ai Naomi.  Ma ua uma na ta’u mai e Naomi ia Iakopo, e le o faigaluega ia Salome.

Ua amata ona faapopoleina le loto a Iakopo po o iai se mea ua tupu ia Salome, ona ua toeitiiti atoa le fa aso, o ia taumafai lava e fa’afeso’otai le teine faigata, ae e foliga mai o lo’o lafi mai ia te ia.

Ma ua manatu ifo Iakopo, e tusa lava pe moe i le po atoa i luma o le fale a Salome, e le toe alu ese, seiloga ua ia talanoa iai.

Ae o le taimi lea, ua manava le teine o Naomi mai lana galuega ma ia faatopetope atu i luma o le falemai, lea o lo’o tu mai ai le taavale a le alii fomai o Taki.

Ma o la agai atu loa I le fale, lea ua sasala ai le manogi o meaai ‘ese’ese ma le felanulanua’i, o lo’o kukaina e le tamaloa o Alesana, e sami ai le tala fiafia o lea aso.

“Ae o fea o iai Iakopo?” O le fesili mai lea a Ruta ina ua taunu’u atu Naomi ma Taki.

“Ou te le iloa, ou te le’i vaai ai i le aso atoa,” o le tali mai lea a Naomi.

“O iai se mea o tupu ia Iakopo ma Salome?” O le fesili atu lea a le fafine o Eseta.

Ua fetilofa’i ia Naomi ma Ruta, ona oso mai lea o Ruta ma faapea mai, “Ai foi ua misa.”

“Toe valaau iai ma fai iai e vave mai,” o le valaau mai lea o le tamaloa o Alesana.

E a’apa atu Ruta i lana telefoni, ae tatagi mai loa le logo o le faitoto’a o le fale, ma savali atu loa iai Naomi.

Na matua’i faate’ia ia Naomi, ina ua tatala atu le faitoto’a, ae o lo’o tu mai ai i fafo ia le teine o Salome.

[E FAIA PEA]